ކާމިޔާބު ގިނަ ފިލްމުތަކެއް އުފައްދާފައިވާ ކުޅަދާނަ ޑައިރެކްޓަރު ރާޖްކުމާރު ހިރާނީގެ އަލަތު ވެބް ސީރީޒުން ދަރިފުޅު ވީރު ހިރާނީ ފިލްމު އިންޑަސްޓްރީއަށް ނުކުންނަން ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.
ރާޖްކުމާރު ހިރާނީ ޑިޖިޓަލް ދުނިޔެއަށް ތައާރަފުވާ މި ސީރީޒްގެ ނަމަކީ "ޕްރިތަމް ޕެޑްރޯ"އެވެ. މި ވެބް ސީރީޒްގައި ހިރާނީގެ ދަރިފުޅު ވީރު ކުޅެން ހަމަޖެހިފައިވާ ރޯލަށް ކުރިން ހޮވާފައިވަނީ އެކްޓަރު ވިކްރާންތު މަސޭއެވެ.
ބޮޑު ކާމިޔާބީއެއް ހޯދި "ޓުވެލްތު ފެއިލް"ގެ އެކްޓަރު މި ސީރީޒްގެ ލީޑް ރޯލުން ވަކިވެފައިވަނީ މި ވަގުތު އޭނާގެ ޝެޑިއުލް ހުރިގޮތުން ވަގުތު ދެވެން ނެތުމުންނެވެ. އެހެންނަމަވެސް، މި ސީރީޒްގެ ކުޑަ ރޯލަކުން ނަމަވެސް ވިކްރާންތު ފެނުމުގެ ފުރުސަތު އެބައޮތް ކަމަށް ފިލްމީ ޚަބަރުތައް ބުނެއެވެ.
އެކްޓަރު ވިކްރާންތު މަސޭ--ފޮޓޯ/ކޮއިމޮއި
މިއީ ސައިބަ ކްރައިމް ޑްރާމާއެއް ނަމަވެސް ހެއްވާ މަޖާ ހާދިސާތަކެއް މި ވެބް ސީރީޒުން ފެންނާނެ ކަމަށް ރިޕޯޓުތައް ބުނެއެވެ. ރާޖްކުމާރު ހިރާނީގެ ކާމިޔާބު ފިލްމުތައް ކަމަށްވާ "މުންނާ ބާއީ އެމްބީބީއެސް" އަދި "ލަގޭ ރަހޯ މުންނާބާއީ"ގެ މުހިއްމު ރޯލް ކުޅުނު އެކްޓަރު އަރުޝަދު ވަރްސީ ވެސް "ޕްރިތަމް ޕެޑްރޯ"އިން ފެންނާނެއެވެ.
ބައްޕަގެ އަލަތު ވެބް ސީރީޒްއިން ފިލްމީ ދާއިރާއަށް ނުކުންނަން ވީރު ތައްޔާރުވަމުން އަންނައިރު މީގެ ކުރިން އޭނާ ވަނީ ސްޓޭޖް ތަމުސީލުތައް ކުޅެފައެވެ. ރާޖްކުމާރު ހިރާނީ އެންމެ ފަހުން ބެލުންތެރިންނަށް ގެނެސްދީފައިވަނީ މިދިޔަ އަހަރު ރިލީޒްކުރި ފިލްމު "ދުންކީ"އެވެ. ބޮޑު ކާމިޔާބީއެއް ހޯދި މި ފިލްމުގެ ލީޑް އެކްޓަރަކީ ޝާހްރުކް ޚާނެވެ.