ސަރުކާރުން އިއްޔެ ވަނީ ގާނޫނުއަސާސީއަށް ކުއްލި ބަދަލެއް ގެންނަން ދުވަހުން ދުވަހަށް ރައްޔިތުންގެ މަޖިލީހުގެ ތެރެއިން ފާސްކޮށްފައެވެ. ހެނދުނު ހުށަހަޅައި، ހަވީރު ތަޅުމުން ވަނީ ފާސްކޮށްފައެވެ.
ސަރުކާރުން ވަނީ މައިގަނޑު ތިން ކަމެއް ގާނޫނުއަސާސީގައި ހިމަނަން މިއަދު ނިންމައިފައެވެ. އެއީ؛
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
މިހާ ކުއްލިއަކަށް ގާނޫނުއަސާސީއަށް ބަދަލެއް ގެނައުމުން މި ހަފުތާގެ 'ސަން އެޑިޓާސް ޓޯކް' ޕޮޑްކާސްޓްގައި ވެސް އަލިއަޅުވައިލީ އެ މައުޞޫއަށެވެ. ޕޮޑްކާސްޓްގައި 'ސަން'ގެ މެނޭޖިން އެޑިޓަރު އަހުމަދު ސާއިލް އަލީ ވަނީ މި ފަދަ ބޮޑު ބަދަލެއް މިހާ ކުއްލިއަކަށް ގެންނަންޖެހުނީ ކީއްވެތޯ ސުވާލު އުފައްދަވައިފައެވެ.
ސާއިލް ވިދާޅުވީ، ސަރުކާރުން ގާނޫނުއަސާސީ އިސްލާހުކުރާއިރު މިހާރަށްވުރެ ފުޅާ ދާއިރާއެއްގައި މަޝްވަރާކުރަންޖެހޭ ކަމަށް ގަބޫލުކުރައްވާ ކަމަށެވެ.
އޭނާ ވިދާޅުވީ، ޕާޓީ ބަދަލުކުރުމުން މެންބަރުންގެ ގޮނޑި ގެއްލުމަކީ އޭގެ ޒާތުގައި ރަނގަޅު ކަމެއް ކަމަށެވެ. އެކަމަކު، ޕާޓީން މެންބަރަކު ވަކިކުރުމުން އެ މެންބަރެއްގެ ގޮނޑި ގެއްލޭނަމަ އެއީ މެންބަރުންގެ މިނިވަންކަމާއި ހައްގުތަކަށް ހުރަސްއެޅޭނެ ކަމެއްގެ ގޮތުގައި އޭނާ ވަނީ ފާހަގަކުރައްވައިފައެވެ.
ޕޮޑްކާސްޓްގައި ސަންގެ ޑެޕިއުޓީ މެނޭޖިން އެޑިޓަރު އަހުމަދު އިނާހް ވިދާޅުވީ، ގާނޫނުއަސާސީ ފުރަތަމަ ލިޔުނުއިރު އެންޓި ޑިފެކްޝަންގެ މަފްހޫމް ނުހިމެނީ ވެސް ރައްޔިތުންގެ ބާރު ގެއްލި، ގާނޫނުއަސާސީގައި ބަޔާންކުރާ ރައްޔިތުންގެ ބާރުވެރިކަން ގެއްލިދާނެކަމުގެ ބިރު އޮތުމުން ކަމަށެވެ. އެހެންވެ، މި ފަދަ އިސްލާހެއް ގެނެސް، ޕާޓީތަކަށް މެންބަރެއްގެ ގޮނޑި ގެއްލުވައިލުމުގެ ބާރު ދިނުމަކީ ހެޔޮ ގޮތެއް ނޫން ކަމަށް އޭނާ ވިދާޅުވިއެވެ.
އިނާހް ވިދާޅުވީ، މި ފަދަ ބަދަލެއް މިހާ އަވަސް އަރުވާލައިގެން ސަރުކާރުން ގެންނާނީ މެންބަރުންގެ 'ހިޔާލު ބަދަލުވެދާނެ'ކަމުގެ ބިރު ވެސް އޮތުމުން ކަމަށެވެ. މި އިސްލާހާ މެދު ޕީއެންސީގެ ތެރޭގައި ވެސް ހިޔާލުތަފާތުވުން ހުރިކަން އޭނާ ފާހަގަކުރެއްވިއެވެ.
ގާނޫނުއަސާސީއަށް ގެނައި ބަދަލުތަކާ ގުޅޭ ގޮތުން މި ނޫން ވެސް ގިނަ ވާހަކަތަކެއް މި ހަފުތާގެ ޕޮޑްކާސްޓްގައި ވަނީ ދައްކާފައެވެ. މުޅި ޕޮޑްކާސްޓް އައްސަވާލައްވާށެވެ.