ގޫގުލްއިން އެ ކުންފުނީގައި އަލަށް ތައްޔާރުކުރާ ކޯޑުތަކުގެ 25 އިންސައްތަ ލިޔަނީ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ބޭނުންކޮށްގެން ކަމަށް ގޫގުލްގެ ސީއީއޯ ސުންދަރު ޕިޗާއި ވިދާޅުވެއްޖެއެވެ.
މި ވާހަކަ އޭނާ ދެއްކެވީ ކުންފުނީގެ މި އަހަރުގެ ތިންވަނަ ކުއާޓަރުގެ ފައިދާގެ ރިޕޯޓު ހާމަކުރުމަށް ބޭއްވި ބައްދަލުވުމުގައެވެ.
ޕިޗާއި ވިދާޅުވި ގޮތުގައި، ގޫގުލްއިން އޭއައި ބޭނުންކުރަނީ ކުންފުނީގެ ކޯޑިން ޕްރޮސެސްތައް ރަނގަޅުކޮށް، އުފެއްދުންތެރިކަމާއި ހަލުވިކަން އިތުރުކުރުމަށެވެ. މިހާރު ކުންފުނީގައި އަލަށް ތައްޔާރުކުރާ ކޯޑުތަކުގެ ހަތަރުބައިކުޅަ އެއްބައެއްހާ މިންވަރު އުފައްދަނީ އޭއައިން ކަމަށް އޭނާ ވިދާޅުވިއެވެ.
ނަމަވެސް، އޭއައިން އުފައްދާ ކޯޑުތަކާ ގުޅޭގޮތުން ކަންބޮޑުވުންތަކެއް ވެސް އެބަހުއްޓެވެ.
މިދިޔަ 2022 ވަނަ އަހަރު ކުރެވުނު ދިރާސާއަކުން ދައްކާގޮތުގައި، ޕްރޮގްރާމަރުން އޭއައި އެހީގައި ކޯޑު ލިޔާއިރު، އަތުން ލިޔާ ކޯޑުތަކަށްވުރެ ގިނައިން ކުށް ހުރެއެވެ. މިދިޔަ އަހަރުގެ އޭޕްރީލް މަހު ކުރި އިތުރު ދިރާސާއަކުން ދައްކާގޮތުގައި، ޗެޓްޖީޕީޓީއަށް ކުރެވުނު 517 ސޮފްޓްވެއާ ޕްރޮގްރާމިން ސުވާލުގެ ތެރެއިން ދެބައިކުޅައެއްބަޔަށްވުރެ ގިނަ ސުވާލަށް ޖަވާބު ދީފައިވަނީ ރަނގަޅަކަށް ނޫނެވެ.
މި ކަންބޮޑުވުންތަކާ ގުޅޭގޮތުން ޕިޗާއި ވިދާޅުވީ، އޭއައިން އުފައްދާ ހުރިހާ ކޯޑެއް ވެސް އިންޖިނިއަރުން މުރާޖަޢާކޮށް ޗެކްކުރާ ކަމަށެވެ. އަދި، މިކަމުގެ ސަބަބުން އިންޖިނިއަރުންނަށް އިތުރަށް މަސައްކަތްކޮށް، އަވަސް ސްޕީޑެއްގައި ކުރިއަށް ދެވޭ ކަމަށް އޭނާ ވިދާޅުވިއެވެ.
ގޫގުލްގެ ސީއީއޯގެ މި ބަޔާނާ ގުޅިގެން އިތުރު ކަންބޮޑުވުންތަކެއް ފާޅުވެފައިވެއެވެ. މި މަހުގެ ކުރީކޮޅު ކުރެވުނު ދިރާސާއަކުން ދައްކާގޮތުގައި، އޭއައި ކޯޑިން އެސިސްޓަންޓްތައް ބޭނުންކުރުމުން އުފެއްދުންތެރިކަން އިތުރުވެފައި ނުވާ ކަމަށާއި، މުވައްޒަފުންގެ ވަޒީފާގެ ބުރަކަން ކުޑަވެފައިނުވާ ކަމަށް ފާހަގަކޮށްފައިވެއެވެ.
އޭއައި އުފައްދާ ކޯޑުތައް އިންޖިނިއަރުން މުރާޖަޢާކުރާ ކަމަށް ޕިޗައި ވިދާޅުވި ނަމަވެސް، މުސްތަޤުބަލުގައި މި ޓެކްނޮލޮޖީގެ ސަބަބުން ބައެއް ވަޒީފާތައް ގެއްލިގެން ހިނގައިދާނެ ކަމަށް ބެލެވެއެވެ. ޚާއްޞަކޮށް، އަލްފަބެޓްގެ އާ ސީއެފްއޯ އަނަޓް އަޝްކެނަޒީ ވިދާޅުވެފައިވަނީ، އޭނާގެ އެއް އިސްކަމަކަށްވާނީ ކުންފުނީގެ ޚަރަދުތައް ކުޑަކުރުން ކަމަށެވެ.