އަންހެން ފުޓުބޯޅަ: ޗެލްސީން ޓުވެންޓޭ ބަލިކޮށް ހަމަޖެހިލައިގެން

ޔުއޭފާ ވިމެންސް ޗެމްޕިއަންސް ލީގު ގްރޫޕް ބީގައި ޗެލްސީ ވިމެންއިން ޓުވެންޓޭ ވުރޫވެން ބަލިކޮށްފިއެވެ.

ޓުވެންޓޭގެ ދަނޑުގައި ކުޅުނު މި މެޗު ޗެލްސީން ކާމިޔާބުކޮށްފައިވަނީ 3-1 އިންނެވެ.

މި ސީޒަންގައި މިހާތަނަށް ކުޅުނު ހުރިހާ މެޗެއް ކާމިޔާބުކޮށް، ވަރަށް ފުރިހަމައަށް ސީޒަން ފަށާފައިވާ ޗެލްސީން މި މެޗު ވެސް ފެށީ އެހާމެ ވަރުގަދަކޮށެެވެ. މެޗުގެ ހަތްވަނަ މިނެޓުގައި އުފެއްދި ހަމަލާއެއްގައި ޗެލްސީންވަނީ މެޗުގެ ފުރަތަމަ ލަނޑު ކާމިޔާބުކޮށް، މެޗުގެ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ އެޖީ ބީވާ ޖޯންސްއެވެ. މެޗުގެ 18 ވަނަ މިނބެޓުގައި ޗެލްސީންވަނީ މައިކާ ހަމާނޯ ޖަހައިދިން ލަނޑުން މެޗުގެ ލީޑު ފުޅާކޮށްފައެވެ.

މެޗުގައި ޗެލްސީން ކާމިޔާބުކުރި ފަހު ލަނޑު މެޗުގެ 63 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ގޫރޯ ރެއިޓެންއެވެ. މެޗުގައި ޓުވެންޓޭއިން ކާމިޔާބުކުރި ހަމައެކަނި ލަނޑު މެޗުގެ 68 ވަނަ މިނެޓުގައި ކާމިޔާބުކޮށްދިނީ ނިކީ ވެން ޑައިކްއެވެ.

މި ކާމިޔާބީއާ އެކު ޗެލްސީ ވިމެން އޮތީ ކުޅުނު ދެ މެޗުން ލިބިފައިވާ ހަ ޕޮއިންޓާ އެކު ގްރޫޕްގެ އެއްވަނައިގައެވެ. ޓުވެންޓޭ ވުރޫވެން އުޅެނީ ތިން ޕޮއިންޓާ އެކު ތިންވަނައިގައެވެ.

ޗެލްސީގެ ކޯޗުކަމާ މި ސީޒަންގައި ހަވާލުވި ލިއޯންގެ ކުރީގެ ކޯޗު ސޯނިއާ ބޮމްޕާސްޓާގެ ކޯޗުކަމުގެ ދަށުން ވިމެންސް ސުޕާ ލީގުގައި މިހާތަނަށް ކުޅުނު ތިން މެޗު ކާމިޔާބުކޮށްފައިވާއިރު ވިމެންސް ޗެމްޕިއަންސް ލީގުގައި ކުޅުނު ފުރަތަމަ މެޗުގައި ރެއާލް މެޑްރިޑްގެ އަންހެން ޓީމު ވެސް ވަނީ ބަލިކޮށްފައެވެ.