ރާއްޖޭގެ މިނިވަންކަމާއި ސުލްހައަށް ނުރައްކާވެދާނެ އެންމެހާ ކަންކަމުން ގައުމު ދިފާއުކުރުމަށް ޓަކައި ކުރަންޖެހޭ ކޮންމެ މަސައްކަތެއް ކުރުމުގެ އަޒުމުގައި ރައްޔިތުން ސާބިތުވެތިވުމަށް އެމްޑީއޭގެ ރައީސް އަހްމަދު ސިޔާމް މުޙައްމަދު ގޮވައިލައްވައިފިއެވެ.
ނަސްރުގެ ދުވަހުގެ މުނާސަބާއާ ގުޅިގެން އެ މަނިކުފާނު ދެއްވި ޚިޠާބުގައި ވިދާޅުވީ ނޮވެމްބަރު ތިނެއްގެ އުދުވާނީ ހަމަލައަކީ ފަހުގެ ތާރީޚެއްގައި ރާއްޖެއަށް ދިން އެންމެ ނުރައްކާތެރި ހަމަލާކަމަށެވެ.
ދިވެހީންގެ މަދުބަޔަކު އަޑީގައި ތިބެ، ޓެރަރިސްޓު ޖަމާއަތެއް މެދުވެރިކޮށް ރާއްޖެއަށް ދިން މި ހަމަލާގެ ހަނދާންތައް ދިވެހީންގެ ހިތްތަކުން ދުވަހަކު ވެސް ފިލައިގެން ނުދާނެކަމަށް ސިޔާމް ވިދާޅުވިއެވެ.
އެއާއެކު ސިޔާމް ވަނީ އެ ދުވަހު ގައުމުގެ ދިފާއުގައި ޖިހާދުކުރައްވައި ޝަހީދުވެވަޑައިގެންނެވި ބޭފުޅުންގެ ފުރާނައަށް ސުވަރުގޭގެ ނިއުމަތް މިންވަރުކުރެއްވުން އެދި ދުއާކުރައްވައިފައެވެ.
ސިޔާމް ވިދާޅުވީ އެ އުދުވާނީ ހަމަލާގެ ފަހަަތުގައި ދިވެހީން ތިބިކަމީ ހިތާމަވެރި ހަގީގަތް ކަމަށެވެ. ނަވާރަ ދިވެހީން ޝަހީދުވި އެ ހާދިސާއަކީ ގިނަ ފިލާވަޅުތަކެއް ލިއްބައިދިން ހާދިސާއެއްކަމަށެވެ. އެ ހަމަލައިން އެނގެނީ ވެރިކަމުގެ ދަހިވެތިކަމުގައި އެއްވެސް ކަމަކަށް ފަސްނުޖެހޭ ޚާއިނުން ރާއްޖޭގައި ތިބިކަން ކަމަށް ވިދާޅުވިއެވެ. އެއީ ތާރީޚުން ވެސް އެނގޭ ކަމެއްކަން ވިދާޅުވިއެވެ.
އެއާއެކު އެ މަނިކުފާނު ވަނީ އެ ފަދަ ނުރައްކާތެރި ހަމަލަތައް ކޮންމެ ވަގުތެއްގައި ވެސް އަތުވެދާނެކަމަށް ވިސްނައި އަބަދުވެސް ވިސްނުންތެރިކަމާއެކު ތައްޔާރީ ހާލަތުގައި ތިބުމަށް ވެސް ކަމާ ގުޅޭ އިދާރާތަކަށް ގޮވައިލައްވައިފައެވެ.
މީގެ އިތުރުން ކޮންމެ ދިވެއްސަކީ ވެސް ގައުމަށް ވަފާތެރި، ގައުމުގެ މަސްލަހަތު އިސްކުރާ ރައްޔިތަކަށްވުމަށް ވެސް އެދިވަޑައިގަތެވެ.