އެމެރިކާގެ ރައީސް އޮފީސް ވައިޓް ހައުސްގެ ޕްރެސް ސެކްރެޓަރީއަކަށް ދެން ވާނީ 27 އަހަރުގެ އަންހެނެއް ކަމަށް އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ކެރޮލައިން ވަނީ މީގެ ކުރިން ޓްރަމްޕްގެ ފުރަތަމަ ދައުރުގައި އެސިސްޓެންޓް ޕްރެސް ސެކްރެޓަރީގެ މަގާމު އަދާކުރައްވާފައެވެ. ޕްރެސް ސެކްރެޓަރީގެ މަގާމަށް އައްޔަންކުރުމުން ކެރޮލައިން ވެވަޑައިގަންނަވާނީ މިހާތަނަށް އެ މަގާމު ފުރުއްވާ އެންމެ ޒުވާން ބޭފުޅާއަށެވެ.
އެ މަގާމަށް ކެރޮލައިން އައްޔަންކުރައްވާނެ ކަމަށް އިއުލާނުކުރައްވައި ޓްރަމްޕް ވަނީ ކެރޮލައިންއަށް ވަރަށް ބޮޑަށް ތައުރީފުކުރައްވާފައެވެ. އެގޮތުން އޭނާއަކީ ތޫނުފިލި، ބުރަކޮށް މަސައްކަތް ކުރާ އަދި އިތުބާރު ކުރެވޭ މީހެއްގެ ގޮތުގައި ޓްރަމްޕް ސިފަކުރެއްވިއެވެ.
ކެރޮލައިންއަކީ ޓްރަމްޕްގެ ވައިޓް ހައުސްގެ ފަސް ވަނަ ޕްރެސް ސެކްރެޓަރީއެވެ. އެމަނިކުފާނުގެ ފުރަތަމަ ދައުރުގައި ޝޯން ސްޕައިސާ، ސާރާ ހަކަބީ ސެންޑާސް، ސްޓެފަނީ ގްރިޝަމް އަދި ކޭލީ މެކެނޭނީ ވެސް ވަނީ އެ ރޯލު އަދާކުރައްވާފައެވެ.
ނިއު ހެމްޝަޔާއަށް އުފަން ކެރޮލައިން ފުރަތަމަ މަސައްކަތްކުރެއްވީ ޓްރަމްޕްގެ ދައުރުގައި ވައިޓް ހައުސްގައި އިންޓާންއެއްގެ ގޮތުގައެވެ. ކެރޮލައިންއަކީ ސެއިންޓް އެންސެލްމް ކޮލެޖުން ޕޮލިޓިކްސް އެންޑް ކޮމިއުނިކޭޝަންސްގެ ދާއިރާއިން ބެޗްލާސް ޑިގްރީ ހާސިލް ކުރައްވާފައިވާ ބޭފުޅެކެވެ.
ޓްރަމްޕްގެ ވެރިކަން ނިމުނު ފަހުން، 2022 ވަނަ އަހަރު ކެރޮލައިން ވަނީ އޭނާގެ އުފަން ސްޓޭޓުގައި ކޮންގްރެސްއަށް ކުރިމަތިލައްވާފައެވެ. އެ ފަހަރު ރިޕަބްލިކަން ޕާޓީގެ ޕްރައިމަރީ ކާމިޔާބު ކުރި ނަމަވެސް ފަހުން އިންތިޚާބު ކާމިޔާބެއްނުވިއެވެ.
ސިޔާސީ ދާއިރާގައި މަސައްކަތްކުރުމުގެ ކުރިން ކެރޮލައިން މީޑިއާގައި މަސައްކަތްކުރެއްވިއެވެ. އެގޮތުން ނިއު ހެމްޝަޔާގެ މެންޗެސްޓާގައި ހުންނަ ޑަބްލިއުއެމްޔޫއާރު-ޓީވީގެ ޕްރޮޑިއުސަރެއްގެ އިތުރުން ފޮކްސް ނިއުސް މީޑިއާގެ އިދާރީ އެހީތެރިއެއްގެ އިތުރުން ނިއު ހެމްޝަޔާ ކްރޮނިކަލްގެ އެސޯސިއޭޓް ޕްރޮޑިއުސަރެއްގެ މަގާމު ވެސް އަދާކުރިއެވެ.