ސޫދާނުގެ ރައްޔިތުން ދިރިއުޅެމުންދަނީ އަނިޔާވެރިކަމާއި ބަނޑުހައިހޫނުކަމުގައި ގެދޮރު ނެތި ބިކަ ހާލުގައި ކަމަށް އދ. ގެ ވެރިޔާ އެންޓޯނިއާ ގުޓަރޭސް ވިދާޅުވެއްޖެއެވެ.
ސޫދާންގެ އިރުމަތީ މެދުތެރޭގެ ގެޒީރާ ޕްރޮވިންސްގެ ރަށްރަށުގައި މީހުން މެރުމާއި ރޭޕްކުރުން އިންތިހާއަށް އިތުރުވެފައިވާ ކަމަށާއި، އެއް ރަށަކުން އެއް ދުވަހާ 120 މީހުން މަރާލާފައިވާ ކަމަށް އދ. ގެ ރިޕޯޓެއްގައި ފާހަގަކޮށްފައިވާ ކަމަށް ގުޓަރޭސް ވިދާޅުވިއެވެ.
ގުޓަރޭސް ވިދާޅުވި ގޮތުގައި ސޫދާންގައި ހިނގާ ދާޚިލީ ހަނގުރާމައިގެ ސަބަބުން ހަނގުރާމެވެރިންނާއި އަސްކަރީ ބާރުތަކުން ބޭރުގެ ބާރުތަކާ އެކު ހަމަލާތައް އިތުރުކޮށްފައިވާ ކަމަށާއި އެތައް މިލިއަން ބަޔަކު ބަނޑުހައިހޫނުކަމާއި ބަލިމަޑުކަމުގެ ތެރޭގައި ދިރުއުޅެމުންދާ ކަމަށެވެ.
"ސޫދާން އަނެއްކާ ވެސް އެ ވަނީ ގިނަ އަދަދެއްގެ ނަސްލީ އަނިޔާވެރިކަމުގެ ތަނަކަށް،" މީގެ 20 އަހަރު ކުރިން ސޫދާނުގެ ޑާފޫރު ސަރަހައްދުގައި ހިނގި ހަމަނުޖެހުމަށް އިޝާރާތް ކުރައްވައި ގުޓަރޭސް ވިދާޅުވިއެވެ. އެކަމުގެ ސަބަބުން އިންޓަނޭޝަނަލް ކްރިމިނަލް ކޯޓުން ސޫދާނުގެ ކުރީގެ ލީޑަރުންގެ މައްޗަށް ނަސްލު ނައްތާލުމާއި އިންސާނިއްޔަތާ ދެކޮޅަށް ހިންގާ ޖަރީމާތަކުގެ ދައުވާ އުފުލާފައިވެއެވެ.
ބަނޑުހައިހޫނުކަން އިންތިހާއަށް އިތުރުވެ، ސޫދާނުގެ އާބާދީގެ ދެބައިކުޅަ އެއްބައި މީހުންނަށް އެހީ ބޭނުންވާ ކަމަށް އދ ން ބުނޭ. ފޮޓޯ/ރޮއިޓާސް
ދެކޮޅުވެރިކަން ހުއްޓާލައި، ހާލުގައިޖެހިފައިވާ އެތައް މިލިއަން ބަޔަކަށް އިންސާނީ އެހީ ފޯރުކޮށްދިނުމަށް ގުޓަރޭސް ވަނީ އިލްތިމާސްކުރައްވާފައެވެ. އަދި ގާނޫނާ ޚިލާފުވާ ފަރާތްތައް ޖަވާބުދާރީ ކުރުވަން ޖެހޭ ކަމަށްވެސް ގުޓަރޭސް ވިދާޅުވިއެވެ.
ގުޓަރޭސް އިތުރަށް ވިދާޅުވީ އާރުއެސްއެފް އިން އުތުރު ޑާފޫރުގެ ވެރިރަށް އެލް ފަޝާ އާއި ވަށައިގެންވާ ސަރަހައްދުތަކުގައި އާންމުންނަށް ހަމަލާދޭ ކަމަށް ރިޕޯޓްތައް ބުނާ ކަމަށާއި އެކަމާ ކަންބޮޑުވެވަޑައިގަންނަވާ ކަމަށެވެ.
ގެދޮރުގެއްލިފައިވާ މީހުން ދިރިއުޅޭ ވަގުތީ ހިޔާތަކުގައި ބަނޑުހައިހޫނުކަން އިތުރުވެ، 11 މިލިއަން މީހުން ފިލައިގެން ގޮސްފައިވާއިރު، ގާތްގަނޑަކަށް 25 މިލިއަން މީހުންނަށް އެހީ ބޭނުންވާ ކަމަށް އދ. އިން ބުނެއެވެ.
ސޫދާނުގައި ހަނގުރާމަ ފެށުނީ 2023ވަނަ އަހަރުގެ އޭޕްރީލް މަހުގެ މެދުތެރޭގައި ސޫދާނުގެ ސިފައިންނާއި ޕެރަމިލިޓަރީ ރެޕިޑް ސަޕޯޓް ފޯސަސް (އާރުއެސްއެފް) އާއި ދެމެދު ހަމަނުޖެހުން އިތުރުވެ، އާރްއެސްއެފްގެ ފައުޖުތަކުން ވެރި ރަށް ޚަރްޠޫމަށް އަރައިގަތުމާ ގުޅިގެންނެވެ.
ހަނގުރާމައިގެ ސަބަބުން 11 މިލިއަނަށް ވުރެ ގިނަ މީހުން ގެދޮރު ދޫކޮށް ފިލައިގެން ގޮސްފައިވާއިރު އޭގެ ތެރެއިން ތިން މިލިއަން މީހުން ގޮސްފައި ވަނީ އަވަށްޓެރި ގައުމުތަކަށެވެ.
ސޫދާންގެ ހަނގުރާމަ މޮނިޓާ ކުރާ ޖަމާއަތެއް ކަމަށްވާ އާމްޑް ކޮންފްލިކްޓް ލޮކޭޝަން އެންޑް އިވެންޓް ޑޭޓާ އިން ބުނާ ގޮތުގައި ހަނގުރާމައިގެ ސަބަބުން މިހާތަނަށް 24،000އަށް ވުރެ ގިނަ މީހުން ވަނީ މަރުވެފައެވެ.
ސޫދާންގެ 18 ސްޓޭޓެއްގެ ތެރެއިން 14 ސްޓޭޓެއްގައި އަސްކަރިއްޔާއާއި އާރްއެސްއެފްގެ ފައުޖުތަކުން މި ވަގުތު ދަނީ ހަނގުރާމަ ކުރަމުންނެވެ. ހަނގުރާމަ ފެށުމުގެ ކުރިން އެ ގައުމުގައި ވެރިކަން ކޮށްފައި ވަނީ އަސްކަރިއްޔާއާއި އާރްއެސްއެފުން ގުޅިފައިވާ ސަރުކާރަކުންނެވެ. އެ ދެ ފަރާތުން ވެރިކަން ފޭރިގަނެފައި ވަނީ އަސްކަރީ ބަޣާވާތަކުން އެ ގައުމުގެ އިންތިޚާބީ ސަރުކާރު ވައްޓައިލުމަށް ފަހުއެވެ.