އެމެރިކާގެ ރިޔާސީ އިންތިޚާބު ކާމިޔާބު ކުރެއްވި ޑޮނަލްޑް ޓްރަމްޕަށް ސުލްހަވެރިކަމާއެކު، އެކަން އޮންނަ އުސޫލުގެ މަތިން ވެރިކަން ހަވާލުކޮށްދެއްވާނެ ކަމަށް މިހާރުގެ ރައީސް ޖޯ ބައިޑަން ވިދާޅުވެއްޖެއެވެ.
ވައިޓް ހައުސްގެ ރޯޒް ގާޑަންގައި ބުރާސްފަތި ދުވަހު ދެއްވި ހަތް މިނެޓުގެ ކުރު ތަގުރީރެއްގައި ބައިޑަން ވިދާޅުވީ ގައުމުގެ ރައީސްގެ ހައިސިއްޔަތުން އަދާކުރަން ޖެހޭ ޒިންމާތައް އަދާކުރައްވާނެ ކަމަށާއި އެގޮތުން އަންނަ ޖެނުއަރީ 20 ވަނަ ދުވަހު ސުލްހަވެރިކަމާއެކު ވެރިކަން ބަދަލުކުރެވޭނެ ކަމަށެވެ.
ބައިޑަން ވަނީ، ގައުމުގެ ރައްޔިތުންގެ ނިންމުން ސަރުކާރުން ބަލައިގަންނަ ކަމަށް ވިދާޅުވެ ޓްރަމްޕަށް މަރުހަބާ ވިދާޅުވެފައެވެ. އަދި ޑިމޮކްރެޓިކް ޕާޓީގެ ކެންޑިޑޭޓް އަދި ނައިބު ރައީސް ކަމަލާ ހެރިސް ކުރެއްވި މަސައްކަތަށް ބައިޑަން ޝުކުރުވެސް އަދާކުރެއްވިއެވެ.
ބައިޑަން ވަނީ ބުދަ ދުވަހު ޓްރަމްޕަށް ފޯނުން ގުޅުއްވައި ވެސް ސުލްހަވެރިކޮށް ވެރިކަން ބަދަލުކުރެވޭނެ ކަމަށް ވިދާޅުވެފައެވެ. އަދި ބައިޑަން ވަނީ ވައިޓް ހައުސްގައި ބާއްވާ ބައްދަލުވުމަކަށް ޓްރަމްޕަށް ދައުވަތު ވެސް އަރުވައިފައެވެ.
އަންގާރަ ދުވަހުގެ އިންތިޚާބުން ހެރިސް ނާކާމިޔާބުވުމުގެ ނަތީޖާ ނަންގަވަން ޖެހޭނީ ބައިޑަން ޑިމޮކެރެޓިކް ޕާޓީގެ ބައެއް މެމްބަރުން އަންނަނީ ބުނަމުންނެވެ.
އެ މެމްބަރުން ބުނަނީ ބައިޑަން ރިޔާސީ ރޭހުން ވަކިވެވަޑައިގަންނަވަން ނިންމެވި ނިންމެވުން އަވަސްކުރެއްވިނަމަ، ހެރިސްއަށް ކާމިޔާބުވުމުގެ ފުރުސަތު ބޮޑުވީސް ކަމަށެވެ.
ޑިމޮކްރެޓިކް ޕާޓީގެ މިއަހަރުގެ ފުރަތަމަ ރިޔާސީ ކެންޑިޑޭޓް ބައިޑަން ރޭހުން ވަކިވެވަޑަައިގެން، ހެރިސްއަށް ތާއިދު ކުރައްވާކަން އިއުލާން ކުރެއްވީ މިދިޔަ ޖުލައި މަހުގެ 21ގައެވެ. އެއީ އެ ޕާޓީގެ އިސް ފަރާތްތަކު ވެސް ބައިޑަންގެ ކެންޑިޑެސީއާ ދެކޮޅުކަން ހާމަކުރި ފަހުން ކަމަށް ރިޕޯޓުތަކުގައިވެއެވެ.