"ދާލަން ނޭޝަނަލް ސްކިލްސް އެންޑް ކެރިއާ އެކްސްޕޯ''ގައި ހުންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސްޓޯލްއިން އެ ކުންފުނީގެ ވަޒީފާތަކަށް އެޕްލައި ކުރުމަށް ފުރުސަތު ލިބޭނެ ކަމަށް އެ ކުންފުނިން މިއަދު ބުނެފިއެވެ.
މި އެކްސްޕޯގައި ސަރުކާރުގެ މިނިސްޓްރީތަކާއި އިދާރާތަކާއި އެކި ކުންފުނިތަކުގެ އިތުރުން ޔުނިވާސިޓީތަކާއި، ކޮލެޖްތަކާއި، މަތީ ތައުލީމުދޭ މަރުކަޒުތައް ބައިވެރިވާނެއެވެ. އަދި ކެރިއާ ގައިޑެންސާއި، މަތީ ތަޢުލީމުގެ ފުރުސަތުތަކާއި، ހުނަރު ތަރައްގީކުރުމާ ގުޅޭ ގޮތުން މައުލޫމާތު ފޯރުކޮށްދޭނެއެވެ.
އެމްޓީސީސީން ވަނީ އެކްސްޕޯއާ ގުޅުވައި "ދާލަން ކެރިއާ އެކްސްޕޯ"ގެ ނަމުގައި ކައުންޓްޑައުނެއް ފަށާފައެވެ.
މި އެކްސްޕޯގައި އެމްޓީސީސީގެ ސްޓޯލެއް ހުންނައިރު، އެ ތަނުން 'ހުނަވަރު' ޕްރޮގްރާމާއި ކުންފުނީގެ ވަޒީފާތަކަށް ހުށަހެޅޭނެއެވެ. އެކްސްޕޯ ކުރިއަށްދާނީ މާދަމާއާއި ހޮނިހިރު ދުވަހުގެ ހަވީރު 4:00 ފެށިގެން ރޭގަނޑު 10:00ގެ ނިޔަލަށް ހުޅުމާލޭ ސެންޓްރަލް ޕާކުގައެވެ.
އެހެންވެ، އެމްޓީސީސީން ވަނީ އެ ފުރުސަތުގެ ބޭނުން ހިފައި، އެ ސްޓޯލަށް ޒިޔާރަތްކުރަން އެދިފައެވެ.
މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓްއިން ބާއްވާ މި އެކްސްޕޯގެ ޑިޖިޓަލް ޕާޓްނަރަކަށް ވުމަށް ދިރާގުން ވަނީ ސޮއިކޮށްފައެވެ.