ރައީސް ޑރ. މުޙައްމަދު މުޢިއްޒު، ޓެކްސް އެޕީލް ޓްރައިބިއުނަލަށް ހަތަރު މެންބަރުން މިއަދު އައްޔަނު ކުރައްވައިފިއެވެ.
ޓެކްސް އެޕީލް ޓްރައިބިއުނަލުން ހަތަރު މަގާމެއް ހުސްވީ އެ ޓްރައިބިއުނަލްގެ މެންބަރުންގެ މައްސަލަތަކެއް ބެލުމަށް ފަހު ޓްރައިބިއުނަލްގެ މެންބަރު އިސްމާއީލް ސާޖިދު ފިޔަވައި ބާކީ ތިއްބެވި ހަތަރު މެންބަރުން މަގާމުން ވަކިކުރުމުންނެވެ. އެއީ، މިދިޔަ އޮގަސްޓް 26 ގައެވެ.
މެންބަރުކަމަށް ކުރިމަތިލާން އާންމުކޮށް ހުޅުވައިލުމުން 13 ބޭފުޅުންވަނީ އެ ކަަމަށް ކުރިމަތިލައްވައިފައެވެ.
އެ ނަންތައް ޖުޑިޝަރީ ކޮމިޓީން ދިރާސާ ކުރުމަށް ފަހު ފޮނުވުމުން ރައްޔިތުންގެ މަޖިލީހުގެ ތަޅުމުގައި އެ މަގާމުތަކަށް ކުރިމަތިލެއްވި ބޭފުޅުންގެ ނަންތަކަށް މިއަދު ވަނީ ވޯޓަށް އަހާފައެވެ.
އޭގެ ތެރެއިން މަޖިލީހުން ރުހުން ދިނީ:
1. ޙަސަން ޒުހައިރު މުޙައްމަދު، ގ. މާވާރުލު
2. އިބްރާހީމް ޝަރީފް، ގ. އަލިޝާ
3. ޝިފްޒާ ޢަބްދުލްގައްޔޫމް، ގަސްދޮށުގެ، ގއ. ނިލަންދޫ
4. ޢަބްދުލްޣަނީ މުޙައްމަދު، ހ. ހޯސްޓްސައިޑް
އެ މަގާމުތަކަށް މެންބަރުން އައްޔަންކުރަން ފާސްކޮށްފައިވަނީ ވޯޓުގައި ބައިވެރިވި 68 މެންބަރުންގެ ތާއިދާ އެކުގައެވެ.
އެއާއެކު ރައީސް، އެ ހަތަަރު ބޭފުޅުން ޓްރައިބިއުނަލަށް އައްޔަންކުރައްވާފައިވާ ކަމަށް ރައީސް އޮފީހުން ބުންޏެވެ.
ޓެކްސް އެޕީލް ޓްރައިބިއުނަލްގެ މެންބަރުންތަކެއް މަގާމުން ވަކިކުރީ، އެ ތަނުގައި ގިނަ މައްސަލަތަކެއް ހުރިކަން ފާހަގަކޮށް، ރައްޔިތުންގެ މަޖިލީހަށް އެ ގޮތަށް ލަފާ އެރުވުމުންނެވެ.