އިޓާލިއަން ސެރީއާގައި ނަޕޯލީ އާއި އޭސީ މިލާން ބައްދަލުކުރި މެޗު ނަޕޯލީއިން ކާމިޔާބު ކޮށް ތާވަލްގައި ލީޑު ފުޅާކޮށްފިއެވެ.
މިލާންގެ ދަނޑު ސެންސީރޯގައި ކުޅުނު މިމެޗު ނަޕޯލީއިން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ މިލާންއިންނެވެ.
ނަމަވެސް މިމެޗުގައި ނަޕޯލީ ފެނިގެންދިޔައީ މިލާން ކައިރީ އެޓީމަށް ލިބުނު ފުރުސަތު ތަކުގެ ބޭނުން ރަނގަޅަށް ހިފިތަނެވެ. އަދި ނަޕޯލީގެ ފޯވަޑް ރޮމެލޫ ލުކާކޫ އޭނާ ކުރިން ކުޅުނު އިންޓާ މިލާންގެ ދަނޑަށް އެނބުރި އައުން ފާހަގަ ކޮށްފައިވަނީ މެޗުގެ ކުރީކޮޅު ލަނޑެއް ޖަހާ މެޗުގެ ލީޑު ނަޕޯލީއަށް ނަގައިދީގެންނެވެ.
މިލަނޑު އެޓީމަށް ކާމިޔާބު ކޮށްފައިވަނީ މެޗުގެ ކުޅުން ފެށިތާ ފަސްވަނަ މިނެޓުގައެވެ. މިލަނޑާއެކު މިލާންއިން ނަޕޯލީގެ ގޯލަށް ނުރައްކާ ކުރި ނަމަވެސް އެޓީމުގެ ޑިފެންސް ފޫއަޅުވާލެވޭ ގޮތެއް ނުވިއެވެ. އަދި ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ނަޕޯލީއިންވަނީ އިތުރު ލަނޑެއް ޖަހާ މެޗުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބު ކޮށްދިނީ ހަވީޗާ ކްރަވެޓްޝޭލިއާއެވެ. އޭނާ މިލަނޑު ކާމިޔާބު ކޮށްފައިވަނީ ގިނަ ކުޅުންތެރިންތަކެއް ކަޓުވާލާފައިދިއުމަށްފަހުއެވެ.
މިމެޗުގެ ދެވަނަ ހާފުގެ ކުޅުން ފެށިތަނާހެން މިލާންގެ ފޯވަޑް އަލްވާރޯ މޮރާޓާއަށް ލަނޑެއް ޖެހުނު ކަމަށް ހީވި ނަމަވެސް ވީއޭއާރުން ބެލުމަށްފަހު ވަނީ އެލަނޑު އޮފް ސައިޑް ކަމަށް ނިންމިއެވެ. މިހާފުގައި މިލާންއިން ގިނަ ހަމަލާތަކެއް އަނެއްކާ ވެސް އުފެއްދި ނަމަވެސް ނަޕޯލީގެ ކީޕާ އެލެކްސް މެރެޓްގެ އިތުރުން ދެ ޑިފެންޑަރުންކަމަށްވާ އަމީރު ރަހްމާނީއާއި އަލޭސާންޑްރޯ ބޮންޖިއޯނޯ ދިފާއު ކޮށްފައެވެ. މިކާމިޔާބީއާއެކު ނަޕޯލީއިން މިހާރު މިވަނީ މިސީޒަންގައި މިހާތަނަށް ކުޅުނު 10 މެޗުގެ ތެރެއިން އަށް މެޗު ކާމިޔާބު ކޮށް އެއް މެޗުން އެއްވަރުވެ އަދި އެއް މެޗުން ބަލިވެގެން ތާވާލްގެ އެއްވަނައިގާ ހަތް ޕޮއިންޓްގެ ލީޑެއް ނަގައިފައެވެ. އެއީ 25 ޕޮއިންޓާއެކުއެވެ.
މިފަހަރުގެ ސީޒަންގެ ފުރަތަމަ މެޗުގައި ހެލަސް ވެރޯނާ އަތުން ތިން ލަނޑު ސުން ލަނޑުން ބަލިވުމާއެކު މިސީޒަންގައި ވެސް ނަޕޯލީއަށް ގިނަ މައްސަލަ ތަކަކާއި ކުރިމަތިވާނެކަމަށް ބެލެވިގެންދިޔަ ނަމަވެސް އޭގޭފަހުން އެއްވެސް މެޗަކުން ބަލިވެފައެއް ނުވެއެވެ.
މިމެޗާއެކު މިސީޒަންގައި ތިންވަނަ މެޗުން ބަލިވި މިލާން މިހާރު އުޅެނީ 14 ޕޮއިންޓާއެކު ތާވަލްގެ އަށް ވަނައިގައެވެ.