ދޭރަރު ރުއިންގެ ޓްރެއިލާއިން ވެސް ފެންނަނީ މުޅިން ތަފާތު މަންޒަރެކެވެ. ޓްރެއިލާއިން ދައްކައިދެނީ މި ފިލްމަށް މީހުންގެ ޝައުގުވެރިކަން އަތުލާނެ ފަދަ މަންޒަރުތަކެވެ. ތަޅާ ފޮޅުމާ ފިލްމުގަ ދެން ވެސް ދައްކުވައިދޭ ހާދިސާތަކުން ފިލްމުގައި ވާނެ ގޮތް ބަލާލަން ކެތްމަދުވެފެފައި ތިއްބައި އެ ފުރުސަތު މި ލިބުނީ ރޭގައެވެ.
އޮލިމްޕަސްގައި ރޭ ދޭދަރު ރުއިން ޕްރިމިއާ ކުރިއިރު، ފިލްމު ބަލަމުން ދިޔައީ ކުރިއަށް އޮތް މަންޒަރަށް ނޭވާ ހިފަހައްޓާލައިގެން ތިބެއެވެ. ފިލްމުގެ ފެށުމުން ވެސް މި ފިލްމުގައި ދައްކުވައިދޭން ބޭނުންވާ މަންޒަރުތަކުގައި ކުލަ ޖައްސަން ފަށައެވެ. ތަފާތު ކުދި ހާދިސާތަކެއްގެ މައްޗަށް ބިނާކޮށް، ލިޔެފައިވާ މި ފިލްމުގެ ސްކީރް ޕްލޭ ގެނެސްދީފައި އޮތް ގޮތުން ހިތަށް އަރަމުން ދިޔައީ ދެން ވާނީ ކިހިނެތްބާވައެވެ. ނޫނީ ވާން އުޅެނީ ކޮން ކަމެއްބާވައެވެ.
ޑައިރެކްޓަރު އައްޒާމް ----
މިހާރު ހަމަ ގައިމު ވެސް އެންމެންގެ ހިތުގައި ވެސް އުފެދޭނެ ސުވާލަކީ މިއީ ކޮންކަހަލަ ފިލްމެއްތޯއެވެ. ޓްރެއިލަރުގައި އެހާ، އަޅައިގަންނަ ގޮތަށް މަންޒަރުތައް ފެނިފައި ފިލްމު ބިނާކޮށްފައި އޮތީ ކޮންކަންތަކަށް ބާވައެވެ. މި ސުވާލުތަކަކީ ފިލްމު ބަލަން ދިޔަ މީހެއްގެ ހައިސިއްޔަތުން އަޅުގަނޑުގެ ހިތަށް އެރި އެއްޗިއްސެވެ.
ފިލްމުގައިވާ ގޮތް ކިޔައިނުދީ ކުރުކޮށް ބުނަންޏާ ދޭދަރު ރުއިންގައި ބޮޑަށް ކިޔާދީފައި ވަނީ ރާއްޖޭގައި ސިއްރުވެރިކޮށް ހިނގާ މައްސަލައެއްގެ ވާހަކައެވެ. އެއީ އިންސާނީ ވަގުފާރިއެވެ. މި ފިލްމުގައި އެ މައްސަލަ ހިނގާ ގޮތް ވަރަށް މާނަފުން ޝައުގުވެރި ގޮތަކަށް ގެނެސްދިނެވެ. އިންސާނީ ވަގުފާރީގެ އިތުރުން، ވާހަކަ އިތުރަށް މާނަފުން ކޮށްދިނީ ވާހަކައާ ގުޅުވާފައި ހުރި އިތުރު މައްސަލަތަކުންނެވެ. އޭގެތެރޭގައި، ރާވައިގެން ހިންގާ ގޭންގު ކުށްތަކާއި ގެވެށި އަނިޔާއާއި ކުޑައިރު ލިބިފައި ހުރި ނަފުސާނީ އަނިޔާއާއި ކުޑަކުދިންނަށް ނުރައްކާވާ ކަންކަން ފިލްމުން ފުރިހަމައަށް ދައްކުވައިދެއެވެ.
