ޓްރީ ޓޮޕް ހޮސްޕިޓަލުން ކުރިއަށް އޮތް ހަފުތާ ބަންދުގައި ލ. ގަމުގައި ހެލްތު ކޭމްޕެއް ބޭއްވުމަށް ނިންމައިފިއެވެ.
މި ކޭމްޕަކީ ގަމާއި އެ ރަށާ ކައިރި ރަށްތަކުގައި ދިރިއުޅޭ ފަރާތްތަކަށް މަތީ ފެންވަރުގެ ސިއްޙީ ޚިދުމަތް ފޯރުކޮށްދިނުމުގެ ގޮތުން ބާއްވާ ހެލްތު ކޭމްޕެއް ކަމަށް އެ ހޮސްޕިޓަލުން ވަނީ ބުނެފައެވެ.
މި ހެލްތު ކޭމްޕްގައި ހިތުގެ ބަލިތަކާއި ކިޑްނީ ބަލިތަކާއި ފުއްޕާމޭގެ ބަލިތަކާއި ކަށީގެ ބަލިތަކުގެ އިތުރުން ކަރުން މަތީގެ ބަލިތަކާއި ހުޅުހުޅުގައި ރިއްސާ ބަލިތައް އަދި ދުޅަހެޔޮ ކެއުމާ ގުޅުންހުރި ދާއިރާތަކުން ޚިދުމަތް ފޯރުކޮށްދޭނެ ކަމަށް އެ ހޮސްޕިޓަލުން ވަނީ ބުނެފައެވެ.
މީގެ އިތުރުން، ހެލްތު ސްކްރީނިން އަދި އަވަހަށް ބަލި ދެނެގަތުމާއި، ދުޅަހެޔޮ ސިއްހަތެއް ދެމެހެއްޓުމަށް ކުރެވިދާނެ ކަންކަމާބެހޭ ހޭލުންތެރިކަމުގެ ސެޝަނެއްވެސް ބޭއްވުމަށް ވަނީ ނިންމާފައެވެ.
ޓްރީޓޮޕް ހޮސްޕިޓަލުގެ މަލްޓި ސްޕެޝަލްޓީ ހެލްތް ކޭމްޕުގައި ބައިވެރިވާ ޑޮކްޓަރުންގެ ޓީމްގެ ތެރޭގައި:
- ޑރ. އަމިތް އަގަރްވާލް - ކޮންސަލްޓަންޓް، ހިތުގެ ބަލިތަކަށް ޙާއްސަ
- ޑރ. ޗަންދްރަޝޭކަރު ރަވާލް - ކޮންސަލްޓަންޓް، ކަރުން މަތީގެ ބަލިތަކަށް ޙާއްސަ
- ޑރ. އަލީ މުޒްނީ - ކޮންސަލްޓަންޓް، ކަށީގެ ބަލިތަކަށް ޙާއްސަ
- ޑރ. މުހައްމަދު ހަބީބް - ކޮންސަލްޓަންޓް، ކަށީގެ ބަލިތަކަށް ޙާއްސަ
- ޑރ. ތެހްޒީބް ފާރުޤީ - ކޮންސަލްޓަންޓް، ފުއްޕާމޭގެ ބަލިތަކަށް ޙާއްސަ
- ޑރ. ޖަޔާ ޕްރަކާޝް ނާދަން - ކޮންސަލްޓަންޓް، ކިޑްނީ ބަލިތަކަށް ޙާއްސަ
- ޑރ. ޖިވާން ޕައުޑެލް - ކޮންސަލްޓަންޓް، ރާއްޖެ ބައްޔަށް ޙާއްސަ
- ރީބާ މޭރީ ތޮމްޗަން - ދުޅަހެޔޮ ކެއުމާއި ބެހޭ ޑައިޓީޝަން
ޓްރީ ޓޮޕް ހޮސްޕިޓަލުން ވަނީ މީގެ ކުރިން ގއ. ވިލިނގިލި އަދި ގދ. ތިނަދޫގައި ވެސް ހެލްތު ކޭމްޕް ބާއްވާފައެވެ. ބޮޑު ތަރުހީބެއް ލިބުނު އެ ހެލްތު ކޭމްޕްތަކުގައި 1000އަށް ވުރެ ގިނަ މީހުންވަނީ ބައިވެރިވެ ސިއްޙީ ޚިދުމަތް ހޯދާފައެވެ.
ޓްރީ ޓޮޕް ހޮސްޕިޓަލުގެ ސީއީއޯ ޑރ. ސްރިވަޓްސަން ސްރިދާރް ޖީ ވިދާޅުވީ އެފަދަ ހެލްތު ކޭމްޕްތައް ބޭއްވުމަކީ އެ ހޮސްޕިޓަލުން ވަރަށް ބޮޑު އަހަމިއްޔަތުކަމެއް ދީގެން ކުރަމުންދާ މަސައްކަތެއް ކަމަށެވެ.
"އަޅުގަނޑުމެންގެ މަގުސަދަކީ ރާއްޖޭގެ ހުރިހާ ކަންކޮޅުތަކެއްގައި ދިރިއުޅޭ ރައްޔިތުންނަށް ޓްރީ ޓޮޕް ހޮސްޕިޓަލުން ފޯރުކޮށްދޭ މަތީ ފެންވަރުގެ ސިއްޙީ ޚިދުމަތް ލިބޭނެގޮތް ހަމަޖެއްސުން. މި ކޭމްޕްތަކުގެ ސަބަބުން އެ މަޤްޞަދު ޙާޞިލުކުރުމަށް އިތުރު ފިޔަވަޅެއް އެޅިގެންދާނެ ކަމަށް އަޅުގަނޑު އުއްމީދުކުރަން،" އޭނާ ވިދާޅުވިއެވެ.
މި ކޭމްޕްގައި ބައިވެރިވުމަށް އެދޭ ފަރާތްތަކުން ގަމު ރީޖަނަލް ހޮސްޕިޓަލުގެ ނަމްބަރު 6800026 އަށް ގުޅައި ނަން ނޯޓުކުރެވޭނެ ކަމަށް ޓްރީޓޮޕް ހޮސްޕިޓަލުން ވަނީ ބުނެފައެވެ.
މި ހެލްތު ކޭމްޕްތައް ކުރިއަށްގެންދަނީ ޓްރީ ޓޮޕް ހޮސްޕިޓަލުގެ އިޖުތިމާޢީ ޒިންމާގެ ދަށުންނެވެ. މި ޕްރޮގްރާމްގެ މައިގަނޑު މަގުސަދަކީ ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް މަތީ ފެންވަރުގެ ސިއްޙީ ޚިދުމަތް ފޯރުކޮށްދިނުމާއި، ސިއްޙީ ދާއިރާގައި މަސައްކަތްކުރާ ފަރާތްތަކުގެ ގާބިލުކަން އިތުރުކުރުން ކަމަށްވެސް އެ ހޮސްޕިޓަލުން ވަނީ ބުނެފައެވެ.
އެ ހޮސްޕިޓަލުން ވަނީ މި ހެލްތު ކޭމްޕް ކުރިޔަށް ގެންދިއުމަށް ހައްދުންމަތި ކައުންސިލާއި ލ. ގަމު ރީޖަނަލް ހޮސްޕިޓަލުން ދޭ އެހީތެރިކަމާއި އެއްބާރުލުމަށް ޝުކުރު އަދާކޮށްފައެވެ.