ކުޑަކަމުދާ ނިޒާމުގެ ބަލިތަކާއި ޔޫރޮލޮޖީ ޓްރާންސްޕްލާންޓް އަދި ޕެރިޓޯނިއެލް ޑަޔަލިސިސް ފަރުވާދޭ ޑރ. އީވާން ނެރެޓްޔަކް ހަތަރު ދުވަހަށް ޓްރީޓޮޕް ހޮސްޕިޓަލުގައި ބަލި މީހުން ބަލަން ނިންމައިފިއެވެ.
ޓްރީޓޮޕް ހޮސްޕިޓަލުން ބުނި ގޮތުގައި، ޑރ. އިވާން އެ ހޮސްޕިޓަލުގައި ބަލި މީހުން ބަލާނީ އަންނަ ހޯމަ ދުވަހުން ފެށިގެން މި މަހުގެ 28ވަނަ ދުވަހުގެ ނިޔަލަށެވެ.
އެގޮތުން، ޑރ. އިވާން ފޯރުކޮށްދޭ ޚިދުމަތްތަކުގެ ތެރޭގައި ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި ހީމޯޑަޔަލިސިސް ފިސްޓުލާ އޮޕަރޭޝަން (ފިސްޓުލާ ހެދުމާއި ފިސްޓުލާ މަރާމާތުކުރުމުގެ ސާޖަރީތައް) ކުރުން ހިމެނޭ ކަމަށް އެ ހޮސްޕިޓަލުން ބުނެއެވެ.
ޓްރީޓޮޕުން ބުނީ، ރާއްޖޭގައި މިހާތަނަށް ކިޑްނީ ފެއިލްވެފައިވާ ބަލިމީހުންނަށް ލިބެން އޮތީ ހަމައެކަނި ހީމޯޑަޔަލިސިސް ފަރުވާ ކަމަށާއި މިއީ ވަކި ޚާއްޞަ ތަނެއްގައި، ނުވަތަ ހޮސްޕިޓަލުގައި ކުރަންޖެހޭ ފަރުވާއެއް ކަމަށެވެ.
ޔޫރޮލޮޖީ ޓްރާންސްޕްލާންޓް ފަރުވާދޭ ޑރ. އިވާން ހަތަރު ދުވަހަށް ޓްރީޓޮޕްގައި ބަލި މީހުން ބަލަނީ ---- ފޮޓޯ/ ޓްރީޓޮޕް ހޮސްޕިޓަލް
ޕެރިޓޯނިއެލް ޑަޔަލިސިސްއަކީ ބަނޑުގައި ހުންނަ "ޕެރިޓޯނިއެލް ލައިނިންގް" ކިޔާ ފަށަލައިގެ ބޭނުން ހިފައިގެން ފަސޭހައިން ހޮސްޕިޓަލަށް ނައިސް ހޯދޭ ޑަޔަލިސިސް ފަރުވާއެއް ކަމަށާއި މި ފަރުވާ ބަލިމީހާއަށް ފަސޭހަ ތަނެއްގައި ހުރެގެން، ހޮސްޕިޓަލަށް ނައިސް އަމިއްލަޔަށް ކުރެވޭ ކަމަށް ޓްރީޓޮޕުން ބުނެއެވެ. އެހެންވެ، ހޮސްޕިޓަލަށް އައުމަށް ހޭދަވާ ޚަރަދާއި ވަގުތު ކުޑަކުރެވި ރާއްޖޭގެ އެކި ރަށްތަކުގައި ދިރިއުޅޭ ޑަޔަލިސިސް ފަރުވާ ހޯދާ ފަރާތްތަކަށް ވަރަށް ބޮޑު ލުޔެއް ލިބޭނެ ކަމަށް ބުނެފައިވެއެވެ.
މި ފަރުވާ އެ ހޮސްޕިޓަލުގައި ތައާރަފުކުރުމަށް ޑރ. އިވާންއާއި ހޮސްޕިޓަލުގެ ކުޅަދާނަ ނެފްރޮލޮޖީ ޓީމުން ޑަޔަލިސިސް ފަރުވާ ހޯދާ ފަރާތްތަކަށް މައުލޫމާތު ފޯރުކޮށްދިނުމަށާއި ހިލޭ ކައުންސެލިން ދިނުމަށް ޓްރީޓޮޕުން ވަނީ ނިންމާފައެވެ. އަދި، ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި ބަލިމީހާއަށް ގޭގައި ހުރެގެން މިކަން ކުރާނެ ގޮތުގެ އިރުޝާދު ދިނުމަށް ވަނީ ހަމަޖެހިފައެވެ.
ޓްރީ ޓޮޕް ހޮސްޕިޓަލް -- ސަން ފޮޓޯ/ ފަޔާޒު މޫސާ
މިގޮތުން، ޕެރިޓޯނިއެލް ޑަޔަލިސިސް ހެދުމަށް ބޭނުންވާ ފަރާތްތަކުން ހިލޭ ކައުންސެލިންއަށް ޓްރީ ޓޮޕް ހޮސްޕިޓަލުގެ ކޯލް ސެންޓަރު 3351610އަށް ގުޅައިގެން ނުވަތަ އީމެއިލަށް މެއިލް ކުރައްވައިގެން ރެޖިސްޓްރީ ކުރެވޭނެއެވެ.
މި ސެޝަންތައް ބާއްވަނެ ތާރީޚެއް ކަނޑައަޅާނީ އިތުރު މައުލޫމާތު ހޯދަން ޝައުގުވެރިވާ ފަރާތްތަކާ މަޝްވަރާކޮށްގެން ކަމަށް އެ ހޮސްޕިޓަލުން ބުނެފައިވެއެވެ.
އެއާއެކު، ޓްރީ ޓޮޕް ހޮސްޕިޓަލުން އަންނަނީ ޑައިލިސިސް ޚިދުމަތްތައް ފަސޭހަކަމާ އެއްކޮށް ލިބޭނެ މަގު ތަނަވަސްކޮށް ދިނުމަށާއި ހެޔޮ އަގުގައި މި ޚިދުމަތް ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ. މިގޮތުން، މޯލްޑިވްސް ނޭޝަނަލް ޑިފެންސް ފޯސްއާއި މޯލްޑިވްސް ޕޮލިސް ސާވިސް އަދި އަމިއްލަ އިންޝުއަރެންސް ކުންފުނިތަކުން ޕެރިޓޯނިއަލް ޑައިލިސިސްއާ ގުޅުންހުރި އެންމެހައި ޕްރޮސީޖާތަކާއި ޚިދުމަތްތަކަށް ފުރިހަމައަށް ޚަރަދު ހަމަޖައްސައިދޭނެކަން ކަށަވަރުކޮށްދީފައިވާ ކަމަށް އެ ހޮސްޕިޓަލުން މައުލޫމާތުދެއެވެ.