ސަރުކާރުން މި އަހަރަށް ހުށަހެޅި 5.1 ބިލިއަން ރުފިޔާގެ ސަޕްލިމެންޓަރީ ބަޖެޓު ރައްޔިތުންގެ މަޖިލީހުން ފާސްކުރުމާ އެކު ޖުމުލަ ބަޖެޓު 55 ބިލިއަން ރުފިޔާއަށް ވަނީ އަރައިފައެވެ.
ފުރަތަމަ ބަޖެޓުގައި ޖެހި 49 ބިލިއަން ރުފިޔާ އެއްކޮށް ހުހެއް ނުވެއެވެ. މާލީ ހިސާބުތަކުން ފެންނަ ގޮތުގައި އަދި ޚަރަދުވީ 37 ބިލިއަނެއްހާ ރުފިޔާއެވެ.
މި މަހު 24 ވަނަ ދުވަހުގެ ނިޔަލަށް ސަރުކާރުން ޚަރަދުކުރީ 37.7 ބިލިއަން ރުފިޔާއެވެ. އެ މުއްދަތުގައި އާމްދަނީގެ ގޮތުގައި ލިބުނީ 28.2 ބިލިއަން ރުފިޔާއެވެ. މިދިޔަ އަހަރުގެ މި މުއްދަތާ އަޅައިބަލާއިރު ޚަރަދު ވެސް އާމްދަނީ ވެސް ދާދި އެެއްވަރެއްގައި އިތުރެވެ.
މި އަހަރު މިހާތަނަށް މި އޮތީ 9.5 ބިލިއަން ދަރަނީގައެވެ.
ސަން އެޑިޓާސް ޓޯކްގެ މި ހަފުތާގެ ޕޮޑްކާސްޓްގައި ސަންގެ މެނޭޖިން އެޑިޓަރު އަހުމަދު ސާއިލް އަލީ ވިދާޅުވީ، ގިނަ ދުވަސްތަކަކަށް ފަހު ސަރުކާރުން ޚަރަދުތަކުގެ ތަފުސީލުތައް ހާމަކުރުމަކީ ވަރަށް ރަނގަޅު ކަމެއް ކަމަށެވެ. އޭނާ ވަނީ ޚަރަދުތައް ބޮޑުވުމުގެ ކަންބޮޑުވުން ފާހަގަކުރައްވައިފައެވެ.
އޭނާ ވަނީ އާމްދަނީއަށް ވުރެ ކުރާ ޚަރަދު އިތުރުވުމުގެ ކަންބޮޑުވުން ފާހަގަކުރައްވައިފައެވެ. އޭނާ ވިދާޅުވީ، އެއީ ޒަމާނުއްސުރެ ކުރިމަތިވާ ބޮޑު މައްސަލައެއް ކަމަށާއި އެކަން ހައްލުކުރަން ޚަރަދުތައް ވަރަށް ބޮޑަށް ކުޑަކުރަން ޖެހިފައިވާ ކަމަށެވެ.
ސާއިލް ވަނީ ޚަރަދު ކުޑަކުރުން ނޫން ގޮތެއް ނެތްކަން ފާހަގަކުރައްވައި ޚަރަދުތަކާ ގުޅޭ ބައެއް ތަފާސްހިސާބުތަކަށް އަލިއަޅުއްވައިލައްވައިފައެވެ.
ޕޮޑްކާސްޓްގައި ވާހަކަދައްކަވަމުން ސަންގެ ޑެޕިއުޓީ މެނޭޖިން އެޑިޓަރު އަހުމަދު އިނާހް ވިދާޅުވީ، ތަފާސްހިސާބުތަކަށް ބަލާއިރުގައި މި އަހަރު މިހާތަނަށް 10 ބިލިއަނަށްވުރެ ގިނަ ރުފިޔާ މުސާރައާއި އިނާޔަތްތަކަށް ޚަރަދުކޮށްފައިވާ ކަމަށެވެ. އެއީ، މިދިޔަ އަހަރުގެ މި މުއްދަތާ އަލައިބަލާއިރު 1.3 ބިލިއަން ރުފިޔާ އިތުރު އަދަދެއްކަން އޭނާ ވަނީ ފާހަގަކުރައްވައިފައެވެ.
އިނާހް ވިދާޅުވީ، ސަރުކާރުގެ ޕޭރޯލްގެ ހަތަރު އިންސައްތަ ސިޔާސީ މުވައްޒަފުންނަށް ހޭދަކުރާނަމަ ހިސާބުތަކުން ފެންނަނީ އެއީ 408 މިލިއަނެއްހާ ރުފިޔާ ކަމަށެވެ. އެހެންވެ، އެވްރެޖް ގޮތެއްގައި ހިސާބު ޖަހައިފި ނަމަ، މި ސަރުކާރުގެ ސިޔާސީ މަގާމުތަކުގެ އަދަދު 1،000 އަށްވުރެ ގިނަވާނެ ކަމަށް އަންދާޒާކުރެވޭ ކަމަށް އޭނާ ވިދާޅުވިއެވެ.
އޭނާ ވަނީ ބަޖެޓުގައި އަދަދުތަކެއް ޖެހި ނަމަވެސް ދަރަންޏާއި އެހީގެ ގޮތުގައި ހޯދަންޖަހާ އަދަދުތައް ދިމާނުވުމުގެ ކަންބޮޑުވުން ފާހަގަކުރައްވައިފައެވެ.
އެ ގޮތުން، މި އަހަރު ވެސް ބޭރުގެ ދަރަނި ލިބޭނެ ކަމަށް އަންދާޒާކުރި ވަރަށް ނުލިބޭ ކަމަށާއި އެ ފައިސާ ހޯދަން ޖެހުނީ ޑޮމެސްޓިކް މާކެޓުން ކަމަށް އިނާހް ވިދާޅުވިއެވެ. ޑޮމެސްޓިކް މާކެޓުން ބޮރޯކުރެވޭ މިންވަރާ މެދު މަރުކަޒީ ބޭންކުން ވެސް ކަންބޮޑުވުން ފާޅުކޮށްފައިވާކަން އޭނާ ފާހަގަކުރެއްވިއެވެ.
މި ހަފުތާގެ ޕޮޑްކާސްޓްގައި ސަރުކާރުގެ ޚަރަދުތަކާ ގުޅޭ ގޮތުން މި ނޫން ވެސް މުހިންމު ވާހަކަތަކެއް އަދި ތަފާސްހިސާބުތަކެއް ވަނީ ދައްކައިފައެވެ. މުޅި ޕޮޑްކާސްޓް އައްސަވާލައްވާށެވެ.