ގޫގުލްއިން އެންޑްރޮއިޑް ޓީވީ 15 ދޫކޮށްލައި، އެންޑްރޮއިޑް ޓީވީ 16 ނެރެން ނިންމައިފިއެވެ.
ބިޔަ ޓެކްނޮލޮޖީ ކުންފުނި ގޫގުލްއިން ސްމާޓް ޓީވީތަކަށް ޚާއްޞަކޮށްގެން ތައްޔާރުކޮށްފައިވާ އެންޑްރޮއިޑް އޮޕަރޭޓިން ސިސްޓަމްގެ އަޕްޑޭޓް ނެރުމުގެ ތާވަލަށް ވަނީ ބޮޑު ބަދަލެއް ގެންނަން ނިންމައިފައެވެ.
މިގޮތުން އަހަރަކު އެއް ފަހަރު އަޕްޑޭޓް ނެރުމުގެ ބަދަލުގައި ދެ އަހަރަކުން އެއް ފަހަރު އަޕްޑޭޓް ނެރުމަށް މިހާރު އެ ކުންފުނިން ވަނީ ނިންމާފައެވެ.
އެންޑްރޮއިޑް އޮތޯރިޓީގެ ވެރިޔާ މިޝާލް ރަހްމާން ހާމަކުރި ގޮތުގައި މި ބަދަލު ގެނައުމަށް ގޫގުލްއިން ނިންމާފައިވަނީ އެންޑްރޮއިޑް ޓީވީގެ ޕާޓްނަރުންނާ އެކު ބޭއްވި ކޮންފަރެންސެއްގައެވެ. މި ބަދަލާ ގުޅިގެން އެންޑްރޮއިޑް ޓީވީ 15 ނުނެރެ، ސީދާ އެންޑްރޮއިޑް ޓީވީ 16 އަށް ދިޔުމުގެ ފުރުޞަތު އޮތްކަމަށް ވެސް ރަހްމާން ފާހަގަކުރިއެވެ.
މި މައުލޫމާތު މީޑިއާތަކަށް ތިލަވި ނަމަވެސް މިކަމާ ގުޅިގެން ގޫގުލްއިން އެއްވެސް ރަސްމީ ބަޔާނެއް ނެރެފައެއް ނުވެއެވެ. ނަމަވެސް، މީގެ ކުރިން ވެސް ގޫގުލްއިން ވަނީ އެންޑްރޮއިޑް ޓީވީ 13 ނުނެރެ، ސީދާ އެންޑްރޮއިޑް ޓީވީ 14 ނެރެފައެވެ.
މި އަހަރުގެ ކުރީކޮޅު ނެރުނު އެންޑްރޮއިޑް ޓީވީ 14 ގައި ޕިކްޗާ-އިން-ޕިކްޗާ މޯޑާއި، އެކި ބާވަތުގެ އެނާޖީ މޯޑްތަކާއި، އޭއައިއަށް ބިނާކޮށް ޕާސަނަލައިޒްކުރެވޭ ތަފުސީލުތަކާއި ކުލަ އިސްލާހުކުރުން ފަދަ އެކްސެސިބިލިޓީ ފީޗާތައް ހިމެނިއެވެ.
މި ބަދަލާ ގުޅިގެން އެންޑްރޮއިޑް ޓީވީ 16 ނެރޭނީ 2026 ވަނަ އަހަރު ކަމަށް އެނަލިސްޓުން ލަފާކުރެއެވެ. މިއީ ދެ އަހަރުން އެއް ފަހަރު އަޕްޑޭޓް ނެރުމުގެ އާ ތާވަލާ އެއްގޮތަށް ކަމަށް ބެލެވެއެވެ.
އެންޑްރޮއިޑް ޓީވީ 16 ގައި ހިމެނޭނެ އާ ފީޗާތަކާ ބެހޭގޮތުން މާ ގިނަ މައުލޫމާތެއް ލިބިފައިނުވި ނަމަވެސް، ގޫގުލްއިން މިހާރު ވެސް އެންޑްރޮއިޑް ޓީވީ 16 އަށް އާ ސިސްޓަމް އޭޕީއައިތަކެއް ޓެސްޓްކުރަމުންދާކަމަށް ރިޕޯޓުގައި ބުނެފައިވެއެވެ.