އުފާވެރިކަމާއި ހިތްހަމަޖެހުމަކީ އިންސާނުންގެ ދިރިއުޅުމުގައި އަގުހުރި އަދި މުހިންމު ދެ ސިފައެވެ. މިއީ ވަކި އުމުރަކަށް ނުވަތަ ވަކި ބަޔަކަށް ޚާއްޞަވެފައިވާ ކަމެއް ނޫނެވެ. އުމުރުގެ ހުރިހާ ހަރުފަތެއްގައިވެސް، މުޅި ޙަޔާތުގައި ލިބެމުންދާންޖެހޭ އަގުހުރި ދެ ސިފައެވެ. އުފާވެރިކަން އާލާކުރުމުގެ ގޮތްތަކުގެ ތެރޭގައި އިންސާނުންގެ މެދުގައި އޮންނަ އެކުވެރިކަމާއި ލޯބި، ދުޅަހެޔޮ ގުޅުންތަކާއި އަދި ވަފާތެރިކަން ފާހަގަކޮށްލެވެއެވެ.
ހެޕިނަސް ކްލަބުން މުޖުތަމަޢުގެ އުފާވެރިކަމަށް ހޭލުންތެރިކުރުވުމަށްޓަކައި ކުރިއަށްގެންދާ "ސްމައިލް ޝިހާބް" ޕޮޑްކާސްޓް ޕްރޮގްރާމްގެ ތިންވަނަ އެޕިސޯޑް ވަނީ 2024 އޮކްޓޫބަރު 18 ވަނަ ދުވަހު ސަން ޕޮޑްކާސްޓިންގ އިން ގެނެސްދީފައެވެ.މި އެޕިސޯޑްގެ ޝިޢާރަކީ "ވަފާތެރިކަން" އެވެ. މި އެޕިސޯޑްގައި މެހެމާނެއްގެ ގޮތުގައި ބައިވެރިވެވަޑައިގެންފައިވަނީ މުޖުތަމަޢުގެ އެކި ދާއިރާތަކުގައި ޙަރަކާތްތެރިވާ، ދަރިވަރުންގެ މެދުގައި މަޤްބޫލު މުދައްރިސެއް، ވާހަކަ ހުށަހެޅުންތެރިއެއް އަދި މެންޓަލް ހެލްތު އެވެއާނަސް ފައުންޑޭޝަންގެ އެއް މުއައްސިސް ކަމުގައިވާ މަޝްހޫރު ޔޫލީއެވެ.
ޔޫލީ ފާހަގަކުރެއްވި ގޮތުގައި އެންމެ އުފާވެރި ހަނދާނަކީ ކުޑައިރު މައިންބަފައިންނާއެކު ސްރީލަންކާއަށް ކުރެއްވި ދަތުރެއްގައި އެ ބޭފުޅުން ޔޫލީއަށް ގަނެދެއްވި ރީނދޫކުލައިގެ ބޮޑު ފުއްލާ (ޑިއާ) އެއް ލިބުނު ދުވަހެވެ. އެ ދުވަހުގެ އުފަލުގައި އެކަމާ ގުޅޭ ޅެމެއްވެސް ހެއްދެވިކަން ފާހަގަކުރެއްވިއެވެ. ޔޫލީ ވިދާޅުވީ އުފާވެރި ހަނދާނަކީ ދިގު މުއްދަތަކަށް ވަރަށް ފުން އިޙްސާސެއް ދެމިގެންދާ ކަމެއްކަމުގައެވެ.
