ރަށުން ބަދަލުވުމަށް ރަށުގައި ދިރިއުޅޭ ގިނަ ބަޔަކު ބޭނުންވާ ހދ. ހިރިމަރަދޫ ކައުންސިލުން، ރައްޔިތުން ބަދަލުކުރުމުގެ މަސައްކަތް އަވަސްކޮށްދިނުމަށް އެދިއްޖެއެވެ.
އެ ރަށުގެ ރައްޔިތުން އެހެން ރަށަކަށް ބަދަލުކުރުމުގެ މަސައްކަތް އަވަސް ކޮށްދުމަށް، ކައުންސިލުގެ ފަރާތުން އެދިފައި ވާކަން ހާމަކޮށްފައި ވަނީ ސިޓީތަކާއި އިދާރީ ހިންގުންތަކާ ބެހޭ ވަޒީރު އާދަމް ނަސީރު އުމަރު އެކްސްގައި ކޮށްފައިވާ ޕޯސްޓެއްގައެވެ.
ވަޒީރު ކޮށްފައިވާ ޕޯސްޓުގައި ވަނީ އެ ރަށުގެ ނެރު ތިލަވުމުގެ ސަބަބުން ވަރަށް ގިނަ ތަކުލީފުތަކެއް ރައްޔިތުންނާއި ރަށަށް ދަތުރުކުރާ ފަރާތްތަކަށް ކުރިިމަތިލާން ޖެހިފައިވާކަމަށެވެ.
އަދި އެ މައްސަލަ ރޭގެ ދަންވަރު، ކައުންސިލްގެ ރައީސް މުހައްމަދު ވަހީދު އެ ވުޒާރާގެ ސަމާލުކަމަށް ގެނެސްފައިވާކަން ވަޒީރު ވަނީ ފާހަގަކޮށްފައެވެ.
ވަޒީރުގެ ޕޯސްޓުގައި ވަނީ އެ ރަށުގެ ނެރަށް ދިމާވެފައިވާ މައްސަލަ ހައްލުކުރުމަށް ސަރުކާރާއި ގުޅުންހުރި ފަރާތްތަކާ ގުޅިގެން މަސައްކަތް ކުރާކަމަށް ވިދާޅުވެފައެވެ. އަދި ނެރުގެ މައްސަލައިގެ އިތުރަށް މީހުން ބަދަލުކުރުމުގެ މަސައްކަތް އަވަސް ކޮށްދިނުމަށް ކައުންސިލްގެ ރައީސް އެދިވަޑައިގެންފައި ވާކަންވެސް މިނިސްޓަރު ވަނީ ފާހަގަކޮށްފައެވެ.
ހިރިމަރަދޫގެ ރައްޔިތުން ކ. ތުލުސްދޫއަށް ބަދަލުކޮށްދިނުމަށް އެ ރަށުގެ ކައުންސިލުން އެދިފައި ވަނީ މީގެ ދޮޅުމަހެއްހާ ދުވަސް ކުރީންނެވެ.
އެރަށުގެ ކައުންސިލުން އޭރު "ސަން"އަށް މައުލޫމާތު ދެމުން ބުނީ އެ ރަށުގެ ރައްޔިތުން ބޭނުންވަނީ މާލެ ސަރަހައްދުގެ ރަށަކަށް ހިޖުރަކުރަން ކަމަށާއި ތުލުސްދޫ ޚިޔާރުކޮށްފައިވަނީ އެ ރަށަށް ހިޖުރަކުރެވޭ ވަރަށް ބިން އޮތުމުން ކަމަށެވެ.
އަދި ހިރިމަރަދޫ ރައްޔިތުންގެ ފަރާތުން ރައީސުލްޖުމްހޫރިއްޔާއަށް އެކަން ދެންނެވުމުން، އެ ރަށުގެ ރައްޔިތުން ބޭނުންވާ ގޮތަށް ތުލުސްދޫއަށް ހިޖުރަކުރެވޭނޭކަމުގެ ޔަގީންކަން ރައީސް ދެއްވިކަން ކައުންސިލުން ވަނީ ފާހަގަކޮށްފައެވެ.
ހިރިމަރަދޫއަކީ 590 އެއްހާ މީހުންގެ އާބާދީއެއް އޮންނަ ރަށެކެވެ. ނަމަވެސް އެރަށުގެ ގިނަ މީހުން ވަނީ އެރަށް ދޫކޮށް އެހެން ތަންތަނަށް ހިޖުރަކޮށްފައެވެ.