ދިރާގު ވިން އަ ސްޕިީޑްބޯޓް ޕްރޮމޯޝަނާ އެއްކޮށް ކޮންމެ މަހަކު ޚާއްސަ އިނާމެއް ލިބޭނެ ކަމަށް ދިރާގުން މިއަދު ބުނެފިއެވެ.
މި ޕްރޮމޯޝަންގައި ދިރާގު ޕްރީޕެއިޑް، ޕޯސްޓްޕެއިޑް އަދި ފައިބާ ބްރޯޑްބޭންޑް ކަސްޓަމަރުންނަށް އަލް ޝާލީ މެރިން، މަޖެލަން 32 ބޯޓަކާއި ޔަމަހާ އައުޓްބޯޑް ދެ އިންޖީނު ހޯދުމުގެ ފުރުސަތު ލިބިގެންދާނެއެވެ.
ޕްރީޕެއިޑް ޕްލޭންތަކަށް 400 ރުފިޔާ ނުވަތަ އެއަށްވުރެ މަތިން ރީޗާޖުކުރާ ކަސްޓަމަރުންނާއި ޕޯސްޓްޕެއިޑް 400 އަދި ފައިބާ ބްރޯޑްބޭންޑް 30އެމް އަށް ވުރެ މަތީގެ ޕްލޭންތަކަށް ސަބްސްކްރައިބްކުރާ ފަރާތްތަކަށް ދިރާގު ވިން އަ ސްޕިޑްބޯޓް ޕްރޮމޯޝަންގެ ގުރުއަތުގައި ބައިވެރިވެވޭނެއެވެ. ދިރާގުގެ ޚިދުމަތް މިހާރު ބޭނުން ކުރަމުންދާ ކަސްޓަމަރުންނާއި އަލަށް ދިރާގާ ގުޅޭ ކަސްޓަމަރުންނަށް ވެސް މި ޕްރޮމޯޝަންގައި ބައިވެރިވުމުގެ ފުރުސަތު ދިރާގުން ވަނީ ހުޅުވާލާފައެވެ.
މި ޕްރޮމޯޝަންގައި ދޭ ސްޕީޑު ބޯޓުގެ އިތުރުން ޕްރޮމޯޝަންގައި ބައިވެރިވުމުގެ މުއްދަތުގެ ތެރޭގައި ކޮންމެ މަހަކު ވެސް އިނާމު ދޭން ދިރާގުން ވަނީ ނިންމާފައެވެ. މިގޮތުން، މި އިނާމުތަކުގެ ތެރޭގައި. ގޯ ޕްރޯ ހީރޯ 12، ސްޕޯޓްސް ފިޝިންގް ގިއާ ސެޓް، ސުންޓޯ ޑީފައިވް ވޮޗް އަދި ޑީޖީއައި މިނީ އެސްއީ ފްލައި މޯ ކޮމްބޯ ފަދަ އިނާމުތައް ހިމެނެއެވެ.
މީގެއިތުރުން، މި ޕްރޮމޯޝަންގެ އިނާމު ހޯދުމަށް ބައިވެރިވާ ހުރިހާ ޕްރީޕެއިޑް ޕޯސްޓްޕެއިޑް އަދި ފައިބާ ބްރޯޑްބޭންޑް ކަސްޓަމަރުން ވެސް ކޮންމެ މަހަކު ކުރިއަށްދާ މި އިނާމު ލިބޭ ގުރުއަތުގައި އޮޓޮމެޓިކްކޮށް ބައިވެރިކުރެވޭނެ ކަމަށް ދިރާގުން ބުނެއެވެ.
އެގޮތުން، ދިރާގުން ވަނީ މިހާރު ބައިވެރިވި ކަސްޓަމަރުންގެ މެދުގައި ދެ ގުރުއަތު ނަގާ، ގޯ ޕްރޯ ހީރޯ 12 އަދި ސްޕޯޓްސް ފިޝިންގް ގިއާ ސެޓް ލިބޭ ނަސީބުވެރި ކަސްޓަމަރުން ހޮވާފައެވެ.