ޔުއޭފާ ޔޫރޮޕާ ލީގުގެ ލީގު ފޭސްގައި ޓާކިޝް ސުޕާ ލީގްގެ ގަލަތަސަރާއީ އާއި އިންގްލިޝް ޕްރިމިއާ ލީގުގެ ޓޮޓްނަމް ހޮޓްސްޕާ ބައްދަލުކުރި މެޗު ގަލަތަސަރާއީއިން ކާމިޔާބުކޮށްފިއެވެ.
ގަލަތަސަރާއީގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ތިން ލަނޑު ދެ ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ގަލަތަސަރާއީއިންނެވެ.
މިމެޗުގައި ގަލަތަސަރާއީއިން ކާމިޔާބު ކުރި ތިން ލަނޑުވެސް ޖަހާފައިވަނީ ފުރަތަަމަ ހާފުގައެވެ. އަދި ގަލަތަސަރާއީއިން މިމެޗު ފަށާފައިވަނީ ވަރަށް ފޯރީގައެވެ. މިގޮތުން މެޗުގެ ހަ ވަނަ މިނެޓުގައި އުފެއްދި ހަމަލާއެއްގައި އެޓީމުންވަނީ މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ ޔޫނުސް އަކްގުންއެވެ. ނަމަވެސް މިލަނޑު ޖެހިތާ 14 މިނެޓް ފަހުން ސްޕާސްއިން ވަނީ މެޗުގެ ނަތީޖާ ހަމަހަމަ ކޮށްފައެވެ. މިލަނޑު އެޓީމަށް ކާމިޔާބު ކޮށްދިނީ ޒުވާން ފޯވަޑް ވިލް ލެންކްޝެއާއެވެ.
މިމެޗުގައި ދެވަނަ ފަހަރަށް ގަލަތަސަރާއީއިން މެޗުގެ ލީޑު ނަގާފައިވަނީ 31 ވަނަ މިނެޓުގައި ޑުރައިސް މާޓެންސް ތަނަވަސްކޮށްދިން ފުރުސަތެއްގައި ވިކްޓާ އޮސިމްހޭންއެެވެ. އަދި މިލަނޑު ޖެހިތާ އަށް މިނެޓް ފަހުން ގަލަތަސަރާއީގެ ތިންވަނަ ލަނޑުވެސް އޮސިމްހޭން ޖަހާފައިވަނީ މާޓެންސް ތަނަވަސްކޮށްދިން ފުރުސަތެއްގައެވެ. މިލަނޑާއެކު ފުރަތަމަ ހާފު ނިމުނީ ތިން ލަނޑު އެއް ލަނޑުން ގަލަތަސަރާއީ ކުރީގައި އޮވެގެންނެވެ.
މިމެޗުގެ ދެވަނަ ހާފަށް ސްޕާސްއިން ނުކުތީ އެޓީމުގެ ކުޅުން ރަނގަޅުކޮށް މެޗުން ނަތީޖާ އެއް ނެރުމުގެ އުންމީދުގައެވެ. ނަމަވެސް އެޓީމުން ކުރަމުންދިޔަ މަސައްކަތަށް އިތުރަށް ހުރަސް އެޅުނީ މެޗުގެ 60 ވަނަ މިނެޓުގައި އެޓީމުގެ ހަމައެކަނި ލަނޑު ކާމިޔާބު ކޮށްދިން ލެންކްޝެއާއަށް ދެވަނަ ރީނދޫ ކާޑާއެކު ރަތްކާޑު ދެއްކުމުންނެވެ. މިއާއެކު މެޗުގެ ބާކީ ބައި އެޓީމުން ކުޅެފައިވަނީ އެއް ކުޅުންތެރިއެއް މަދުކޮށެވެ.
މިމެޗުގައި ސްޕާސްއިން ކާމިޔާބުކުރި ދެ ވަނަ ލަނޑު މެޗުގެ 69 ވަނަ މިނެޓުގައި ކާމިޔާބު ކޮށްދިނީ ޑޮމިނިކް ސޮލަންކީއެވެ. ނަމަވެސް މިފަހަރުގެ މުބާރާތުގައި މޮޅު ކުޅުމެއް މިހާތަނަށް ދައްކަމުންދިޔަ ސްޕާސްއަށް މެޗުގެ ނަތީޖާ ހަމަހަމަ ކުރެވޭގޮތެއްނުވިއެވެ. އަދި މިމެޗު ތިން ލަނޑު ދެ ލަނޑުގެ ކުޑަ ތަފާތަކުން ގަލަތަސަރާއީއަށް މެޗު ކާމިޔާބުވި ނަމަވެސް އެޓީމަށްވަނީ ބޮޑު ތަފާތަކުން މިމެޗު ކާމިޔާބު ކުރެވޭ ވަރަށް ލަނޑު ޖަހާނެ ރަނގަޅު ފުރުސަތު ލިބިފައެވެ.
މިކާމިޔާބީއާއެކު ގަލަތަސަރާއީ މިހާރުވަނީ ކުޅުނު ހަތަރު މެޗުން ލިބިފައިވާ 10 ޕޮއިންޓާއެކު ތާވަލްގެ ތިންވަނައަށް ކުރިއަށް ޖެހިލާފައެވެ. އަދި ސްޕާސް އުޅެނީ ނުވަ ޕޮއިންޓާއެކު ތާވަލްގެ ހަތް ވަނައިގައެވެ. މިމުބާރާތުގައި ލެޓްވިއަސް ހަޔާ ލީގުގެ އާރްއެފްއެސް އާއި ބެލްޖިއަމް ޕްރޯ ލީގުގެ އެންޑަލެކްޓް ބައްދަލުކުރި މެޗު އެއް ލަނޑު އެއް ލަނޑުން ވީ އެއްވަރެވެ. މިމެޗުގެ ލީޑު 85 ވަނަ މިނެޓުގައި މާރިއޯ ސްޓްރޮއިކެންސް ކާމިޔާބު ކޮށްދިން ލަނޑުން އެންޑަލެކްޓް ނެގި ނަމަވެސް އާރްއެފްއެސް އިން ވަނީ މެޗުގެ އިތުރު ވަގުތުގެ ހަ ވަނަ މިނެޓުގައި އެންޑެލެކްޓްގެ މޫސާ އެން ޑިއާއޭ އަތުން ބައިކޮޅަށް ވަން ލަނޑަކާއެކު މެޗުގެ ނަތީޖާ ހަމަހަމަ ކޮށްފައެވެ.
މިމެޗު އެއްވަރު ވުމާއެކު އެންޑަލެކްޓް މިހާރު އުޅެނީ 10 ޕޮއިންޓާއެކު ތާވަލްގެ ފަސް ވަނައިގައެވެ. އަދި އާރްއެފްއެސް އުޅެނީ ދެ ޕޮއިންޓާއެކު ތާވަލްގެ 32 ވަނައިގައެވެ.