ޔުއޭފާ ނޭޝަންސް ލީގުގެ ލީގު އޭގެ ގްރޫޕް ތިނެއްގައި ޖަރުމަނުވިލާތާއި ބޮންނިއާ އެންޑް ހާޒެގޮވީނާ ބައްދަލުކުރި މެޗު ޖަރުމަނުން ފަސޭހަ ކަމާއެކު ކާމިޔާބުކޮށްފިއެވެ.
ޖަރުމަނުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ހަތް ލަނޑު ސުން ލަނޑުންނެވެ. މިއީ ނޭޝަންސް ލީގުގެ ހަ އަހަރުގެ ތާރީހުގައި ޓީމަކުން ހަތް ލަނޑު ކާމިޔާބު ކުރި ފުރަތަމަ މެޗެވެ. މިމެޗަށް ނިކުންއިރު ވެސް ކުއާޓާ ފައިނަލުން ޖާގަހޯދާފައިވާ ޖަރުމަނުން މިކާމިޔާބީއާއެކު މިހާރުވަނީ ގްރޫޕުގެ އެއްވަނަ މަގާމު ކަށަވަރު ކޮށްފައެވެ.
ޖަރުމަނު ޓީމުގެ ފަރާތުން މޮޅު ކުޅުމެއް ފެނުން މިމެޗު އެޓީމުން ފެށީ ވަރަށް ފޯރިއާއެކުއެވެ. މިގޮތުން މެޗުގެ ދެވަނަ މިނެޓުގައި ޖަރުމަނުން ވަނީ މެޗުގެ ލީޑު ނަގާފައެވެ. މިލަނޑު އެޓީމަށް ކާމިޔާބު ކޮށްދިނީ ޖަމާލް މުސިއެލާއެވެ. މިމެޗުގައި ޖަރުމަނު ޓީމުން ކާމިޔާބުކުރި ދެވަނަ ލަނޑު މެޗުގެ 23ވަނަ މިނެޓުގައި ކާމިޔާބު ކޮށްދިނީ ޓިމް ކްލެއިންޑިއެންސްޓްއެވެ. އަދި މެޗުގެ 37 ވަނަ މިނެޓުގައި ކައި ހަވާޓްޒް ވަނީ އެޓީމުގެ ލީޑު އިތުރަށް ފުޅަކޮށްދީފައެވެ. މިމެޗުގެ ފުރަތަމަ ހާފު ނިމިގެންދިޔައީ ތިން ލަނޑު ސުން ލަނޑުން ޖަރުމަނު ކުރީގައި އޮވެގެންނެވެ.
މިމެޗުގެ ދެވަނަ ހާފު ވެސް ޖަރުމަނުން ފަށާފައިވަނީ ފުރަތަމަ ހާފެކޭ އެއްގޮތަށް ވަރަށް ފޯރީގައެވެ. މިގޮތުން ދެވަނަ ހާފުގެ ކުޅުން ފެށިތާ ފަސްވަނަ މިނެޓުގައި ފްލޮރިއަން ވާޓްޒްވަނީ ޖަރުމަނުގެ ހަތަރުވަނަ ލަނޑު ކާމިޔާބު ކޮށްދީފައެވެ. އަދި މިލަނޑު ޖެހިތާ ހަތްމިނެޓު ފަހުން ވާޓްޒް ވަނީ މިމެޗުގައި އޭނާ ކާމިޔާބުކުރި ދެވަނަ ލަނޑާއެކު ފަސް ވަނަ ލަނޑު ޖަރުމަނަށް ކާމިޔާބު ކޮށްދީފައެވެ. މިމެޗުގައި ޖަރުމަނު ޓީމުން ކާމިޔާބުކުރި ހަވަނަ ލަނޑު މެޗުގެ 66ވަނަ މިނެޓުގައި ކާމިޔާބު ކޮށްދިނި ބަދަލު ކުޅުންތެރިޔާ ލިރޯއި ސާނޭއެވެ. އަދި ފަހު ލަނޑު މެޗުގެ 79ވަނަ މިނެޓުގައި ކާމިޔާބު ކޮށްދިނީ ދެވަނަ ލަނޑު ވެސް ކާމިޔާބު ކޮށްދިން ކްލެއިންޑިއެންސްޓްއެވެ.
މިކާމިޔާބީއާއެކު ޖަރުމަނުވިލާތުން މިވަނީ ކުޅުނު ފަސް މެޗުން 13 ޕޮއިންޓް ހޯދާ ބާކީ އެއްމެޗް އޮއްވާ ގްރޫޕްގެ އެއްވަނަ މަގާމު ކަށާވަރު ކޮށްފައެވެ. އަދި މިނާކާމިޔާބީއާއެކު ބޮސްނިއާ މިހާރުވަނީ ލީގު ބީއަށް ރެލިގޭޓް ވާނެކަން ޔަގީންވެފައެވެ.
އެޓީމަށް ލިބިފައިވަނީ ފަސް މެޗުން އެންމެ ޕޮއިންޓެކެވެ. އަދި ފަހު މެޗުން މޮޅުވި ނަމަވެސް ތިންވަނައިގާ އުޅޭ ހަންގޭރީ އާއި އަރާ ހަމަ ނުކުރެވޭނެއެވެ.