ޔޫލީގެ ނަޒަރުގައި، އުފާވެރިކަން ދެމެހެއްޓުމަށް އިންސާނީ ގުޅުންތައް ބަދަހިކުރުމަކީ އަސާސީ ކަމެކެވެ. މި މުހިންމު މަސައްކަތް ފެށެންވާނީ ޢާއިލާގެ ތެރެއިންނެވެ. ދިރިއުޅުމުގެ މަޝްޣޫލުކަން ކިތަންމެ ބޮޑުކަމުގައި ވިޔަސް، ޢާއިލީ ބައްދަލުވުންތަކަށް ޚާއްޞަ ވަގުތު ކަނޑައެޅުމަކީ ކޮންމެހެން ކުރަންޖެހޭ ކަމެކެވެ. އިންސާނާއަކީ އިޖުތިމާޢީ މަޚްލޫޤެއް ކަމުން، އެހެން މީހުންނާ ގުޅުން ބަދަހިކުރުމަކީ ފިޠުރަތީ ބޭނުމެކެވެ. އަދި ހަމައެހެންމެ، އެކިއެކި ޙާލަތްތަކުގައި އެހެން މީހުންގެ އެހީތެރިކަން ބޭނުންވާނެތީ، އަނެކާއަށް އަޅާލުމާއި އެހީތެރިވުމުގެ އިޙްސާސް ފޯރުކޮށްދިނުމަކީވެސް މުހިންމު ކަމެކެވެ. މިޒަމާނުގެ ޒުވާނުންނަށް، ގުޅުންތައް ދެމެހެއްޓުމަށްޓަކައި ލޯބި ދެނެގަތުމާއި އިޙްސާސްތައް ފަހުމްކުރުމުގެ މުހިންމުކަން އިތުރުވެފައިވާކަން ޔޫލީ ފާހަގަކުރެއެވެ. ޢާއިލާގެ ތެރޭގައި މުޢާމަލާތްކުރުމުގައި އޯގާތެރި އަދި ލޯބިވެތި ބަސްތައް ބޭނުންކުރުމާއި، ހުރިހާ ޢުމުރުފުރައެއްގެ މީހުންނަށް އިޙްތިރާމްކުރުމާއި އިޙްތިރާމް ލިބިގަތުމަކީވެސް އުފާވެރިކަން ޙާޞިލުކުރުމަށް މުހިންމު ކަންތައްތަކެކެވެ.
ޔޫލީއަކީ ކެތްތެރި އަދި މަޑުމައިތިރި ޝަޚްޞިއްޔަތެއްގެ ވެރިއެކެވެ. އޭނާގެ ނަޒަރުގައި، އާންމު ދިރިއުޅުމުގައި މީހަކާއެކު ޚިލާފެއް އުފެދުނު ކަމުގައިވިޔަސް، އެކަމެއް ޙައްލުކޮށް މަޢާފުކުރެވިދާނެއެވެ. ކުޑައިރު ނުކިޔަމަންތެރިވެފައިވާކަން އިޙްސާސްވުމުން، މަންމައަށް މަޢާފަށް އެދި ސިޓީއެއް ލިޔުނުކަން ޔޫލީ ހާމަކުރިއެވެ. މިފަދަ ޙާލަތްތަކުގައި ނޭދެވޭ އިޙްސާސްތައް އެތެރޭގައި ނުބަހައްޓައި ބޭރުކޮށްލުމަކީ، ހިތްހަމަޖެހުމާއި އުފާވެރިކަމަށް އަނބުރާ ރުޖޫޢަވުމަށް މުހިންމު އުކުޅެއް ކަމުގައި އޭނާ ދެކެއެވެ. މިކަމާ ގުޅޭގޮތުން ޔޫލީއަށް ކުރިމަތިވި ތަޖުރިބާއެއްވެސް ހިއްސާކުރިއެވެ.
