މަޝްހޫރު ވިޔަފާރިވެރިޔާ އަދި ސިޔާސީ ޝަހުސިއްޔަތު މުޙައްމަދު ޔޫސުފް (ކުވާ މޮހޮދޭ) މިއަދު ނިޔާވެއްޖެއެވެ.
މުޙައްމަދު ޔޫސުފްގެ ބޭފުޅެއް ކަމަށްވާ، ކަސްޓަމްސްގެ ކުރީގެ ކޮމިޝަނާ ޖެނެރަލް ޔޫސުފް މާނިއު އެކްސްގައި ވިދާޅުވީ އޭނާ އަވަހާރަވީ މެންދުރު ކަމަށެވެ. އަދި ޖަނާޒާ އޮންނަނީ އިޝާ ނަމާދަށް ފަހު އިސްލާމީ މަރުކަޒުގައި ކަމަށް އޭނާ ވިދާޅުވިއެވެ.
މުޙައްމަދު ޔޫސުފަކީ މަތީ ތައުލީމާ ބެހޭ ވަޒީރު މަރްޔަމް މާރިޔާގެ ވެސް ބައްޕައެވެ.
ރައީސް ޑރ. މުޙައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވަނީ، އޭނާ އަވަހާރަވި ޚަބަރު އަޑުއެއްސެވީ ފުން ހިތާމައާއެކު ކަމަށް ވިދާޅުވެފައެވެ.
މުޙައްމަދު ޔޫސުފަކީ ވިޔަފާރީގެ ދާއިރާއިން ބޮޑެތި ޚިދުމަތްތަކެއް ގައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވާފައިވާ އިޙްސާންތެރިއެއްގެ ގޮތުގައި ރައީސް ސިފަކުރެއްވިއެވެ.
"ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެކެވެ. ޚިދުމަތްތެރި ދަރީންތަކެއްގެ ބައްޕައެކެވެ." ރައީސް ވިދާޅުވިއެވެ.
މުޙައްމަދު ޔޫސުފް ވިޔަފާރިވެރިއެއްގެ ގޮތުގައި މަޝްހޫރުވީ ކުރީގެ ރައީސް އިބްރާހީމް ނާސިރުގެ ވެރިކަމުގައި ކަމަށްވާއިރު، އޭނާ ނާސިރުގެ ގާތް ބޭފުޅެއްގެ ގޮތުގައި ވެރިކަމަށް ފަހު ވެސް ހުންނެވިއެވެ.