އެމަނިކުފާނަކީ މަވެތިކަން އިސްކުރައްވައި، ރައްޔިތުން މަތިން ހަނދާން ނައްތާލާނެ ސިޔާސީ ވެރިއެއް ނޫން ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މުއިއްޒު އެފަދައިން ވިދާޅުވީ، ޖުމްހޫރީ ދުވަހުގެ މުނާސަބަތުގައި މިރޭ ދަރުބާރުގޭގައި ބާއްވަމުން އަންނަ ރަސްމީ ޖަލްސާގައި ވާހަކަދައްކަވަމުންނެވެ.
އެ ޖަލްސާގައި ރައީސް ވިދާޅުވީ، އެމަނިކުފާނަށް ނިސްބަތްކޮށް ބައެއް މީހުން އެއީ "ސިޔާސީ މީހެއް" ނޫން ކަމަށް ބުނާ ކަމަށެވެ. ނަމަވެސް، ސިޔާސީ މީހަކަށް ނުވަތަ ވެރިއަކަށް ވުމަކީ އަމިއްލައަށް ބޭނުންވާ ގޮތް އިސްކޮށް، ރައްޔިތުން މަތިން ހަނދާން ނައްތާލުންތޯ ރައީސް ވަނީ އައްސަވައިފައެވެ.
އެހެންކަމަށް ވާނަމަ އެ މަނިކުފާނަކީ އެ ފަަދަ "ސިޔާސީ" ބޭފުޅެއްނޫންކަމަށް ރައީސް ވިދާޅުވިއެވެ.
ސިޔާސީ މީހަކަށް ވުމަކީ ތިމަންނަ ބޭނުންވާ ގޮތް އިސްކޮށް، މަވެތިކަން އިސްކޮށް، ރައްޔިތުން މަތިން ހަނދާން ނައްތާލައި، އޭނަގެ ހުރިހާ މަސްލަހަތެއް އިސްކުރުން ކަމަށްވަންޏާ އަޅުގަނޑު އެކަހަލަ ސިޔާސީ މީހަކަށް ވާކަށް ބޭނުމެއް ނޫން. ފަޚުރުވެރިކަމާ އެކީގައި މިއީ އެކަހަލަ ސިޔާސީ މީހެއް ނޫން
މިގޮތުން، އެމަނިކުފާނަށް ނިންމަވަން އުނދަގޫ އެހެނަސް ރައްޔިތުންނަށް މުހިންމު ބޮޑެތި މައްސަލަތައް ހައްލުކުރަން ޖެހިލުން ވެވަޑައިނުގަންނަވަނީ މަވެތިކަން އިސްނުކުރައްވާތީ ކަމަށް ރައީސް ވިދާޅުވިއެވެ.
އިތުރަށް ވާހަކަދައްކަވަމުން އެމަނިކުފާނު ވިދާޅުވީ، ރާއްޖޭގައި އޮތް ސިޔާސީ ބަދަލުހިފުމުގެ ރޫހު ނައްތާލައްވައިފި ކަމަށާއި ސިޔާސީ ވާދަވެރިން ހިފާ ހައްޔަރުކުރާ ތަން ދެނެއް ނުފެންނާނެ ކަމަށެވެ.
ނަމަވެސް، ނުޙައްގުން ގައުމުގެ މުދާ ހޯދާފައިވާނަމަ، އެކަންކަން ބައްލަވާނެ ކަމަށާއި އެ މައްސަލަތައް ބައްލަވާނީ އޮންނަ އުސޫލުގެ ތެރެއިން ކަން އެމަނިކުފާނު ވަނީ ފާހަގަކުރައްވާފައެވެ.
ޝަރުއީ ދާއިރާއަށް ނުފޫޒު ނުފޯރުވައި، އެމަނިކުފާނު މަސައްކަތް ކުރައްވާނީ އެ ދާއިރާއަށް ބޭނުންވާ ކަންކަން ކޮށްދެއްވައިގެން ނަތީޖާ ނެރެދެއްވުމަށް ކަމަށް ރައީސް މުއިއްޒު ވިދާޅުވެފައިވެއެވެ.