ރާއްޖެއަށް މިހާރު ކުރަމުންދާ ވިއްސާރައިގައި މި ހަފުތާގެ ނިޔަލަށް މޫސުން ގޯސްވާނެ ކަމަށް ލަފާކުރެވޭ ކަމަށް މޫސުމާ ބެހޭ ގައުމީ އިދާރާ މެޓް އޮފީހުން ބުނެފިއެވެ.
"ސަން"އަށް މައުލޫމާތު ދެމުން މެޓް އޮފީހުން ބުނީ މި ހަފުތާގެ ކުރިއަށް އޮތް ދެތިންދުވަހު މޫސުން ގޯސްވާނެ ކަމަށާއި ކަނޑުތައްވެސް ގަދަވާނެ ކަމަށް ލަފާކުރެވޭ ކަމަށެވެ.
"ކުރިއަށް އޮތް 24 ގަޑިއިރު މޫސުން ހަމަ ވިއްސާރަކޮން ދައްކަނީ. ކުރިއަށް އޮތް ދެތިން ދުވަހަށް ދެމިގެންދާނެ ކަމަށް ލަފާކުރެވޭ." މެޓް އޮފީހުން ބުންޏެވެ.
އެ އޮފީހުން ވަނީ ކުރިއަށް އޮތް 24 ގަޑިއިރު ރާއްޖޭގެ އެކި ހިސާބުތަކަށް ބޯކޮށް ވާރޭވެހި ވިއްސާރަކުރުމާއެކު ގުގުރާނެ ކަމަށް ލަފާކޮށްފައެވެ.
އެގޮތުން ރާއްޖޭގެ ހުޅަނގު ދެކުނާއި ހުޅަނގާއި އުތުރާ މެދުރާއްޖެތެރޭގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނެއްގައި ވައި ޖެހޭނެކަމަށް ވަނީ ލަފާކޮށްފައެވެ. އަދި ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ގަދަވާނެ ކަމަށް ލަފާކޮށްފައި ވާއިރު ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް އެ އޮފީހުން ވަނީ ލަފާކޮށްފައެވެ.
މެޓް އޮފީހުން ވަނީ ކަނޑުތައް ވެސް ގަދަވެފައި ވިލާގަނޑުގައި ވަރަށް ގަދަވާނެ ކަމަށް ލަފާކޮށްފައެވެ. އެގޮތުން މެދުރާއްޖެތެރެ އާއި އުތުރުގެ ކަނޑުތަކުގެ ރާޅުތަކުގެ އުސްމިނުގައި އަށް ފޫޓު ހުންނާނެ ކަމަށާއި ދެކުނުގެ ކަނޑުތަކުގައި ރާޅުގެ އުސްމިނުގައި ހަތް ފޫޓު ހުންނާނެ ކަމަށް އެ އޮފީހުން ވަނީ ލަފާކޮށްފައެވެ.
މެޓް އޮފީހުން ވަނީ މިއަދު މެންދުރު 1:30އިން ފެށިގެން އިރުއޮއްސި 7:30އާ ހަމައަށް މުޅި ރާއްޖެއަސް ހުދު ސަމާލު ނެރެފައެވެ.
މިހާރު ކުރަމުންމިދަނީ ހުޅަނގު މޫސުމުގެ ވިއްސާރަ ކަމަށް ބުނެ މެޓް އޮފީހުން ވަނީ ހުރިހާ ފަރާތްތަކުން ވެސް މޫސުމަށް ސަމާލުވުމަށް އެދިފައެވެ. އަދި ވަކިން ހާއްސަކޮށް ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އެ އޮފީހުން ވަނީ އިލްތިމާސް ކޮށްފައެވެ.