އިންޑިއާގެ އެންމެ މުއްސަނދި ފިލްމީ އާއިލާގެތެރޭ ހިމެނޭ ބައްޗަން އާއިލާއިން ދެ މިލިއަން އެމެރިކާ ޑޮލަރުގެ އިންވެސްޓްމެންޓެއް އިންޑިއާގެ ރިއަލް އެސްޓޭޓް ވިޔަފާރިއަށް ކޮށްފިއެވެ.
ދާދިފަހުން އަމީތާބް އާއި ދަރިފުޅު އަބީޝެކް ބައްޗަން ވަނީ އިންޑިއާގެ މުމްބާއީގެ އުތުރުގައި އޮންނަ މުލުންދު ވެސްޓްއިން 10 ޕްރީމިއަމް އެޕާޓްމަންޓް ގަނެފައެވެ. އަމީތާބްގެ ނަމުގައި ހަތަރު އެޕާޓްމަންޓް އަދި އަބީޝެކްގެ ނަމުގައި ހަ އެޕާޓްމަންޓް ގަތުމާ އެކު ދެ ބަފައިން ވެފައިވަނީ އިންޑިއާގެ ރިއަލް އެސްޓޭޓް އިންޑަސްޓްރީގެ އެންމެ ނުފޫޒު ގަދަ މީހުންގެ ތެރޭގައެވެ.
ދެ ބަފައިން ގަނެފައިވާ އެޕާޓްމަންޓްތަކުގައި ތިން ކޮޓަރިއާ އެކު ވަކިން ކާރު ޕާކު ކުރެވޭނެ ބޮޑު ހުސްތަނެއް އޮތްނައިރު ބައެއް އެޕާޓްމަންޓްތަކުގައި ހަތަރު ކޮޓަރި ހުންނާނެ ކަމަށް ރިޕޯޓުތައް ބުނެއެވެ. މީގެކުރިންވެސް ރިއަލް އެސްޓޭޓް ވިޔަފާރީގައި ގިނަ ބައެއްގެ ސަމާލުކަން ހޯދާފައިވާ ބައްޗަން އާއިލާއިން 2020 ވަނަ އަހަރުން ފެށިގެން އަންނަނީ އެ ވިޔަފާރީގައި ކުރިއެރުންތައް ހޯދަމުންނެވެ.
އަބީޝެކް ބައްޗަން ދައްތަ ޝްވޭތާ ބައްޗަންއާ އެކު--ފޮޓޯ/އިންޑިއަންއެކްސްޕްރެސް
އިންޑިއާގެ މުމްބާއީގެ އެކި ސަރަހައްދުތަކުން މިހާތަނަށް ބައްޗަން އާއިލާއިން ވަނީ 25 އިންސައްތައިގެ ބޮޑު އިންވެސްޓްމަންޓްތަކެއް ކޮށްފައެވެ. އަދި މި އިންވެސްޓްމެންޓްތަކުގެ އަގު މިހާރު 26 މިލިއަން އެމެރިކާ ޑޮލަރަށް އަރާނެ ކަމަށް ރިޕޯޓުތައް ބުނެއެވެ.
ރިއަލް އެސްޓޭޓް ވިޔަފާރީގެ އިތުރުން ބައްޗަން އާއިލާއިން އަންނަނީ ކޯޕަރޭޓް ވިޔަފާރީގެތެރެއަށް ވެސް ވަންނަމުންނެވެ.
ދާދިފަހުން އެ އާއިލާއިން ވަނީ އިންޑިއާގެ މަޝްހޫރު އޮންލައިން ވިޔަފާރީ ބްރޭންޑް 'ސުވިގީ'ގެ ބައެއް އިންވެސްޓަރުންނާއި މުވައްޒަފުންގެ ހިއްސާ ގަނެފައެވެ.
އިންޑިއާގެ އުއްތަރު ޕްރަދޭޝްގެ އަޔޯދްޔާ ސިޓީއިން ގަނެފައިވާ ބިމުގައި އެ އާއިލާއަށް ހާއްސަ ގެއެއް އިމާރާތް ކުރުމަކީ އަބަދުވެސް ދެކެމުން އަންނަ ހުވަފެނެއް ކަމަށާއި އަޔޯދްޔާ ސިޓީއަކީ އެކްޓަރުގެ ހިތުގައި ވަރަށް ހާއްސަ ގަދަރެއް ދެވިފައިވާ ތަނެއް ކަމަށް މީގެ ކުރިން އމީތާބް ވަނީ ބުނެފައެވެ.