އެންމެ ރީތި އަންހެނުންގެ ލިސްޓެއްގައި ދީޕިކާ

ދުނިޔޭގެ އެންމެ ރީތި 10 އަންހެނުންގެ ލިސްޓުން ޖާގަ ހޯދި ހަމައެކަނި އިންޑިއާގެ ބަތަލާއަކަށް ދީޕިކާ ޕަދުކޯން ވެއްޖެއެވެ.

އެންމެ ރީތި 10 އަންހެނުން ހޮވާފައިވަނީ އިނގިރޭސިވިލާތުގެ ލަންޑަނަށް ނިސްބަތްވާ ފޭޝިއަލް ޕްލާސްޓިކް ސާޖަން ޑރ.ޖޫލިއަން ޑި ސިލްވާގެ ޚާއްސަ ފޯމިއުލާއެއްގެ މައްޗަށް ބިނާކޮށެވެ.

އިންޑިއާގެ އެންމެ އަގު ބޮޑު ބަތަލާއިންގެ ތެރޭ ހިމެނޭ ދީޕިކާ ހިމެނިފައިވަނީ މި ލިސްޓުގެ ނުވަވަނައިގައެވެ. ދީޕިކާއަށް ލިސްޓުގެ ނުވަވަނައިން ގާޖަ ލިބިފައިވަނީ ޑރ.ޖޫލިއަން ޑި ސިލްވާގެ ފޯމިއުލާއިން 91.22 އިންސައްތަ ލިބުމާ ގުޅިގެންނެވެ.

ދީޕިކާއާ އެކު ހޮލީވުޑްގެ ބަތަލާއިން މި ލިސްޓުގައި ހިމެނޭއިރު 94.52 އިންސައްތައާ އެކު ދުނިޔޭގެ އެންމެ ރީތި އަންހެނާގެ މަގާމު ހޯދާފައިވަނީ އިނގިރޭސިވިލާތުގެ ބަތަލާ ޖޯޑީ ކަމާއެވެ.

ދީޕިކާ ޕަދުކޯން އަދި އިނގިރޭސިވިލާތުގެ ބަތަލާ ޖޯޑީ ކަމާ--ފޮޓޯ/ޕިންކްވިލާ

މި ލިސްޓުން ޖާގަ ހޯދި އެހެން ސެލެބްރިޓީންގެ ތެރޭ އެމެރިކަން އެކްޓްރެސް ޒެންޑެޔާ، މަޝްހޫރު މޮޑެލް ބެއްލާ ހަޑީޑް، އެމެރިކަން ލަވަކިޔުންތެރިޔާ އެރިއާނާ ގްރާންޑޭ އަދި މަޝްހޫރު ލަވަކިޔުންތެރިޔާ ޓޭލާ ސްވިފްޓް ހިމެނެއެވެ.

ޑރ.ޖޫލިއަންގެ ލިސްޓުގައި އިންޑިއާގެ ބަތަލާގެ ނަން ހިމެނިގެން ދިއުމީ ބައިނަލްއަޤުވާމީ ދުނިޔޭގައި ވަކި ނަސްލަކަށް ތަފާތުކުރުމެއް ނެތި އިންސާފުވެރިކޮށް ސެލެބްރިޓީންގެ ރީތިކަން ބަލައިގަންނަކަން އަންގައިދޭ ކަމެއްގެ ގޮތުގައި ޑރ. ޖޫލިއަން ވަނީ ފާހަގަކޮށްފައެވެ.

ދާދި ފަހުން އަންހެއް ކުއްޖަކު ލިބިފައިވާ 38 އަހަރުގެ ދީޕިކާ އަކީ މީގެ ކުރިން ވެސް ބައިނަލްއަޤުވާމީ ގޮތުން ފާހަގަކުރާ މިފަދަ ލިސްޓުތަކުން ޖާގަ ހޯދާފައިވާ ބަތަލާއެކެވެ.

ބޮލީވުޑްގެ އިތުރުން ހޮލީވުޑް ފިލްމުތަކުން ވެސް ފުރުސަތު ލިބިފައިވާ ބަތަލާ އެންމެ އަވަހަށް ބެލުންތެރިންނަށް ފެންނާނީ އަންނަ މަހުގެ އެއްވަނަ ދުވަހު ރިލީޒް ކުރާ ފިލްމު "ސިންގްހަމް އަގެއިން" އިންނެވެ.