ބޮލީވުޑްގެ މަޝްހޫރު ފިލްމީ ތަރިން ކަމަށްވާ ވަރުން ދަވަންގެ ދަރިފުޅުގެ ނަން އާއްމު ކުރިތާ އެއް ދުވަސް ފަހުން ބަތަލާ ދީޕިކާގެ ދަރިފުޅުގެ ނަންވެސް އާއްމުކޮށްފިއެވެ.
ވަރުން ދަވަން އާއި ނަތާޝާ ދަލާލްގެ ދަރިފުޅުގެ ނަމަކީ "ލާރާ" ކަމަށް ދެމަފިރިން އިއުލާނު ކުރިއިރު ބަތަލާ ދީޕިކާ އާއި ރަންވީރު ސިންގްގެ އަލަތު ދަރިފުޅުގެ ނަމަކީ "ދުޢާ" ކަމަށް ދެމަފިރިން ވަނީ އިއްޔެ ބުނެފައެވެ.
ފާހަގަ ކޮށްލެވޭ ކަމަކީ ވަރުން އާއި ދީޕިކާގެ ދެމަފިރިން ވެސް އަލަތު ދަރިފުޅުގެ ނަންތައް އާއްމުކޮށްފައި ވަނީ އިންޑިއާގައި ގިނަ ބަޔަކު ފާހަގަ ކުރާ ދިވާލީ މުނާސަބާއާ ގުޅުވައިގެންކަމެވެ.
ދަރިފުޅުގެ މޫނު ނުފެންނަ ގޮތަށް މިހާތަނަށް ޕޯސްޓުކުރި ފުރަތަމަ ފޮޓޯގެ ތަފްސީލު ލިޔަމުން ބަތަލާ ދީޕިކާ ބުނެފައި ވަނީ ދުއާ ޕަދުކޯން ސިންގް އަކީ އެމީހުން ގިނަ ދުވަސްތަކެއް ވަންދެން ކުރި އުއްމީދުތަކުގެ ޖަވާބު ކަމަށެވެ. ދުއާގެ މާނައަކީ އަޅުކަން ކަމަށާއި ދެމަފިރިންގެ ހިތް ވެސް ވަނީ ލޯތްބާއި ޝުކުރުވެރި ކަމުން ފުރިފައި ކަމަށް ދީޕިކާ ވަނީ ބުނެފައެވެ.
ވަރުން ދަވަން އާއި އަންހެނުން ނަތާޝާ އަދި އަލަތު ދަރިފުޅު ލާރާ--ފޮޓޯ/އިންޑިއަންއެކްސްޕްރެސް
ފިލްމު "ސްޓޫޑަންޓް އޮފް ދަ އިއާ"ގެ ތަރި ވަރުންގެ ދެމަފިރިންގެ ދަރިފުޅުގެ ފޮޓޯއެއް ވެސް މިހާތަނަށް އާއްމުކޮށްފައި ނުވާއިރު ދަރިފުޅުގެ ނަން ހާމަކޮށްފައި ވަނީ އަމީތާބް ބައްޗަން ހޯސްޓުކޮށް ސޮނީ ޓީވީއިން ގެނެސްދޭ "ކޯން ބަނޭގާ ކަރޯޑްޕަތީ"ގެ އެޕިސޯޑެއްގައެވެ.
ވަރުންގެ އަލަތު ވެބް ސީރީސް "ސިޓަޑެލް: ހަނީ ބަނީ"ގެ ޕްރޮމޯޝަން ކުރިއަށްދިޔަ މި އެޕިސޯޑުގައި 37 އަހަރުގެ އެކްޓަރު ބުނީ އަލަތު ދަރިފުޅުގެ ނަމަކީ "ލާރާ" ކަމަށެވެ.
ފިލްމު އިންޑަސްޓްރީގެ ތަރިންގެ ކުދިންނަކީ މީޑިއާގެ އެންމެ ބޮޑު ސަމާލުކަން ލިބޭ ބަޔަކަށް ވުމާއެކު ވަރަށް ގިނަ ފިލްމީ ތަރިން ކުދިންގެ ފޮޓޯތައް އާއްމުކުރުމަށް ފަސްޖެހެއެވެ.
އެތަރިންނަށާއި ކުދިންގެ ޕްރައިވެސީއަށް އެކަމުން ނޭދެވޭ އަސަރުތައް ކުރާތީ މިއީ ވަރަށް ގިނަ ފިލްމީ ތަރިންގެ މެދުގައި ބަހުސް ކުރެވޭ މައުޟޫއެކެވެ. ވަރުން އާއި ދީޕިކާގެ ފަރާތުން އެމީހުންގެ ދަރިންގެ ފޮޓޯތައް އާއްމު ކުރާނެ ދުވަހަކަށް ގިނަ ބަޔަކު އަންނަނީ އިންތިޒާރު ކުރަމުންނެވެ.