ހާލުގައި އުޅޭ އާއިލާއަކަށް އެހީވާން މަމްސް އެއިޑުން ހުޅުވާލައިފި

ހާލުގައި އުޅޭ އެކަނިވެރި މަޔަކާއި ތިން ކުދިންނަށް އެހީތެރިވުމަށް މަމްސް އެއިޑުން ހުޅުވާލައިފިއެވެ.

އެ އާއިލާގެ ވަނަވަރު ހާމަނުކޮށް، ޒީނާގެ ނަން ދީފައިވާ، މި އާއިލާގައި މަންމައަކާއި ތިން ކުދިން އެކުގައި ދިރިއުޅެމުންދާ ގޭގެ ހާލަތު މަމްސް އެއިޑްގެ ޓީމުން ޗެކް ކުރުމުން ފާހަގަވެގެން ދިޔައީ، އެއީ ކުދިން ގޮވައިގެން ދިރިއުޅެން އެންމެ އެކަށީގެންވާ މާހައުލެއް ނޫންކަން ކަމަށް އެ ޖަމިއްޔާއިން ބުންޏެވެ.

އެގޮތުން އެ އާއިލާ ނިދާ ކޮޓަރީގެ ގެންގުޅޭ ހުރިހާ ސާމާނެއް ތަރުުތީބުން ބެހެއްޓޭނެ އެއްވެސް ގޮތެއް ނެތުމުން ހުރީ އެކި ދިމަދިމާލުގައި ފޮށިތަކުގައި ކަމަށާއި ކުދިން ނިދުމަށް ބޭނުން ކުރަމުން ދިޔައީ ބާވެ ހަލާކުވެފައި ހުރި ގޮދަޑިއާއި ބާލީސްތަކެއް ކަމަށް އެ ޖަމިއްޔާއިން ބުންޏެވެ.

އެ ހުރިހާ ދަތިކަމާ އެކުވެސް މިއަދު ޒީނާއާއި ކުދިންގެ މޫނުމަތިން ފެންނަމުންދަނީ އުންމީދުގެ ކުލަވަރުތައް. ޒީނާ އާއި އެކުދިންނަށް ނަފުސާނީ ގޮތުން ލިބިފައިވާ ގެއްލުންތަކުން އަރައި ގަތުމަށް ހަތަރުމައިންނަށް ނަފްސާނީ އެހީ ލިބޭނެ ގޮތެއްވުން އެއީ ޒީނާގެ އެންމެ ބޮޑު އެއް އުންމީދު. އަދި އަމިއްލަ މަސައްކަތެއް ފަށައިގަނެވޭނެ މަގުފަހުވެ، ކުދިންކައިރީގައި ހުރެ އާމްދަނީ އިތުރުކުރެވޭނެ ގޮތެއް ވުމީ ޒީނާގެ އެންމެ ބޮޑު އެއް ހުވަފެން، މަމްސް އެއިޑް

ހާލުގައި އުޅޭ ޒީނާގެ އާއިލާއަށް އެހީވާން މަމްސް އެއިޑުން ހުޅުވާލައިފި: ޒީނާގެ އާއިލާ ދިއިރުޅޭ ގެ -- ފޮޓޯ/ މަމްސް އެއިޑް

ޒީނާގެ ވާހަކަ

ޒީނާއަކީ އެންމެ ކުޑައިރުން ފެށިގެން ވެސް ވަރަށް ދަތިހާލުގައި އުޅެމުން އައި އާއިލާއަކަށް ނިސްބަތްވާ ކުއްޖެކެވެ. މަންމަ އާއި ދޮންބައްޕަގެ ޖުމްލަ ނުވަ ކުދިން ތިބިއިރު ޒީނާއަކީ މަންމަގެ އެންމެ ދޮށީ ކުއްޖާއެވެ. ޒީނާއަކީ ބައްޕަ ކަށަވަރުނުވާ މީހެއްކަމުން މުދާ ބެހިއިރުވެސް ގެއިން އެއްވެސް އެއްޗެއް ނުލިބެއެވެ.

