އިންޑިއާގެ ފިލްމީތަރިންގެ ތެރެއިން އެންމެ ގިނަ އަދަދަކަށް އިޝްތިހާރު ކުޅޭ ފިލްމީތަރިއަކީ ބޮލީވުޑްގެ އެކްޓަރު އަކްޝޭ ކުމާރު ކަމަށް ސެލެބްރިޓީ އެންޑޯސްމެންޓު ރިޕޯޓަކުން ދައްކައިފިއެވެ.
އަހަރެއްގެ ތެރޭ އެންމެ ގިނަ ފިލްމުތަކުގައި މަސައްކަތްކުރާ ކަމަށް ބުނެ, މީގެ ކުރިން އަކްޝޭއަށް ވަނީ ގިނަ ބައެއްގެ ފާޑުކިޔުންތައް ވެސް އަމާޒުވެފައެވެ. ޓެމް އެޑެކްސް ކިޔާ ސެލެބްރިޓީ އެންޑޯޒްމެންޓް ރިޕޯޓަކުން ދައްކާ ގޮތުގައި އިޝްތިހާރުތަކުން އެންމެ ވިޒިބިލިޓީ މަތި ފިލްމީތަރިއަކީ ވެސް އަކްޝޭއެވެ.
އިންޑިއާގައި އެންމެ ގިނަ އިޝްތިހާރު ކުޅެ އާމްދަނީ ހޯދާ ބައެއް ތަރިން--ފޮޓޯ/ބޮލީވުޑްހަންގާމަ
މި ރިޕޯޓުގެ ނަތީޖާއިން ދައްކާ ގޮތުގައި އަކްޝޭގެ އިޝްތިހާރުތައް ކޮންމެ ދުވަހަކު ވެސް އެވްރެޖްކޮށް 22 ގަޑިއިރު ޓީވީ މެދުވެރިކޮށް ޓެލެކާސްޓް ކުރެއެވެ.
އަކްޝޭއަށް ފަހު މި ލިސްޓުގެ އެންމެ ކުރީގައި އުޅޭ ތަރިއަކީ ބޮލީވުޑްގެ ކިންގްޚާން ޝާހްރުކް ޚާނެވެ. ލިސްޓުގެ ތިންވަނައިގައި އަމީތާބް ބައްޗަން އޮތްއިރު ފިލްމީތަރިން ކަމަށްވާ ރަންވީރު ސިންގް، ރަންބީރު ކަޕޫރު، އާލިއާ ބަޓް، ކިއާރާ އަދުވާނީ އަދި މަޝްހޫރު ޓީވީ ސިލްސިލާ "އަނޫޕަމާ"ގެ ބަތަލާ ރުޕާލީ ގަންގުލީ ވެސް ވަނީ މި ލިސްޓުން ޖާގަ ހޯދާފައެވެ.
ފިލްމު އިންޑަސްޓްރީގެ އެންމެ ތަޖުރިބާ ހުރި އެކްޓަރުންގެ ތެރޭ ހިމެނޭ އަކްޝޭއަކީ ބޮލީވުޑްގެ އެންމެ އަގުބޮޑު ފިލްމީތަރިންގެ ތެރޭ ހިމެނޭ އެކްޓަރެކެވެ. ފިލްމު އިންޑަސްޓްރީގެ ތަފާތުހިސާބުތައް ދައްކާގޮތުން އަހަރެއްގެ މައްޗަށް އަކްޝޭއަށް ލިބޭ އާމްދަނީގެ އަދަދު 340 މިލިއަން ޑޮލަރަށް އަރައެވެ. މި އަހަރު ހަތަރު ފިލްމަކަށް އަކްޝޭ ސޮއިކޮށް، އޭގެ ތެރެއިން ބައެއް ފިލްމުތައް ރިލީޒްވެފައިވާއިރު އަންނަ އަހަރު އަކްޝޭ ހަ ފިލްމަކަށް ސޮއިކޮށްފައިވެއެވެ.