ރައީސް ޑރ. މުހައްމަދު މުއިއްޒު ވަނީ ނެޝަނަލް ސާވިސް ޕްރޮގްރާމެއް އިއުލާނުކުރައްވާފައެވެ. އެ ޕްރޮގްރާމްގެ ތެރެއިން ފަސް އަހަރުން ޖުމުލަ 1،000 ފުލުހުންނާއި ކޮންމެ އަހަރަކު 1،000 ސިފައިން ތަމުރީނުކުރަން އެ މަނިކުފާނު ވަނީ އަމާޒު ކަނޑައަޅުއްވައިފައެވެ.
އެ މަނިކުފާނު ވިދާޅުވީ އެ ކަމަށް ކޮންމެ އަހަރަކު ވެސް 400 މިލިއަން ރުފިޔާ ޚާއްސަކުރައްވާނެ ކަމަށެވެ.
މި ޕްރޮގްރާމާ ގުޅޭ މާ ބޮޑު ތަފުސީލުތަކެއް ރައީސް މުއިއްޒު ހިއްސާނުކުރެއްވި ނަމަވެސް، މިކަން ކުރާނީ ގާނޫނަކުން ބާރު ލިބިގެން ކަމަށް ވިދާޅުވިއެވެ. އެ ކަމާ ގުޅިގެން އެއްބައި ބޭފުޅުން ކަންބޮޑުވުން ފާޅުކުރައްވާއިރު، އަނެއް ބަޔަކަށް މިއީ ހަމަ ރަނގަޅު ކަމެކެވެ.
ސަން އެޑިޓާސް ޓޯކްގެ މި ހަފުތާގެ ޕޮޑްކާސްޓްގައި ޑެޕިއުޓީ މެނޭޖިން އެޑިޓަރު އަހުމަދު އިނާހު ވިދާޅުވީ، މި ކަން ކުރާއިރުގައި ވިސްނާލަންޖެހޭ ބައިވަރު ކަންކަން އެބަހުރި ކަމަށެވެ. އެ ގޮތުން، ރާއްޖެއަށް ކުއްލިއަކަށް އެއް ފަހަރާ މާ ގިނަ ސިފައިން ބޭނުންވަނީތޯ އޭނާ ސުވާލު އުފެއްދެވިއެވެ.
މަހެއްގެ މައްޗަށް ފުލުހުންނާއި ސިފައިންނަށް މިހާރު ވެސް ދައުލަތުގެ ބަޖެޓުން ކުރާ ހޭދަ ފާހަގަކުރައްވައި އޭނާ ވިދާޅުވީ، އެ ތަންތަނަށް ވަޒީފާއަށްދާން މަޖުބޫރު ނުކުރި ނަމަވެސް ދާނެ ކަމަށެވެ. އެ ގޮތުން، ބޭސް ފަރުވާއާއި ބޯހިޔާވަހިކަމާއި އެ ނޫން ވެސް ކަންކަން ފުލުހުންނާއި ސިފައިންނަށް އާންމު މުވައްޒަފުންނަށް ވުރެ މާ ފަހިކަން އޭނާ ފާހަގަކުރެއްވިއެވެ.
އޭގެ ބަދަލުގައި ރާއްޖޭގައި ދިވެހިން މަދު ސިނާއަތްތަކުގެ ވަޒީފާ އިތުރުކުރަން ނުވަތަ ކިޔަވާ ކުދިންނަށް އިތުރު ފަހި ފުރުސަތުތައް ހޯދައިދޭން މަސައްކަތްކުރުމުގެ މުހިންމުކަން އިނާހު ފާހަގަކުރެއްވިއެވެ.
ޕޮޑްކާސްޓްގައި ވާހަކަދައްކަވަމުން މަލްޓިމީޑިއާ އެޑިޓަރު މުހައްމަދު ނާއިލް ހަފީޒް ވިދާޅުވީ، ދަށް ކުދިންގެ ގޮތުގައި މާނަކުރަނީ ކޮން ކުދިންނެއްތޯ ވެސް ވިސްނާލަން ޖެހޭ ކަމަށެވެ.
އޭނާ ވިދާޅުވީ، ސްކޫލުގެ ނަތީޖާ ދަށް ނަމަވެސް، އެ ކުދިންނަށް ކޭކު ފިހުން ނުވަތަ އެ ނޫން ވެސް ކަމެއްގައި ވަރަށް ހުނަރުވެރި ކުއްޖަކަށް ވެދާނެ ކަމަށެވެ. އެހެންވެ، ސަރުކާރުގެ ވިސްނުމަކަށް ވާންވާނީ އެ ހުނަރުތައް ކުރިއަރުވަން އެހީވުން ކަމަށް އޭނާ ފާހަގަކުރެއްވިއެވެ.
ނާއިލް ވިދާޅުވީ، ކުދިންތަކެއް ސިފައިންގެއަށް ވައްދަން މަޖުބޫރުކުރުވުމަކީ އެންމެ ރަނގަޅު ގޮތެއް ކަމުގައި ނުދެކޭ ކަމަށާއި މަޖުބޫރު ނުކޮށް، އެ ކަންކަން ކުރެވޭނެ އެތައް ގޮތެއް އެބަހުރި ކަމަށެވެ.
މި މައުޞޫއުގައި މި ނޫން ވެސް އެތައް ވާހަކައެއް މި ޕޮޑްކާސްޓްގައި ވަނީ ދައްކާފައެވެ. މުޅި ޕޮޑްކާސްޓް އައްސަވާލައްވާށެވެ.