ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަންވެ ވަޑައިގެން ހުންނެވީ، ވެ ވަޑައިގަތް ވައުދާ އެއްގޮތަށް ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެންނެވީތީ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ޔާމީންގެ މައްޗަށް ނުހައްގުން ކުރި ޖަލު ހުކުމުން އެ މަނިކުފާނު މިނިވަންކޮށްދެވުމަކީ ރައީސް މުއިއްޒުގެ ރިޔާސީ ވައުދެކެވެ.
ސަރުކާރަށް އަހަރު ފުރުމާ ގުޅިގެން މިރޭ ކުރިޔަށް ގެންދާ "ހަފުތާ 52 ފާހަގަ ކުރުމުގެ ރަސްމިއްޔާތު"ގައި ވާހަކަފުޅު ދައްކަވަމުން ރައީސް ވަނީ އެ ކަމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވަފައިފައެވެ.
ރައީސް ވިދާޅުވި ގޮތުގައި ރިޔާސީ އިންތިޚާބު އެ މަނިކުފާނު ކާމިޔާބު ކުރެއްވުމާއެކު، އޭރު ވެރިކަމުގައި ހުންނެވި ކުރީގެ ރައީސް އިބްރާހީމް މުހައްމަދު ސާލިހު މަރުހަބާ ދެންނެވުމަށް ގުޅުއްވުމުން ވެސް، އެންމެ ފުރަތަމަ އެދިވަޑައިގަތީ ކުރީގެ ރައީސް ޔާމީން ގެއަށް ބަދަލުކޮށްދިނުމަށް ކަމަށެވެ.
އަދި އޭރު ސާލިހާ ބައްދަލު ކުރެއްވުމަށް ވަޑައިގެން ވެސް، އެ މަނިކުފާނު އެދިވަޑައިގަތް ގޮތަށް ޔާމީން ގެއަށް ބަދަލު ކުރުމުގެ ކަންކަން ކުރިޔަށްދާތީ، އެ ކަމަށް ޓަކައި ޝުކުރު ދެންނެވި ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ އެ ހިސާބުން ފެށިގެން އެ މަނިކުފާނު ވެ ވަޑައިގަތް ވައުދު ފުއްދަވަން ފައްޓަވާފައިވާ ކަމަށެވެ.
އަދި މަގާމާ ހަވާލުވެ ވަޑައިގަތުމަށްފަހު ރައްޔިތުންނާ މުޚާތަބު ކުރައްވައި، ޝަރުއީ ދާއިރާއަށް ނުފޫޒު ފޯރުވުން ނިމުނީ ކަމަށް އިއުލާން ކުރެއްވި ހިސާބުން ފެށިގެން އެ ވައުދު ފުއްދަވާފައިވާނެ ކަމަށެވެ.
"އެހެންވީމާ އެ ހިސާބުން ފެށިގެން ސިޔާސީ ހުކުމެއްގައި ހައްޔަރުކޮށްފައިހުރި ރައީސް ޔާމީން މިނިވަން ކުރުމަކީ ޝަރުއީ ދާއިރާގެ އަތްމަތީގައި އޮތް ކަމެއް. އަޅުގަނޑުމެން ޝަރުއީ ދާއިރާއަށް ނުފޫޒު ނުފޯރުވާތީ، އަލްޙަމްދުލިﷲ އެ މަނިކުފާނު އެ ހުރީ މިނިވަންވެ ވަޑައިގެން. މީ ހަގީގަތް" ރައީސް ވިދާޅުވިއެވެ.
ރައީސް މިހެން ވިދާޅުވި ނަމަވެސް، ޔާމީން ވިދާޅުވާ ގޮތުގައި އެ މަނިކުފާނަށް ކޮށްފައިވާ ހުކުމުން މިނިވަންވެ ވަޑައިގަތީ ސަރުކާރުގެ ހެޔޮފުޅުކަމުންނެއް ނޫނެވެ.
ރައީސް މުއިއްޒު ވެރިކަމަށް ވަޑައިގަތީ ޔާމީނަސް ރިޔާސީ އިންތިޚާބުގައި ވާދަނުކުރެވޭތީ އެމަނިކުފާނުގެ ތާއީދާއެކުއެވެ.
ނަމަވެސް، މި ސަރުކާރުން ވެރިކަމަށް އައިތާ މާ ގިނަ ދުވަސްތަކެއް ނުވަނީސް ޕީޕިއެމް ޕީއެންސީގެ ލީޑަރުގެ ގޮތުގައި ހުންނެވި، ޔާމީން ވަނީ އެ ކޯލިޝަންގެ ލީޑަރުކަމުން އިސްތިއުފާ ދެއްވައިފައެވެ. ޔާމީން ވިދާޅުވި ގޮތުގައި ވަކިވެވަޑައިގަތީ ރައީސް ޑރ. މުއިއްޒާއި، ޔާމީނާ ގުޅުން ހީނަރުވެ ޕާޓީ ހިންގުމުގައި ޔާމީން އެކަހެރިކުރުމަށް މަސައްކަތް ކުރުމުންނެވެ.
އެއަށްފަހު، ޔާމީން ވަނީ ޕީޕަލްސް ނެޝަނަލް ފްރަންޓު (ޕީއެންއެފް)ގެ ނަމުގައި އަމިއްލަފުޅު ޕާޓީއެއް އުފައްދަވާފައެވެ. ޔާމީން ގެންދަވަނީ އެމަނިކުފާނުގެ ޕާޓީން ބާއްވާ ބައްދަލުވުންތަކުގައި މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.