ދުނިޔޭގައި 700 މިލިއަނަށްވުރެ ގިނަ މީހުން އެކަނިވެރިކަން އިޙްސާސްކުރަމުންދާކަމަށާއި، މިކަމަށް އެކަށީގެންވާ ޙައްލެއް ނުހޯދިއްޖެނަމަ މި އަދަދު ބިލިއަނަކަށް އަރާނެކަމަށް ލަފާކުރެވޭކަމަށް ބައެއް ދިރާސާތަކުން ދައްކައެވެ. އެހެންކަމުން، އެކަނިވެރިކަމުން އަރައިގަތުމަށް ކުރެވިދާނެ ކަންތައްތަކަކީ ކޮބައިތޯ ސުވާލުކުރުމުން، ޔޫލީ ވިދާޅުވީ ކޮންމެ މީހަކުވެސް ހެޔޮ އަޚްލާޤުގެ ވެރިއަކަށް ވުމަށް މަސައްކަތްކުރުމުގެ މުހިންމުކަމެވެ. އޭނާ އިތުރަށް ވިދާޅުވީ، އެހެން މީހުންނަށް އަޅާލުމާއި، އެމީހުންގެ ވާހަކަތަކަށް ކަންފަތް ދިނުމާއި، ހިތްވަރުދިނުމާއި، އަދި އެމީހުންގެ ވުޖޫދު އިޙްސާސްކޮށްދިނުމަކީ މުހިންމު ކަންކަން ކަމުގައެވެ. ޔޫލީ މިފަދަ ކަންކަމަށް އަމިއްލަ ތަޖުރިބާއިން މިސާލު ދެއްވަމުން، ބަޑީ ވޯކްޝޮޕްގެ ތަމްރީނުގައި ބައިވެރިވެވަޑައިގެން ކުރެއްވި ތަޖުރިބާތައް ހިއްސާކުރެއްވިއެވެ.އިތުރަށް ވިދާޅުވީ، އެހެން މީހުން އުފާކުރުވުމުގެ ގޮތުން އެކި ޙަފްލާތަކުގައި ތަފާތު ކެރެކްޓަރުތަކުގެ ގޮތުގައި ޙަރަކާތްތެރިވެ، ވާހަކަ ކިޔައިދެއްވުމާއި، އަދި އޭނާ ޙަރަކާތްތެރިވާ އެން.ޖީ.އޯ މެދުވެރިކޮށް މީހުންގެ އަޑުއަހައި، ލަފާދެއްވާފައިވާ ކަމަށެވެ. މި ކަންކަމުގެ ސަބަބުން ބައެއް ފަހަރު މަލާމާތް ލިބުނު ނަމަވެސް، އެހެން މީހުންނަށް އުފާވެރިކަމެއް ހޯދައިދެވުމުން އަމިއްލައަށް ލިބޭ ހިތްހަމަޖެހުމާއި އުފާވެރިކަން ވަރަށް ބޮޑުކަން ޔޫލީ އުފަލާއެކު ފާހަގަކުރެއްވިއެވެ.
ޔޫލީގެ އަޚްލާޤީ ސިފަތަކުގެ ތެރޭގައި އެހެން މީހުންނަށް އަޅާލުމާއި، އެހީތެރިވުމާއި، އިޖްތިމާޢީ ގުޅުންތައް ބަދަހިކުރުމާއި، އަދި އެހެން މީހުންނަށް ހިތްހަމަޖެހުން ހޯދައިދިނުމުގެ ޝައުޤުވެރިކަން ހިމެނެއެވެ. މި ސިފަތަކަކީ ޔޫލީގެ ވަފާތެރިކަމާއި، އޭނާއަށް އެހެން މީހުން ކުރާ އިތުބާރު ދައްކުވައިދޭ ކަންކަމެވެ. މި ސިފަތައް ލިބުނު ގޮތާ ބެހޭގޮތުން ސުވާލު ކުރެވުނު ހިނދު، ޔޫލީ ވިދާޅުވީ އޭނާގެ ޤަބޫލުކުރެވެނީ މިއީ މާތްﷲ އޭނާ ޚަލްޤުކުރެއްވި ގޮތް ކަމަށާއި، މި