މޯލްޑިވްސް އިސްލާމިކް ބޭންކް (އެމްއައިބީ)ގެ ފުރަތަމަ ގެސްޓްހައުސް ސިމްޕޯސިއަމް 150އަށްވުރެ ގިނަ ބައިވެރިންނާއެކު ބާއްވައިފިއެވެ.
މި ސިމްޕޯސިއަމް ބާއްވާފައިވަނީ ކްރޮސްރޯޑްސް މޯލްޑިވްސްގައި މިދިޔަ ބުރާސްފަތި ދުވަހުއެވެ.
އެމްއައިބީން ބުނީ ގެސްޓްހައުސްތަކާއި، ޖަމިއްޔާތަކާއި، ސަޕޯޓިން ވިޔަފާރިތަކާއި، ލައިވްބޯޑްތަކުގެ 150އަށް ވުރެ ގިނަ ބައިވެރިން ސިމްޕޯސިއަމްގައި ބައިވެރިވިއިރު، މި ހަރަކާތުގެ މަގުސަދަކީ ފަތުރުވެރިކަމުގެ ދާއިރާގެ ތެރޭގައި އެއްބާރުލުން އިތުރުކޮށް، އޭގެ ތެރެއަށް އައު ކަންތައްތައް ތައާރަފު ކުރުން ކަމަށެވެ.
މި ސިމްޕޯޒިއަމްގައި ތިން ޕެނަލް ޑިސްކަޝަނެއް ކުރިއަށް ގެންދިޔައިރު، އިންޑަސްޓްރީގެ ތަޖުރިބާކާރުން ވަނީ އެ މީހުންގެ ވިސްނުމާއި ތަޖުރިބާތައް ހިއްސާކޮށްފަ އެވެ. މި މަޝްވަރާތަކުން މިހާރުގެ ޓްރެންޑްތަކާއި މި ދާއިރާއަށް ކުރިމަތިވެފައިވާ ގޮންޖެހުންތަކާ ބެހޭ ގޮތުން އަގުހުރި މުހިންމު މައުލޫމާތުތަކެއް އެ ބޭފުޅުން ދެއްވިއެވެ.
މި ހަރަކާތުގެ ތެރެއިން މަޝްހޫރު މޯޓިވޭޝަނަލް ސްޕީކާ، އަފީފް ހުސެއިންވަނީ ކީނޯޓު ސްޕީޗެއް ވެސް ދެއްވައިފައެވެ.
މީގެ އިތުރުން އެމްއައިބީގެ މެނޭޖިން ޑިރެކްޓާ އަލްފާޟިލް މުއްފަދަލް އިދްރީސް ޚުމްރީ ވަނީ ގެސްޓްހައުސް ދާއިރާގެ މުސްތަގުބަލަށް އެއްބާރުލުން ދިނުމުގެ މުހިންމުކަމަށް އަލިއަޅުވާލައްވައި ވާހަކަފުޅު ދައްކަވާފައެވެ.
މި ސިމްޕޯސިއަމަކީ މި ސިނާއަތުގެ ސްޓޭކްހޯލްޑަރުން އިތުރަށް ހަރުދަނާވުމަށް، ގުޅިގެން ޚިޔާލު ބަދަލުކުރުމަށް ލިބުނު މުހިންމު ފުރުސަތެއްކަމަށް އެމްއައިބީން ބުނެއެވެ.
އެ ބޭންކުން ފުރަތަމަ ބޭއްވި ސިމްޕޯޒިއަމް ކާމިޔާބުކަމާ އެކު ނިންމައިލިއިރު، ކުރިޔަށް އޮތް ސިމްޕޯޒިއަމްތައް ވެސް ބިނާކުރާނީ މި ކާމިޔާބީގެ މައްޗަށް ކަމަށް އެމްއައިބީން ވަނީ ބުނެފައެވެ.