ޗަމްޕާ ގިރި ރޮމެންޓިކް އައިލަންޑުގައި މިއަދު ވޮލީ ކޯޓެއް ހުޅުވައި އެކަމުގެ އުފަލުގައި ވޮލީ މުބާރާތެއް ކުޅެފިއެވެ.
މި ކޯޓު ހުޅުއްވައިދެއްވީ، ރާއްޖޭގެ މަޝްހޫރު ވިޔަފާރިވެރިޔާ އަދި ޗަމްޕާ ބްރަދާޒްގެ ޗެއާމަން ޗަމްޕާ މުޙައްމަދު މޫސާ (އުއްޗު)އެވެ. ވޮލީ ކޯޓު ހުޅުވުމުގެ އުފަލުގައި މިއަދު ވަނީ އެއް ދުވަހުގެ ކުޑަ މުބާރާތެއް ވެސް ކުޅެފައެވެ.
މި މުބާރާތުގައި ހަތަރު އަންހެން ޓީމެއް ވާދަކޮށްފައި ވެއެވެ. އެއީ ޑީއެފްސީ، މީރު ރިސޯޓުގެ ސްޓާފުންގެ ޓީމު، ކުރެއްދޫ އައިލެންޑް ރިސޯޓުގެ ސްޓާފުންގެ ޓީމު އަދި ޗަމްޕާ ގިރި ރޮމެންޓިކް އައިލެންޑުގެ ޓީމެވެ.
މި މުބާރާތުގެ ފައިނަލުގައި ކުޅުނީ ޑީއެފްސީއާއި ޗަމްޕާ ގިރި ރޮމެންޓިކް އައިލެންޑުގެ ޓީމެވެ. މުބާރާތް ކާމިޔާބު ކުރީ ޑީއެފްސީއެވެ.
ޗަމްޕާ ގިރީގައި ވޮލީކޯޓެއް ހުޅުވުން -- ސަން ފޮޓޯ
މުބާރަތުގެ ޗެމްޕިއަންކަން ހޯދާ ޓީމަށް އުއްޗު ވަނީ އެއްލައްކަ ރުފިޔާ ހުށަހަޅުއްވާފައެވެ.
ޗަމްޕާ ގިރި ރޮމެންޓިކް އައިލެންޑަކީ އުއްޗު އަމިއްލަފުޅަށް ހިއްކަވައިގެން ތަރައްޤީކުރައްވަމުން ގެންދަވާ އަމިއްލަ ރަށެކެވެ. މި ރަށުގައި މައިގަނޑު ގޮތެއްގައި ކުރަނީ ދަނޑުވެރިކަމެވެ.
މި ރަށުގައި ވޮލީ ކޯޓެއް ހުޅުވުމަކީ ރަށުގައި މަސައްކަތް ކުރާ މުވައްޒަފުންގެ މުނިފޫހި ފިލުވުމަށްޓަކައި ކުރެއްވި ކަމެކެވެ.