ހުޅަނގު ކެރީބިއަން ކަނޑުން ފެށިގެން ގޮސް ބޭ އޮފް ކެމްޕެޗޭގައި މި މަހުގެ ފަސްވަނަ ދުވަހު އުފެދުނު ތޫފާން މިލްޓަން އެމެރިކާގެ ފްލޮރިޑާއަށް އެރުމުގެ ސަބަބުން ކަރަންޓު ކެނޑި ފްލޮރިޑާގެ ތިން މިލިއަނަށް ވުރެ ގިނަ މީހުން ކަނު އަނދިރީގައި ތިބެން ޖެހިފައިވާ ކަމަށާއި 11 މީހުން މަރުވެފައިވާ ކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
ނޭޝަނަލް ހަރިކޭން ސެންޓަރުން މައުލޫމާތު ދީފައިވާ ގޮތުގައި، މިލްޓަން ތޫފާން ފްލޮރިޑާގެ ހުޅަނގު އައްސޭރިފަށަށް އަރާފައިވަނީ ބުދަ ދުވަހުގެ ރޭ ގާތްގަނޑަކަށް 8:30 ހާއިރު (ޖީއެމްޓީ ގަޑިން 00:30) ގައެވެ. ފްލޮރިޑާއަށް ތޫފާނު އެރި އެވަގުތު އޮތީ ކެޓަގަރީ ތިނެއްގެ ތޫފާނެއްގެ ގޮތުގައި ކަމަށާއި، ގަޑިއަކު 195 ކިލޯމީޓަރުގެ ބާރުމިނުގައި ވައިޖެހޭ ކަމަށް ރިޕޯޓްތައް ބުނެއެވެ.
މިލްޓަން ތޫފާންގެ ސަބަބުން މިހާތަނަށް ފްލޮރިޑާގެ ގާތްގަޑަކަށް 11 މީހުން މަރުވެފައިވާ ކަމަށް ކަމާބެހޭ އޮފިޝަލުންނާ ހަވާލާދީ ސްކައި ނޫހުން ރިޕޯޓުކޮށްފައިވެއެވެ.
ތޫފާން މިލްޓަންގެ ސަބަބުން ފްލޮރިޑާގައި އިތުރު 19 ތޫފާނެއް އުފެދިފައިވާކަން ކަށަވަރުވެފައިވާ ކަމަށް ވެސް ރިޕޯޓްތައް ބުނެއެވެ. ބުދަ ދުވަހު، ގާތްގަނޑަކަށް 45 ވަރަކަށް ތޫފާން އެރި ކަމަށް ރިޕޯޓްކޮށްފައިވާއިރު، ގިނައިން ރިޕޯޓްކޮށްފައިވަނީ އެ ސްޓޭޓްގެ މެދުތެރެއާއި އިރުމަތީ ސަރަހައްދުތަކުގައި ކަމަށް ފްލޮރިޑާގެ މޫސުމާ ބެހޭ އިދާރާއިން ބުނެއެވެ.
ތޫފާންގެ ސަބަބުން ވެއްޓިފައިވާ ގެއެއް. ފޮޓޯ/އޭޕީ
ތޫފާންގެ ސަބަބުން ސެއިންޓް ޕީޓާސްބާގްގެ ޓާމްޕާ ބޭ ރޭސް ބޭސްބޯލް ޓީމުގެ ދަނޑު ކަމަށްވާ ޓްރޮޕިކާނާ ފީލްޑްގެ ފޭބްރިކް ފުރާޅު އެއްލާލާފައިވާއިރު، އެ ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމަށް ރިޕޯޓުކޮށްފައެއްނުވެއެވެ.
ފްލޮރިޑާގެ ޓަމްޕާ ސިޓީގައި ތޫފާނުގެ ސަބަބުން ގަސްތައް ވެއްޓި، މަގުތައް ވަނީ ބަންދުވެފައެވެ. ކަރަންޓް ލައިންތައް ވެސް ކަނޑައިގެން ގޮސްފައިވާތަން ފްލޮރިޑާގެ މީޑިއާތަކުން އާންމުކޮށްފައިވާ ވީޑިއޯ ފުޓޭޖްތަކުން ފެނެއެވެ. ބައެއް އަވަށްތަކުގައި ފެންބޮޑުވި ނަމަވެސް ގެއްލުން ލިބުނު އަސްލު މިންވަރު ވަޒަން ނުކުރެވޭ ކަމަށް ޓަމްޕާގެ މޭޔަރު ޖޭން ކެސްޓާ ބޭއްވެވި ނޫސްވެރިންގެ ބައްދަލުވުމުގައި ވިދާޅުވިއެވެ.
ޓަމްޕާ، ޕާމް ބީޗް އަދި ސެއިންޓް ޕީޓް-ކްލިއާވޯޓާ ހިމެނޭހެން ފްލޮރިޑާގެ އެއާޕޯޓްތައް ބުރާސްފަތި ދުވަހު ބަންދުކޮށްފައި އޮތްއިރު، ޖައްސަން ހުއްދަ ދީފައިވަނީ ހަމައެކަނި ކުއްލި ހާލަތުގައި ޖައްސާ މަތިންދާބޯޓުތަކަށެވެ. ނަމަވެސް، ޓަމްޕާ އެއާޕޯޓު މާދަމާގެ ވަގުތެއްގައި ހުޅުވަން މިހާރު ހަމަޖެހިފައިވާ ކަމަށް އެ އެއާޕޯޓުން ބުނެއެވެ.
މިލްޓަން ތޫފާނުގެ ބާރު ކޮންމެ ވެސް ވަރަކަށް ދަށްވުމުން މިހާރު ވަނީ ޕޯސްޓް ޓްރޮޕިކަލް ސައިކްލޯން ދަރަޖައަށް ދަށްކޮށްފައި ކަމަށް އެމެރިކާގެ ނޭޝަނަލް ހަރިކޭން ސެންޓަރުން ބުނެއެވެ.
މިލްޓަން ތޫފާނަކީ ފާއިތުވި އަހަރުތަކުގައި އެޓްލާންޓިކް ކަނޑުގައި އުފެދުނު އެންމެ ބާރުގަދަ އެއް ތޫފާނެވެ.
މިލްޓަން ތޫފާން ފްލޮރިޑާއަށް އަރާފައިވަނީ، ފްލޮރިޑާއާއި، ޖޯޖިއާ، ސައުތު ކެރޮލައިނާ، ޓެނެސީ، ވާޖިނިއާ އަދި ނޯތު ކެރޮލައިނާ ހިމެނޭހެން ގަލްފު ކޯސްޓަށް އެރި ތޫފާން ހެލެން އެރިތާ ދެ ހަފުތާ ފަހުންނެވެ. އެ ތޫފާންގައި ގާތްގަޑަކަށް 225 މީހުން މަރުވެފައިވެއެވެ.