އެހެންކަމުން، މި ފިލްމަކީ އިޖުތިމާއީ މައްސަލަތަކެއް ގުޅިލާމެހިފައި އޮތް ފިލްމެކޭ ވެސް ބުނެވިދާނެއެވެ.
ފިލްމުގެ އެކްޓަރު މުނާޒް ---
މި ފިލްމުން ފާހަގަވި އިތުރު ފުރިހަމަކަމަކީ ވާހަކަ ނުދެއްކި ނަމަވެސް މޫނަށް އަންނަ ކުލަވަރުން ދައްކުވައިދޭ ނޫނީ ކިޔައިދޭ ވާހަކަތަކެވެ. ފިލްމު ނިމުންއިރު މުޅި ފިލްމުގެ ހާދިސާ އޮޅުންފިލުވައިދިނުމުގައި މުހިންމު ދައުރެއް އަދާކުރީ އެކަމެވެ.
އައިފިލްމްސްއާއި ކަޒްމިކް އިންޓަނޭޝަނަލް ގުޅިގެން ގެނެސްދިން ދޭދަރު ރުއިމަކީ އައްޒާމް އަހުމަދު ޑައިރެކްޓުކޮށް، އައިފިލްމްސްގެ މަގުބޫލު ފިލްމުތަކެއް ގެނެސްދިން އިލްޔާސް ވަހީދު (އިއްލެ)އާއި އާސިމް އަލީ ޕްރޮޑިއުސްކުރި ފިލްމެކެވެ.
ދޭދަރު ފިލްމުގައި ލީޑުން ފެންނާނީ މި ވަގުތު ދިވެހި ފިލްމީ ދާއިރާގައި ލީޑް ރޯލުން އެންމެ ޑިމާންޑު ބޮޑު އެއް ތަރި ކަމަށްވާ ޝަރަފުއްދީން އަބްދުﷲއެވެ. ޝަރަފްގެ އިތުރުން މި ފިލްމުގެ މުހިންމު ރޯލުތަކުން ފެންނާނީ މައިހާ އާދަމް ޒާހިރާއި ނޭޕާލް އެކްޓަރެއް ކަމަށްވާ ސުޝްމާ ސުބޭދީއެވެ. އަދި، އިތުރު ރޯލުތަކުން އަލަށް ދާއިރާއަށް ނިކުންނަ ތަރިން ފެންނާނެއެވެ. އޭގެތެރޭގައި އަލީ މުނާޒް މާހިރު ހިމެނެއެވެ.
ނޭޕާލް އެކްޓަރެއް ކަމަށްވާ ސުޝްމާ ސުބޭދީ ----
ފިލްމުގެ ޑައިރެކްޓަރު އައްޒާމް ބުނީ، މި ފިލްމުގެ އެކްޓަރުންގެ އެކްޓިންއާ ދޭތެރޭ ވަރަށް ހިތްހަމަ ޖެހޭ ކަމަށެވެ. މިގޮތުން، ދާއިރާގެ ތަޖުތިބާ ކާރު އެކްޓަރުންގެ ތަޖުރިބާއާއި އާ އެކްޓަރުން ނަގައިގެން މަސައްކަތްކުރުމަކީ 'އެކްސައިޓިން' ޗެލެންޖެއް ކަމަށް އައްޒާމް ބުނެއެވެ.
"ހަމައެކަނި ބެކްޑްރޮޕް އެއިނީ ވަރަށް ސީރިއަސް ކަމަކަށް ލާފައި، ދެން ހުރި އެއްޗިއްސަކީ ހަމަ ސްޓޯރީ ޑްރިވަން އެއްޗިހި. ދެން އަނެއްހެން ޓޭކްއަވޭއަކަށް އައްޒާމް މިގެނެސްދެނީ ސްޓޯރީއެއް. ފިލްމުގެ އަސްލު ޕްރައިމަރީ ގޯލަކީ ހަމަ އެންޓަޓައިންމަންޓް" އައްޒާމް ބުންޏެވެ.
އެހެންކަމުން ދޭދަރު ރުއިންގެ ހުރިވަރެއް ބަލައިލަން ޓިކެޓު އޮލިންޕަހުން ވެސް ގަންނަން ލިބޭނެއެވެ. އަދި، 7242555އަށް ގުޅައިގެން ވެސް ޓިކެޓު ބުކް ކުރެވޭނެއެވެ.