ރާއްޖޭގެ ކެޕިޓަލް މާކެޓްތައް ރެގިއުލޭޓް ކުރާ ބޮޑީ، ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން ފަސްޓް ނޭޝަނަލް ފައިނޭންސް ކޯޕަރޭޝަންގެ ރިއަލް އެސްޓޭޓް އެންޑް ހޮސްޕިޓާލިޓީ ފަންޑަށް އިންވެސްޓްމަންޓް ފަންޑު ލައިސަންސް ޙަވާލުކޮށްފިއެވެ.
ފަސްޓް ނޭޝަނަލް ފައިނޭންސް ކޯޕަރޭޝަންގެ ސީއީއޯ ޙަސަން ޒިޔަތު ވިދާޅުވީ އާ ފަންޑަކީ އިންވެސްޓަރުންނަށް ލިބޭ ވަރަށް ބޮޑު ފުރުސަތެއް ކަމަށެވެ.
"މި ފަންޑަކީ އެކި ފަންތީގެ އިންވެސްޓަރުންނަށް ސަބްސްކްރައިބް ކުރެވޭނެ ފަންޑެއް، އެންމެ މަދުވެގެން 10،000 ރުފިޔާއިން އިންވެސްޓް ކުރުމުގެ ފުރުސަތު އަމިއްލަ ފަރުދުންނަށް ވެސް ލިބިގެންދާނެ،" ޒިޔަތު ވިދާޅުވިއެވެ.
އަދި މި ފަންޑުގެ ސަބަބުން ރާއްޖޭގެ އެންމެ ފައިދާހުރި އެއް ދާއިރާ ކަމަށްވާ ރިއަލް އެސްޓޭޓް އަދި ހޮސްޕިޓާލިޓީ ދާއިރާގައި ބައިވެރިވުމުގެ ފުރުޞަތު އިންވެސްޓަރުން ފަހިވެގެންދާނެ ކަމުގައި ވެސް އޭނާ ވިދާޅުވިއެވެ.
ރިއަލް އެސްޓޭޓަށް އިންވެސްޓްކުރުމަކީ ތަނަވަސްކަން ބިނާކުރުމުގެ ބާރުގަދަ ސްޓްރެޓެޖީއެއްގެ ގޮތުގައި ޒަމާނުއްސުރެ ފާހަގަ ކުރެވޭކަމެކެވެ.
މާކެޓުން ގިނަ ފައިދާތަކެއް ލިބޭ އިރު އޭގެ ތެރޭގައި ފާހަގަކޮށްލެވޭ ރިޓާންގެ ފުރުސަތު އޮތުމާއި ޕޯޓްފޯލިއޯ ޑައިވާސިފިކޭޝަން އަދި ޕެސިވް އިންކަމް ސްޓްރީމްތައް އުފެއްދުން ހިމެނެއެވެ.
ފަސްޓަ ނޭޝަނަލް ރިއަލް އެސްޓޭޓް އެންޑް ހޮސްޕިޓާލިޓީ ފަންޑުގެ ސަބްސްކްރިޕްޝަނަށް އޮކްޓޫބަރު މަހު ހުޅުވާލަން ވަނީ ނިންމާފައެވެ. އިންވެސްޓަރުންނަށް ލިބޭ އިންވެސްޓްމަންޓް ފުރުސަތުތަކުގެ އިތުރު ތަފްސީލް ފަސްޓް ނޭޝަނަލް ފައިނޭންސް ކޯޕަރޭޝަންގެ ވެބްސައިޓްއިން ލިބިވަޑައިގަންނަވާނެއެވެ.