ށ. ފުނަދޫގައި ގުދުރަތީގޮތުން ހެދިފައި އޮންނަ ދައްފަޅުގައި ޓޫރިސްޓް ހޮޓަލަކާއި އީކޯ ޕާކެއް ތަރައްގީކުރުމަށް އެ ރަށު ކައުންސިލުން ނިންމައިފިއެވެ.
ފުނަދޫ ކައުންސިލުން ވަނީ ދައްފަޅުގައި ޓޫރިސްޓް ހޮޓަލަކާއި އަދި އެޓްރެކްޝަން ހިމެނޭގޮތުން އީކޯ ޕާކެއް ތަރައްގީ ކުރުމަށް ސާވޭކުރުމާއިއެކު ޑިޒައިން ކުރާނެ ފަރާތެއް ހޯދުމަށް އިއުލާނުކޮށްފައެވެ.
ކައުންސިލުން ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނުގައި ބުނާގޮތުން މި މަސައްކަތް ކުރުމަށް ޝައުގުވެރިވާ ފަރާތްތަކުން މި މަހުގެ 19ވާ އަންގާރަ ދުވަހުގެ 13:00ގެ ކުރީން ފުނަދޫ ކައުންސިލުގެ އީމެއިލް [email protected] ކުރުމަށްފަހު މި މަހުގެ 24ވާ އާދީތަދުވަހުގެ 13:00 އަށް އެ އިދާރާއަށް އަގު ހުށަހެޅުމަށް ވަނީ އެދިފައެެވެ.
މި މަސައްކަތް ބަޔަކާއި ހަވާލުކުރުމަށް ކައުންސިލުން ނިންމަނީ ކޮންޓްރެކްޓްގައި ސޮއިކުރެވޭ ތާރީހުން ފެށިގެން ހަމަސް ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ފުނަދޫގައި އިންނަ ގުދުރަތީ ދައްފަޅަކީ ރީތިކަމެއް ލިބިފައިވާ ތަނެކެވެ. ކޯރެއް ގޮތަށް އޮންނަ އެ ސަރަހައްދަށް ރާއްޖެއިން ބޭރުން އަންނަ މޫސުމީ ދޫނިތައް ވެސް ހިޖުރަކުރެއެވެ.
އެ ސަރަހައްދުގެ ގުދުރަތީ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް އިސްކަންދީގެން ދައްފަޅު ހިމެނޭ ސަރަޙައްދުގައި އީކޯ ޓޫރިޒަމް ތަރައްޤީ ކުރުމަކީ ރަނގަޅު ނިންމުމެއް ކަމަށް އެރަށުގެ ކައުންސިލުން ދެކެއެވެ.