ރިޔާސީ އިންތިޚާބުތަކުގައި ދެވަނަ ބުރަކަށް ނުގޮސް، އެންމެ ބުރަކުން ވެރިޔަކު ކަނޑައެޅޭހެން ވޯޓުލާ ނިޒާމު ބަދަލުކުރުމަށް ބޭނުންފުޅުވާތީ އެ ކަމަށް ޓަކައި ރައްޔިތުންގެ ފެންނަ ނުފެންނަ ވޯޓަކަށް ރައްޔިތުންގެ މަޖިލިސް މެދުވެރިކޮށް އަހާނެކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، ރިޔާސީ އިންތިޚާބުގައި އެމަނިކުފާނުގެ ވިސްނުންފުޅަކީ އެއްބުރުން ވެރިއަކު ކަނޑައެޅުން ކަމަށެވެ.
މިގޮތުން، އެ ނިޒާމަށް އަމަލުކުރުމަށް މިހާރު ވެސް އެޓާނީ ޖެނެރަލް (އޭޖީ) އޮފީހުން ދިރާސާތައް ކުރަމުން އަންނަ ކަމަށާއި އެ ކަމަށް ރައްޔިތުންގެ ވޯޓަކަށް އަހާނެ ކަމަށް ރައީސް ވިދާޅުވިއެވެ.
އެ ނިޒާމަށް ބަދަލުކުރަން ރައްޔިތުން ގަބޫލުކަމަށްވާނަމަ، ރައްޔިތުންގެ މަޖިލީސް މެދުވެރިކޮށް އަންނަ ރިޔާސީ އިންތިޚާބުން ފެށިގެން އެއްބުރުން ވެރިއަކު ހޮވޭ ގޮތަށް ބަދަލު ކުރައްވާނެ ކަން ރައީސް ވަނީ ފާހަގަކުރައްވާފައެވެ.
އެގޮތަށް އެކަން ކުރުމުން ޚަރަދު ވެސް ކުޑަވާނެ ކަމަށް ގަބޫލުކުރައްވާ ކަމަށް ރައީސް ވަނީ ވިދާޅުވެފައެވެ.
އިތުރަށް އެމަނިކުފާނު ވިދާޅުވި ގޮތުގައި، އާބާދީގެ ގޮތުން މިހާ މަދު ގައުމެއްގައި އެންމެ އެދެވޭ ގޮތަކީ ރިޔާސީ އިންތިޚާބާއި ރައްޔިތުންގެ މަޖިލީސް އިންތިޚާބު އެއްކޮށް ބޭއްވުމެވެ.
އެ ދެ އިންތިޚާބާ ދެމެދުގައި އޮންނަނީ ދެ ތިން މަސް ކަމަށްވާއިރު، ދެ އިންތިޚާބު ވަކިކޮށް ބޭއްވުމުން ދައުލަތުން ބޮޑު ޚަރަދެއް ހިނގާ ކަމަށް ރައީސް މުއިއްޒު ވިދާޅުވިއެވެ. ނަމަވެސް، އެކަމުގައި އެމަނިކުފާނު އަމިއްލަފުޅަށް ގޮތެއް ނުނިންމޭނެތީ ރައްޔިތުންގެ ވޯޓަކަށް އަހާނެ ކަމަށް ރައީސް ވިދާޅުވެފައިވެއެވެ.
މީގެ އިތުރުން މި ދައުރު ނިމޭ ދުވަސް ނޮވެމްބަރު 11 އަށް ބަދަލުކުރުމާމެދު ވެސް ރައްޔިތުންގެ ފެންނަ ނުފެންނަ ވޯޓަކަށް ދާނެކަމަށް ރައީސް ވިދާޅުވިއެވެ.
"އެކަމަކު، ޖުމްހޫރީ ދުވަހަކީ ނޮވެމްބަރު 11. އަޅުގަނޑު އަމިއްލަ އަށް ނިންމާލެވޭ ވަރުގެ ކަމެއް ނޫނޭ އެއީ. އެކަމަކު ގާނޫނު އޮތް ގޮތުން، އަދި މި ތިބަ މަޖިލިސް އިއްޒަތްތެރި މެމްބަރުންނަށް ވެސް ނުނިންމެނެއޭ. ރައްޔިތުންގެ ގާތަށް ދާން މި ޖެހެނީ. ރައްޔިތުން ގާތު އަހާލަން އެބަޖެހޭ ފެންނަ ނުފެންނަ ވޯޓަކަށް ޖުމްހޫރީ ދުވަސް، މާނައަކީ މި ދައުރު ނިމޭ ދުވަސް 2028 ގެ ނޮވެމްބަރު 11 އަށް ބަދަލުކުރަން. ހަފުތާއެއް ކުރުވުން. ރައްޔިތުން އެގޮތަށް ރުހެންތޯ އަޅުގަނޑު އަހާލާނަން ރައްޔިތުންގެ ގާތު" ރައީސް ވިދާޅުވިއެވެ.
މި ދައުރު ނިމޭ ދުވަހަކީ 11 ނޮވެންބަރު 2028 އަށް ބަދަލު ކުރަން ރައްޔިތުންގެ ފެންނަ ނުފެންނަ ވޯޓަކަށް އައްސަވާނެ ކަމަށް އެމަނިކުފާނު ވިދާޅުވިއެވެ.
އެފަދައިން ރައްޔިތުން އެއްބަސްވެއްޖެ ނަމަ، ގާނޫނަށް ބަދަލުތައް ގެންނަން މަޖިލީހަށް ހުށަހަޅުއްވާނެ ކަމަށް ވެސް ވިދާޅުވިއެވެ.