އއ. ތޮއްޑޫގައި ގައުމީ ޔުނިވާސިޓީ (އެމްއެންޔޫ)ގެ އެގްރިކަލްޗާ އެންޑް ސައިންސަސް ފެކަލްޓީ ގާއިމުކުރުމަށް 80،000 އަކަފޫޓުގެ ބިމެއް އެ ޔުނިވާސިޓީން ތޮއްޑޫ ކައުންސިލާ ހަވާލުކޮށްފިއެވެ.
އެމްއެންޔޫއިން ބުނި ގޮތުގައި، މި ފެކަލްޓީގައި ހަތަރު ޑިޕާޓްމަންޓެއް ގާއިމުކުރާނެއެވެ. އޭގެތެރޭގައި، ޑިޕާޓްމަންޓް އޮފް ހޯޓިކަލްޗާއާއި ޑިޕާޓްމަންޓް އޮފް ޕްލާންޓް ޕްރޮޖެކްޝަންއާއި ޑިޕާޓްމަންޓް އޮފް ސޮއިލް އެންޑް ވޯޓާ މެނޭޖްމަންޓުގެ އިތުރުން ޑިޕާޓްމަންޓް އޮފް ފުޑް ސައިންސަސް އެންޑް ޓެކޮނޮލޮޖީ ހިމެނެއެވެ.
އެގޮތުން، ކޮންމެ ޑީޕާޓުމަންޓެއްގައި ވެސް ޒަމާނީ ވަސީލަތްތަކާ އެއްކޮށް ޚާއްސަ ލެބޯޓްރީތައް ގާއިމުކުރާނެ ކަމަށާއި އެ ވަސީލަތްތަކުގެ ސަބަބުން ދަރިވަރުންނަށް އަމަލީ ތަޖުރިބާ ލިބި، ދަނޑުވެރިމުގެ ދާއިރާ ތަރައްގީކުރަން ބޭނުންވާ ޒުވާނުން ތައްޔާރު ކުރުމަށް މަގުފަހިވާނެ ކަމަށް އެ ޔުނިވާސިޓީން ބުނެފައިވެއެވެ.
ތޮއްޑޫގައި އެމްއެންޔޫގެ އެގްރިކަލްޗާ އެންޑް ސައިންސަސް ފެކަލްޓީ އަޅަން 80،000 އަކަފޫޓުގެ ބިން ހަވާލުކުރަނީ ---- ފޮޓޯ/ އެމްއެންޔޫ
މީގެއިތުރުން، ފެކަލްޓީ ގާއިމުކުރެވުމާ އެއްކޮށް، ދިވެހިރާއްޖޭގެ ދަނޑުވެރިކަމުގެ ދާއިރާއަށް ޒަމާނީ ޓެކްނޮލޮޖީއާއި އުފެއްދުންތެރި ޚިޔާލުތައް ތައާރަފުވާނެ ކަމަށާއި ގައުމުގެ އިގްތިޞާދަށް އިތުރު ފުރުސަތުތަކެއް ހުޅުވިގެންދާނެ ކަމަށް އެމްއެންޔޫއިން ބުނެފައިވެއެވެ.
އެމްއެންޔޫއިން ބުނީ، ތޮއްޑޫގައި ތިބެގެން މަތީ ތައުލީމު ހާސިލުކުރުމުގެ ފުރުސަތު ލިބުމުން، ވަޒީފާގެ ފުރުސަތުތައް އިތުރުވާނެ ކަމަށެވެ.
ތޮއްޑޫއަކީ ރާއްޖޭގައި އެންމެ ފުޅާ ދާއިރާއެއްގައި ދަނޑުވެރިކަން ކުރާ އެއް ރަށެވެ.
މިފަހުން ވަނީ ފަސްތަރީގެ ޓްރެއިނިން ރިސޯޓްގެ މަސައްކަތް ހުޅިމެންދޫގައި ކުރުމަށް އެމްއެންޔޫއާއި ޓޫރިޒަމް މިނިސްޓްރީ ވެސް އެއްބަސްވުމެއްގައި ސޮއިކޮށްފައެވެ.