ސައުދީ އަރަބިއާގެ ވެރިރަށް ރިޔާދުގައި މިހާރު ކުރިއަށްދާ ޑަބްލިޔުޓީއޭ ފައިނަލްސްގެ އޮރެންޖް ގްރޫޕްގައި ދެވަނައަށް ސީޑު ކުރެވިފައިވާ ޕޯލަންޑްގެ އީގާ ޝްވާޓެކް ބަލިކޮށް ތިންވަނައަށް ސީޑު ކުރެވިފައިވާ އެމެރިކާގެ ކޯކޯ ގައުފް ސެމީފައިނަލުން ޖާގަ ހޯދައިފިއެވެ.
މިމުބާރާތުގެ ސެމީފައިނަލްގެ ޖާގައެއް ގައުކް ކަށަވަރު ކޮށްފައިވަނީ ޝްވާޓެކްއާ ބައްދަލުކުރި މެޗު ސިދާ ދެ ސެޓުން ކާމިޔާބު ކޮށްގެންނެވެ. މިމެޗުގެ ފުރަތަމަ ސެޓު ހައެއް ތިނަކުން ކާމިޔާބުކުރިއިރު ދެވަނަ ސެޓު ގައުފް ކާމިޔާބު ކޮށްފައިވަނީ ހައެއް ހަތަރަކުންނެވެ. މިއީ ގައުފްއާއި ޝްވާޓެކް މިހާތަނަށް ބައްދަލުކުރި 13 ފަހަރުގެ ތެރެއިން ގައުފްއަށް ކާމިޔާބީ ހޯދުނު ދެވަނަ ފަހަރެވެ.
މެޗަށްފަހު ވާހަކަ ދައްކަމުން ގައުފް ވަނީ މިކާމިޔާބީ ލިބުމުން އުފާވާކަން ހާމަކޮށްފައެވެ. އަދި ދެ ކުޅުންތެރިންގެ މެދުގައި ކުޅުނު ގިނަ މެޗުތަކުން ބަލިވެފައިވީ ނަމަވެސް މިމެޗަށް ނުކުތްއިރު އޭނާ އަމިއްލަ ނަފުސަށް އޮތް އިތުބާރު ބޮޑު ކަމަށާއި އެހެން ކަމުން ކާމިޔާބީ ލިބޭނެކަމަަށް ކުރިންވެސް އުންމީދު ކުރެވުނު ކަމަށް ބުންޏެވެ.
ގިނަ ދުވަސްތަކެއް ކުޅުމާ ދުރުގައި ހުރުމަށްފަހު ޝްވާޓެކް ކުޅޭ ފުރަތަމަ މުބާރާތުގެ މިމެޗުގައި އޭނާގެ މޮޅު ކުޅުން ދެއްކޭ ގޮތެއްނުވިއެވެ. މިމެޗު ޝްވާޓެކްއަށް ގެއްލުމާއެކު މިސީޒަން ނިމޭއިރު ދުނިޔޭގެ ރެންކިންގެ އެއްވަނައިގައި އުޅޭނީ ބެލަރޫސްގެ އަރީނާ ސަބަލެންކާކަންވެސް ވަނީ ޔަގީންވެފައެވެ.
މިގްރޫޕްގައި ދެން ހިމޭނޭ ދެ ކުޅުންތެރިންކަމަށްވާ ހަވަނައަށް ސީޑު ކުރެވިފައިވާ އެމެރިކާގެ ޖެސިކާ ޕެގޫލާ އާއި އަށްވަނައަށް ސީޑު ކުރެވިފައިވާ ޗެކް ރިޕަބްލިކްގެ ބާބޮރާ ކްރެއިޗިކޯވާ ބައްދަލުކުރި މެޗު ސީދާ ދެސެޓުން ކާމިޔާބު ކޮށްފައިވަނީ ކްރެއިޗިކޯވާއެވެ. މިމެޗުގެ ސެޓުތައް އޭނާ ކާމިޔާބު ކޮށްފައިވަނީ ހައެއް ތިނެއް އަދި ހައެއް ތިނަކުންނެވެ. މިމެޗުން ބަލިވުމާއެކު ޕެގޫލާ މިހާރު މިވަނީ ދެ މެޗުން ބަލިވެ މިމުބާރާތުން ކަޓާފައެވެ. އަދި މިގްރޫޕުން ސެމީފައިނަލަށް ދާނެ ދެވަނަ ކުޅުންތެރިއަކަށް ވުމުގެ ފުރުސަތު ޝްވާޓެކް އާއި ކްރެއިޗިކޯވާއަށްވެސް އެބައޮތެވެ.