އުމުރުން 18 އަހަރު ފުރުނުތަނާހެން ރަށުން ބޭރު މީހަކާ ކައިވެނިކޮށް، އެ މީހާގެ ރަށަށް ދިރިއުޅުން ބަދަލުކުރިއެވެ. އަހަރެއްވީ އިރުވެސް ދަރިއެއް ނުލިބި، ދުވަސް ވާންފެށުމުން ދެމީހުން ދެމެދުގައި މައްސަލަ ޖެހި، އޭނާ ކަައިރިން ވަރިވީއެވެ. އެއަށްފަހު ޒީނާގެ ރަށުގައި ދިރިއުޅެމުންދިޔަ ބީރައްޓެއްސަކާ އިނެވެ. ފުރަތަމަ ދަރިފުޅަށް ދެއަހަރުގައި އަނެއްކާ ވެސް ޖެހުނީ ވަރިވާންށެވެ.

ހާލުގައި އުޅޭ ޒީނާގެ އާއިލާއަށް އެހީވާން މަމްސް އެއިޑުން ހުޅުވާލައިފި: ޒީނާގެ އާއިލާ ދިއިރުޅޭ ގެ -- ފޮޓޯ/ މަމްސް އެއިޑް

ތިންވަނަ ކައިވެއްޏެއްކޮށް ޒީނާއަށް ދެވަނަ ދަރިފުޅު ލިބުނުއިރު ދެން ކުރިމަތިލާން ޖެހުނީ އަނިޔާއާއެވެ. ވަރިވުމަށް ފަހު ދެން ޒީނާ އުޅުނީ ދަތި ހާލުގައި އެކަންޏެވެ. މީހަކަށް ބަރޯސާނުވެއެވެ. އެ ފަހުން ތިންވަނަ ދަރިއެއް ވެސް ޒީނާއަށް ލިބުނެވެ.

ތިން ކުދިންނާއި އެކު ޒީނާ ދިރިއުޅެމުންދަނީ، އަށް ފޫޓް ވެސް ހަމަނުވާ ކުޑަ ކޮޓަރިއެއްގައެވެ. އެކަނިވެރި މައިންނަށް ލިބޭ 3،000 ރުފިޔާއިން ޒީނާއަށް ކުދިންގެ ޒަރޫރީ ކަންކަން ފުރިހަމަ ކުރެވެނީ ހަމަކިރިޔާއެވެ. ބޮޑުދަރިފުޅުގެ ބައްޕަދޭ 2،000 ރުފިޔާ ދަރިފުޅުގެ ބޭސްފަރުވާގެ ކަންކަން ކުރުމަށް އަތޮޅު ހޮސްޕިޓަލަށް ދަތުރުކުރުމާއި އެހެނިހެން ކަންކަމަށް ޚަރަދުވެގެން ދެއެވެ.

ދެން ޒީނާއަށް އިތުރު އާމްދަނީއެއް ލިބިގެން ދަނީ މަގުތައް ކުނި ކަހާދީ، ގެވަޅު ބަލަހައްޓާދީ، ސާފުކުރުމުން ލިބޭ އެއްޗެކެވެ. މި ރުފިޔާ ލައިގެން މަހެއްގެ މައްޗަށް ޖުމްލަ އާމްދަނީއެއްގެ ގޮތުގައި ޒީނާއަށް ލިބެނީ އެންމެ 6،500 އެއްހާ ރުފިޔާއެވެ.

ހާލުގައި އުޅޭއެތައް އާއިލާއަކަށް އުފާވެރި ދިރިއުޅުމެއް ހޯދައި ދިނުމަށް މަމްސް އެއިޑުން އަންނަނީ މިފަދަ ގިނަ ޕްރޮޖެކްޓްތަކެއް ހިންގަމުންނެވެ. އާއްމުންނާއި ވިޔަފާރިތަކުގެ އެހީއާއެކު މީގެ ކުރިން ހިންގާފައިވާ ޕްރޮޖެކްޓްތަކުގެ ސަބަބުން އެތައް އާއިލާއެއްގެ ދިރިއުޅުމަށް އޭގެ ހެޔޮ އަސަރު ކޮށްފައިވެއެވެ.