ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ)ގެ ކުންފުނިކަމަށްވާ ހެވީ ލޯޑް މޯލްޑިވްސް ޕަރައިވެޓް ލިމިޓެޑަށް ބޭންކް އޮފް މޯލްޑިވްސް (ބީއެމްއެލް)އިން ދިން ލޯނުތަކެއް ނުދެއްކި އެ ކުންފުނިން ލ. އަތޮޅުގައި ރިސޯޓެއްގެ ގޮތުގައި ތަރައްގީކޮށްފައިވާ ތިން ރަށް ވިއްކައިލަން އިއުލާނުކޮށްފިއެވެ.
ބޭންކުން ވިއްކައިލަން އިއުލާނުކޮށްފައިވާ ރަށްތަކަކީ:
- ފަރެސް
- ކުޑަ ފަރެސް
- ބޮޑުހުރާ
އެ ބޭންކުން ވަނީ އެ ރަށްތައް ގަންނަން ޝައުގުވެރިވާ ފަރާތްތަކުން ބިޑު ހުށަހެޅުމަށް މިހާރު ހުޅުވައިލައިފައެވެ. ބިޑު ހުށަހެޅުމުގެ ދެ ގޮތަކަށް ހުށަހެޅުމުގެ ފުރުސަތު ވަނީ ދީފައެވެ. އެއީ:
- ފަރެސް، ކުޑަ ފަރެސް، ބޮޑުހުރާ އެންމެ މަދުވެގެން 23 މިލިއަން ޑޮލަރަށް ގަންނަން ބިޑުކުރުން
ދެވަނަ ގޮތަކީ:
- ފަރެސް އަދި ކުޑަ ފަރެސް، އެންމެ މަދުވެެގެން 23 މިލިއަން ޑޮލަރަށް ގަންނަން ބިޑުކުރުން
- ބޮޑުހުރާ އެކަނި އެންމެ މަދުވެެގެން 23 މިލިއަން ޑޮލަރަށް ގަންނަން ބިޑުކުރުން
ބޭންކުން ބުނީ އެ ކަމަށް ބިޑުކުރަން ޝައުގުވެރިވާ ފަރާތްތަކަށް އަންނަ މަހުގެ 28ވަނަ ދުވަހުގެ މެންދުރުފަހު 12ގެ ކުރިން ޕްރޮޕޯސަލް ހުށަހެޅުމުގެ ފުރުސަތު އޮންނާނެ ކަމަށެވެ. ޕްރޮޕޯސަލްތައް ހުށަަހަޅަން ޖެހެނީ ބަންދުކުރެވިފައިވާ ސިޓީ އުރައިގައެވެ.
އެންމެ މަތިން ބިޑު ހުށަހަޅާ ފަރާތުން 100،000 ޑޮލަރުގެ ފީއެއް ފަސް ދުވަސް ތެރޭ ދައްކަން ޖެހޭނެ ކަމަށް ވެސް ބީއެމްއެލުން ބުންޏެވެ.
ޕްރޮޕޯސަލްތައް ހުޅުވުން އޮންނާނީ ހަމަ އެ ދުވަހުގެ 12 ޖަހާއިރު އޯކިޑްމާގެ ބިލްޑިންގެ 11 ވަނަ ފަންގިިފިލާގައި ކަމަށް ބޭންކުން ބުންޏެވެ.
މި ކަމާ ގުޅޭ އިތުރު މައުލޫމާތު ގެޒެޓުގައި ބީއެމްއެލްއިން ވަނީ އާންމުކޮށްފައެވެ.
މިފަހުން ވެސް ބީއެމްއެލްއިންވަނީ ލޯނު އަނބުރާ ނުދެއްކުމުން މާލޭގެ ދެ ގެއެއް ވެސް ގަންނަން ހުޅުވައިލައިފައެވެ.
ރިކޯ މޫސަގެ ތިން ރަށެއް ވިއްކައިލަން އިއުލާނުކުރިއިރު މީރާއަށް ޓެކްސް ނުދައްކާ ކުންފުނިތަކުގެ ލިސްޓުގައި ވެސް އޭނާގެ ކުންފުނި އެބައޮތެވެ.