އާސަންދަ ރިފޯމް ކުރުމުގެ ގޮތުން އެ ޚިދުމަތް ދޭ އުސޫލަށް ގެނައި ކުއްލި ބަދަލާއެކު، އާސަންދައިގެ ޚިދުމަތް ދިނުމުގައި ދަތިވެ، ލަސްތަކެއް ކުރިމަތިވެދާނެ ކަމަށް އޭޑީކޭ ހޮސްޕިޓަލުން ބުނެފިއެވެ.
ސަރުކާރުން ބޭހުގެ އަގު ކޮންޓްރޯލްކޮށް އާސަންދަ ރިޕޯމްކުރުމަށް ކުރާ މަސައްކަތުގެ ތެރެއިން، މާދަމާއިން ފެށިގެން އާސަންދަ ދޫކުރާނީ ޕްރައިވެޓް އިންޝުއަރެންސުން ކެނޑުމަށްފަހުގައެވެ.
އެ ގޮތުން އަމިއްލަ އިންޝޫރެންސް އޮތް ފަރާތްތަކުގެ އިންޝޫރެންސްގެ ކަވަރޭޖް ހަމަވަންދެން އެއިން ކަނޑާގޮތަށް އާސަންދައިގެ ޚިދުމަތް ދިނުމަށް ވަނީ ބަދަލުތަކެއް ގެނެސްފައެވެ.
އަދި ސިއްޙީ ޚިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއްކަން ނުވަތަ ނޫންކަން، ޚިދުމަތް ފޯރުކޮށްދިނުމުގެ ކުރިން، ސިއްޙީ ޚިދުމަތްދޭ ތަންތަނަށް ވެސް ވަނީ އަންގައިފައެވެ.
މި ކަމާ ގުޅިގެން އޭޑީކޭ ހޮސްޕިޓަލުން ނެރުނު ބަޔާނުގައިވަނީ، މި ބަދަލާ ގުޅިގެން ލާޒިމުކޮށްފައިވާ ގޮތަށް، ޚިދުމަތް ހޯދަން އަންނަ ފަރާތްތަކުގެ އިންޝުއަރެންސް އޮތްތޯ ޔަގީންކުރާނެ ކަމަށެވެ.
އާސަންދައިގެ ދަށުން ދޭ ޚިދުމަތްތަކަކީ ސޮފްޓްވެއާއެއްގެ ދަށުން އެ ހޮސްޕިޓަލުން ދެމުން އަންނަ ޚިދުމަތެއްކަން ފާހަގަކޮށް، އޭޑީކޭއިން ބުނީމި ފަދަ ބޮޑު ބަދަލެއް ކުއްލި ގޮތަކަށް ގެނައުމުގެ ސަބަބުން، ސޮފްޓްވެއާއަށް ގެންނަން ޖެހޭ ބަދަލުތައް ގެނައުމުގެ އިތުރުން، އެ ބަދަލުތަކަށް މުވައްޒަފުން އަހުލުވެރި ކުރުވަން އެއްވެސް ވަގުތެއް ލިބިފައިނުވާ ކަމަށެވެ.
"އެހެން ކަމުން، މި ބަދަލުތަކާއެކު ޚިދުމަތް ދިނުމުގައި ކޮންމެވެސް ވަރެއްގެ ދަތިތަކާ ކުރިމަތިވެ، ޚިދުމަތް ފޯރުކޮށްދިނުމުގައި ލަސްތަކެއް ކުރިމަތިވުމަކީ އެކަށީގެންވާ ކަމެކެވެ." އޭޑީކޭގެ ބަޔާނުގައި ބުނެފައިވެއެވެ.
ސިއްޙީ ޚިދުމަތްދޭ ތަންތަނަށް އާސަންދައިން އަންގާފައިވަނީ އިންޝުއަރެންސް ހަމަވުމަށްފަހު ނޫނީ އެނދުމަތިނުކޮށް ދެވޭ ފަރުވާރަކަށް އާސަންދައިގެ ޚިދުމަތް ނުދިނުމަށެވެ. އެހެން ނަމަވެސް އަމިއްލަ އިންޝުއަރެންސުން ކަވަރުނުކުރާ "އެނދުމަތިނުކޮށްދެވޭ ފަރުވާ"އެއް އާސަންދައިން ކަވަރުކުރާނަމަ، އެ ޚިދުމަތަކަށް އާސަންދަ ލިބިގެންދާނެއެވެ.
އެނދުމަތިނުކޮށް ފަރުވާދިނުމުގައި އާސަންދަ ލިބޭ އުސޫލަށް ބަދަލު ގެނައި ނަމަވެސް، ސިފައިންނާ ފުލުހުންނަށް މީގެ ކުރިން ވެސް އޮތް ގޮތަށް އާސަންދަ ސްކީމުގެ ޚިދުމަތްތައް ލިބިގެންދާނެއެވެ.
ސަރުކާރުގެ "ހިލޭ ބޭސްފަރުވާ ލިބޭ ސްކީމް" އާސަންދަ ރިފޯމް ކުރުމުގެ މަސައްކަތަކީ ވެސް ޚަރަދު ކުޑަކުރުމުގެ ގޮތުން ސަރުކާރުން އެޅި ފިޔަވަޅުތަކުގެ ތެރެއިން ހިމެނޭ ކަމެކެވެ.
ސިއްޙީ ޚިދުމަތްދޭ ބައެއް ތަންތަނުން ފަރުވާ ހޯދަން އަންނަ މީހާގެ އަމިއްލަ އިންޝުއަރެންސް ނަގައި، އަދި އާސަންދައިގެ ޗާޖުތައް ނަގައިގެން އެ ސްކީމްގެ ބޭނުން ނަމަގޮތުގައި މަންފާ ހޯދުމަށް މަސައްކަތް ކުރާކަން ވަނީ ފާހަގަކުރެވިފައެވެ.
ފާއިތުވެދިޔަ އަހަރުތަކުގައި އާސަންދައިގެ ޚަރަދުތައް އިންތިހާއަށް އުފުލި، އެ ކަމަށް ދައުލަތުން ބޮޑު ޚަރަދުތަކެއް ކުރަން ޖެހުނެވެ.
މީގެ އިތުރުން ބައިނަލްއަގުވާމީ މާލީ އިދާރާތަކުން ދިވެހި ދައުލަތުގެ މާލީ ހާލަތާ ގުޅޭ ގޮތުން ނެރުނު ރިޕޯޓުތަކުގައި ވެސް އާސަންދައަށް ކުރާ ހޭދަ ކުޑަކުރުމަށް އޮތީ ލަފާދީފައެވެ.
އެހެން ކަމުން ދައުލަތުގެ ޚަރަދު ކުޑަކުރުމަށް ޓަކައި ކުރާ މަސައްކަތުގެ ދަށުން އާސަންދައަށްކުރާ ހޭދަ ކުޑަކުރުމަކީ ކޮންމެހެން ކުރަންޖެހިފައިވާ ކަމެކެވެ.