ސިފަތަކަކީ ކުޑައިރުއްސުރެ އޭނާގެ ކިބައިގައި ހުރި ސިފަތަކެއް ކަމަށެވެ. ޔޫލީ އިތުރަށް ހާމަކުރެއްވި ގޮތުގައި، ކުޑައިރުވެސް މަގުމަތިން ދާ މީހުން ގެއަށް ގެނެސް އެކި ބާވަތުގެ އެހީތެރިކަން ފޯރުކޮށްދެއްވާފައިވެއެވެ. މިފަދަ ބައެއް ހާދިސާތައް ޔޫލީ ހިއްސާކުރެއްވިއެވެ. އޭގެ ތެރެއިން، އަޙްމަދުގެ ވާހަކަ ޚާއްޞަ ގޮތެއްގައި ފާހަގަކުރައްވައި، އިތުރު ތަފްޞީލު ދެއްވިއެވެ. އެގޮތުން، އަޙްމަދު ކިޔާ ފަރާތަކަށް ޔޫލީ ވަރަށް ޅަފަތުގައި ވެދެއްވި އެހީތެރިކަމާއި، ޔޫލީގެ ބައްޕަ ދެއްވި އަގުހުރި ނަސޭހަތުގައި އަޙްމަދު ހިފިކަމަށް ވިދާޅުވިއެވެ. މީގެ ނަތީޖާއެއްގެ ގޮތުން، މިއަދު އަޙްމަދަކީ ހަރުދަނާ މީހަކަށް ވެފައިވާ ކަމަށާއި، އޭނާގެ މުޅި ޙަޔާތް ހެޔޮ ގޮތުގައި ބަދަލުވެފައިވާކަން ޔޫލީ ފަޚުރުވެރިކަމާއި އުފަލާއފަލާއެކު ހިއްސާކުރެއްވިއެވެ.
ކިޔަވައިދިނުމުގެ ދާއިރާގައި ޔޫލީއަށް ލިބުނު އުފާވެރި ތަޖުރިބާއެއްގެ ވާހަކަ އޭނާ ހިއްސާކުރިއެވެ. އެގޮތުން، ބަލި އެނދުގައި އޮތް އޭނާގެ ކުރީގެ ދަރިވަރަކު ފޮނުވި ސިޓީއެއްގެ ވާހަކަ ދެއްކިއެވެ. އެ ދަރިވަރު ފާހަގަކޮށްފައިވާ ގޮތުގައި، ގްރޭޑް 1 އިން ފެށިގެން ޔޫލީގެ ހިނިތުންވުމާއި ލޯބިވެތި ގޮވާލުން އޭނާއަށް ވަރަށް މުހިންމުވެފައިވެއެވެ. އަދި ބަލިން ރަނގަޅުވުމަށްފަހު އެންމެ ބައްދަލުކުރަން ބޭނުންވާ އަދި ވާހަކަދައްކަން އެދޭ މީހުންގެ ތެރޭގައި ޔޫލީ ހިމެނޭކަން އެ ދަރިވަރު ފާހަގަކޮށްފައިވެއެވެ.
ދީނީ ކަންކަމާ ގުޅޭގޮތުން ކުރެވުނު ސުވާލަކަށް ޖަވާބުދެމުން، ޔޫލީ ވިދާޅުވީ އިސްލާމްދީން އޮޅުންފިލުވައި، އެއާ އެއްގޮތަށް އުޅުމަށް އޭނާ ވަރަށް ޝައުޤުވެރިވާ ކަމަށެވެ. މިގޮތުން، ޤުރުއާން ކްލާހަކަށް ދިޔަކަމާއި، އާދާބު ގަޑިތަކުން ލިބުނު ބައެއް މުހިންމު ދަރުސްތަކާއި ފިލާވަޅުތަށް އަމިއްލަ ޙަޔާތުގައި ތަޠްބީޤުކޮށް، ނަމޫނާ ދެއްކި ވާހަކަ ހިއްސާކުރިއެވެ. އަދި ދަރިންގެ ކިބައިން ވެސް ގިނަ ފިލާވަޅުތަކެއް ދަސްވާކަމަށާއި، ވަކި ހާދިސާއަކާ ގުޅިގެން މުދައްރިސުންގެ އިޙްސާސްތަކަށް