މި އަހަރުގެ އޮގަސްޓް މަހު ރިލީޒްކޮށް، ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމު "އިސްތިރީ 2"ގެ ކާމިޔާބީއާ ގުޅިގެން ބެލުންތެރިންގެ މެދުގައި ކުރި ނިމުމެއް ނެތް ބަހުސަށް ބަތަލާ ޝްރައްދާ ނިމުން ގެނެސްފިއެވެ.
އިންޑިއާގެ މުމްބާއީގައި ކުރިއަށްދިޔަ ހަފުލާއެއްގައި ނޫސްވެރިންނާ ވާހަކަދައްކަމުން ޝްރައްދާ ބުނީ، "އިސްތިރީ 2" ކާމިޔާބީގެ ފަހަތުގައިވަނީ މުޅި ފިލްމު ކްރޫއިން ފިލްމަށް ހޭދަކުރި ވަގުތާއި ބުރަ މަސައްކަތް ކަމުގައެވެ.
ފިލްމަށް ލިބުނު ކާމިޔާބީގެ ހަގީގީ ހައްގުވެރިޔަކީ ބަތަލާ ޝްރައްދާ ކަމަށް ގިނަ ބަޔަކު ސިފަކުރި ނަމަވެސް ބަތަލާ ބުނެފައިވަނީ އެއީ އެންމެ އިންސާފުވެރި ނިންމުމެއް ނޫން ކަމަށެވެ. ފިލްމު "އިސްތިރީ 2" އަކީ ވަރަށް ކުޑަ ބަޖެޓަކުން އުފެއްދި ފިލްމެއް ނަމަވެސް ފިލްމުގައި ގެނެސްދިން ކޮންމެ މަންޒަރަކަށް ވެސް ކާސްޓުންނާއި ކްރޫއިން ވަރަށް ބުރަކޮށް މަސައްކަތްކޮށްފައިވާ ކަމަށް ބަތަލާ ވަނީ ބުނެފައެވެ.
ފިލްމު ބެލުންތެރިންނަށް އެހާ ކަމުގޮސް، އާއްމުންގެ މެދުގައި މަގުބޫލުވި އެންމެ ބޮޑު އެއް ސަބަބަކީ މުޅި ޓީމުން ނެރުނު ގަދަ ހިތްވަރު ކަމަށާއި ފިލްމުގެ ޑައިރެކްޓަރު އަމަރު ކައުޝިކާއި ފިލްމުގެ ވާހަކަ ލިޔުނު ނިރެން ބަޓް އަދި ޕްރޮޑިއުސަރު ދިނޭޝް ވީޖަންއަށް ޝުކުރު ހައްގުވާ ކަމަށް ޝްރައްދާ ވަނީ ބުނެފައެވެ.
ޝްރައްދާ ކަޕޫރު އަދި އެކްޓަރު ރާޖްކުމާރު ރާއޯ ފިލްމު 'އިސްތިރީ 2'ގެ މަންޒަރެއްގައި--ފޮޓޯ/ފިލްމުފެއަ
ޝްރައްދާ ކަޕޫރު އަދި އެކްޓަރު ރާޖްކުމާރު ރާއޯ މުހިއްމު ރޯލެއް ކުޅުނު މި ފިލްމު ވެފައިވަނީ މިހާތަނަށް އިންޑިއާގައި ފިލްމު ދައްކައިގެން ބޮކްސް އޮފީހުގައި 600 ކްރޯޑު ރުޕީސްގެ އާމްދަނީ ހޯދި ފުރަތަމަ ފިލްމަށެވެ.
ފިލްމެއްގެ ސީކުއަލް އުފެއްދުމަކީ ފަސޭހަކަމެއް ނޫން ކަމަށާއި ބެލުންތެރިން އުއްމީދުތަކާ އެއްވަރަށް ހުރިހާ ރަހަތަކެއް އެއް މިނެއްގައި ހުންނާނެ ކަހަލަ ގޮތަކަށް ފިލްމު ގެނެސްދިނުމުގެ މުހިއްމުކަން "އިސްތިރީ 2"ގެ އުފެއްދުންތެރިން ސާބިތުކޮށްދީފިކަމަށް ޝްރައްދާ ވަނީ ބުނެފައެވެ.
ފިލްމު "އިސްތިރީ" އަކީ މިހާރު ބްރޭންޑެއް ކަމަށާއި މި ފްރެންޗައިސްގެ ތިންވަނަ ފިލްމަށް ތައްޔާރުވަމުން އަންނަ ކަމަށް ޝްރައްދާ ވަނީ ބުނެފައެވެ.