މާލެއާއި ވިލިމާލޭގެ މަގު ހެދުމުގެ މަޝްރޫއުގެ ފީސިބިލިޓީ ސްޓަޑީ ހެދުމަށް ޗައިނާ ސަރުކާރުން އެކުލަވާލި މާހިރުންގެ ޓީމު ރާއްޖެ އައިސް، ފީސިބިލިޓީ ސްޓަޑީގެ މަސައްކަތް މިއަދު ފަށައިފިއެވެ.
އިންފްރާސްޓްރަކްޗާ މިނިސްޓްރީން ބުނީ، އެ ޓީމު ރާއްޖެ އައިސްފައިވަނީ މިދިޔަ އާދިއްތަ ދުވަހު ކަމަށެވެ.
އެކްސްގައި ކުރި ޕޯސްޓެއްގައި އިންފްރާސްޓްރަކްޗާ މިނިސްޓްރީން ބުނީ މިއަދު އެ މިނިސްޓްރީން ވަނީ އެ ޓީމާއެކު އިންޓްރޮޑަކްޓަރީ ސެޝަނެއް ކުރިއަށް ގެންގޮސްފައި ކަމަށެވެ. އެ ސެޝަންގައި މިނިސްޓްރީގެ ސްޓޭޓް މިނިސްޓަރު އިބްރާހިމް ތޮއާމް މުހައްމަދާއި މިނިސްޓްރީގެ ޓެކްނިކަލް ޓީމުން ވަނީ ބައިވެރިވެފައިވެއެވެ.
ޗައިނާގެ އެކްސްޕާޓް ޓީމުން ސްޓޭކްހޯލްޑަރުންގެ ކޮންސަލްޓޭޝަނެއް ބާއްވަން ވަނީ ހަމަޖެހިފައެވެ. އަދި, ސައިޓް ސާވޭއާއި ޑޭޓާ އެއްކުރުމުގެ މަސައްކަތް މިއަދުން ފެށިގެން މި މަހުގެ 21 ވަނަ ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ ކަމަށް އެ މިނިސްޓްރީން ބުންޏެވެ.
މި މަޝްރޫއުގެ ޑިޒައިނާއި ޕްލޭނިން މަސައްކަތްތަކުގެ މައްޗަށް އެ ޓީމުން ހަދާ ފީސިބިލިޓީ ސްޓަޑީއަކީ ޗައިނާ އެއިޑްގެ އެހީގައި ކުރާ މަސައްކަތެކެވެ.
ވިލިމާލޭގެ މަގުތައް ހެދުމަށް ބޭނުންވާ ސާވޭތަކާއި އިއައިއޭ ހެދުމުގެ މަސައްކަތް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އާރުޑީސި)އާ އިންފްރާސްޓްރަކްޗާ މިނިސްޓްރީން ހަވާލުކުރީ މި އަހަރުގެ ޖެނުއަރީ މަހެވެ.
އާރުޑީސީއާ ހަވާލުކުރެވުނު ސާވޭތަކާއި އީއައިއޭ މަސައްކަތުގެ ބޭނުމަކީ ވިލިމާލޭގެ މަގުތަކުގެ ހާލަތާއި، މަގު ހެދުމަށް ހިނގާނެ ޚަރަދު ދެނެގަތުން ކަމަށް އެ މިނިސްޓްރީން އޭރު ބުންޏެވެ. އެ ކޮންޓްރެކްޓުގެ އަގަކީ 1.79 މިލިއަން ރުފިޔާއެވެ.