ދަރިފުޅު ސަމާލުވެފައިވާކަން ފާހަގަކުރިއެވެ. ބެލެނިވެރިއެއްގެ ހައިސިއްޔަތުން، މުދައްރިސަކާމެދު ހިތްހަމަނުޖެހުމެއް އުފެދުނު ނަމަވެސް، ވާހަކަދެއްކުމުގެ ކުރިން ވިސްނާލުމުގެ މުހިންމުކަން ދަރިފުޅުގެ ކިބައިން ދަސްވިކަން އުފަލާއެކު ފާހަގަކުރިއެވެ. ކުޑަކުދިންނަށް އަމިއްލަ ޚިޔާލުތައް ފާޅުކުރުމުގެ ފުރުޞަތު ދިނުމަކީ ޔޫލީ ވަރަށް އަގުހުރި ކަމެއްގެ ގޮތުގައި ދެކެއެވެ. ކުދިންގެ އަޑު އެހުމަކީ އިންތިހާއަށް މުހިންމު ކަމެކެވެ. ކުޑަކުދިންނަކީ ވިސްނުންތެރި ބައެއްކަމަށާއި، އެކުދިންނަށް އުފާވެރިކަން ހޯދައިދިނުމަކީ އެކުދިން ބޮޑުވާއިރު އުފާވެރި، ކާމިޔާބު އަދި އަމިއްލަ ނަފްސަށް އިތުބާރު ކުރާ ބައެއްގެ ގޮތުގައި ބިނާކުރުމަށް މަގުފަހިކޮށްދޭ ކަމެއްކަން މި ވާހަކަތަކުން ފާހަގަކުރެވެއެވެ.
ނިންމާލަމުން ޔޫލީ ފާހަގަކުރި ގޮތުގައި މުޖުތަމަޢުގައި އުފާވެރިކަން ދެމެހެއްޓުމަށްޓަކައި ގޭތެރެއިން ފެށިގެން މަސައްކަތްކުރުމަށް އޭނާ ނަސޭހަތްތެރިވިއެވެ. ގެއަށް ޒިޔާރަތްކުރާ މީހުންނަށް ސަލާމްކުރުމާއި، އެމީހުންނަށް ސަމާލުކަން ދިނުމަށް ދަރިންނަށް އުނގަންނައިދޭން ޖެހެއެވެ. އަވަށްޓެރިންނާ ގުޅުން ބަދަހިކުރުމާއި، އެމީހުންނާ މުޚާތަބުކުރާއިރު ނަމުން ގޮވުމަށް އަހައްމިއްޔަތުކަން ދިނުމަށް އޭނާ ބާރުއަޅައެވެ. ޔޫލީގެ ފިރިހެން ދަރިފުޅަށް، މަންމަގެ ހައިސިއްޔަތުން، އަންހެން ކުދިންނަށް އިޙްތިރާމްކުރަން ދަސްކޮށްދެވުނު ކަމަށާއި، ތެދުވެރިކަމާއި އެހެނިހެން ރަނގަޅު ސިފަތަކުގެ މުހިންމުކަން ކިޔައިދޭ ކަމަށް ވިދާޅުވިއެވެ. އެހެން މީހުންނަށް އޯގާތެރިވެ، އަޅާލުމަށާއި، ހެޔޮ އަޚްލާޤުގެ ވެރިއަކަށް ވުމަށް އިރުޝާދު ދެއްވިއެވެ. އިޖްތިމާޢީ ގުޅުންތައް ދަމަހައްޓައި، އެހެން މީހުންގެ ވާހަކަތަކަށް ރަނގަޅަށް ކަންފަތްދީ، އިޙްތިރާމާއެކު ލޯބިދީ، އެމީހުންގެ ވުޖޫދު އިޙްސާސްކޮށްދިނުމަށް ބާރުއެޅުއްވިއެވެ. އޯގާތެރި ބަހުރުވައިން މުޢާމަލާތްކޮށް، ހެޔޮލަފާ އިންސާނަކަށްވެ، ހުރިހާ ކަމެއްގައިވެސް ވަފާތެރިވުމަށް އިލްތިމާސް ކުރެއްވިއެވެ.