ޑުބާއީ އެއާޕޯޓްސްއިން ޑުބާއީ އިންޓަނޭޝަނަލް (ޑީއެކްސްބީ) އަދި ޑުބާއީ ވޯލްޑް ސެންޓްރަލް (ޑީޑަބްލިއުސީ) އެއާޕޯޓުތަކުގައި ދުނިޔޭގެ އެންމެ ބޮޑު ސޯލާ ރޫފް ސިސްޓަމް ޤާއިމުކުރުމަށް ނިންމައިފިއެވެ. މި ބޮޑު މަޝްރޫޢުގައި 62,904 ސޯލާ ޕެނަލް ހަރުކުރެވޭނެއެވެ.
މި ސިސްޓަމް މެދުވެރިކޮށް އަހަރަކު 60,346 މެގަވޮޓް ޕާ އަވާގެ ސާފު ހަކަތަ އުފެއްދޭނެ ކަމަށް ލަފާކުރެވެއެވެ. މިއީ ޑީއެކްސްބީގެ ހަކަތައިގެ ބޭނުމުގެ 6.5 އިންސައްތަ އަދި ޑީޑަބްލިއުސީގެ ހަކަތައިގެ ބޭނުމުގެ 20 އިންސައްތައެވެ. މި މަޝްރޫޢު ނިމޭނެކަމަށް ލަފާކުރެވެނީ 2026 ވަނަ އަހަރުއެވެ.
މި މަޝްރޫޢުގެ ސަބަބުން އަހަރަކު 23,000 ޓަނުގެ ކާބަން ޑައިއޮކްސައިޑް ބޭރުވުން މަދުކުރެވޭނެ ކަމަށް ބެލެވެއެވެ. މިއީ މަގުމަތިން 5,000 ކާރު ނެގުމާ ނުވަތަ 3,000 ގެއަށް އަހަރެއްގެ މުއްދަތަށް ކަރަންޓު ދިނުމާ އެއްވަރުގެ ކަމެކެވެ.
ސާފުހަކަތަ އުފެއްދުމަށް ތަފާތު ވަޞީލަތްތައް ދަނީ ބޭނުން ކުރެވެމުން ---
ޑުބާއީ އެއާޕޯޓްސްގެ ސީއީއޯ ޕޯލް ގްރިފިތްސް ވިދާޅުވީ "އިއާދަކުރަނިވި ވަސީލަތްތަކުން އުފައްދާ ކޮންމެ ކިލޯވޮޓަކުން ކާބަން ފުޓްޕްރިންޓް ކުޑަކޮށް، މުސްތަޤްބަލަށް ދެމެހެއްޓެނިވި ޚިދުމަތްތަކެއް ދިނުމާ ދިމާލަށް ކުރިއަށްދެވެނީ" ކަމަށެވެ.
މީގެ އިތުރުން، އެމިރޭޓްސް އެއާލައިންއިން ވެސް ވަނީ އެ ކުންފުނީގެ އިންޖިނިއަރިން ސެންޓަރުގެ ހިންގުންތަކުގެ 37 އިންސައްތަ ސާފު ހަކަތައިން ހިންގުމަށް ރާވާފައެވެ. މި ކުންފުނިން 39,960 ސޯލާ ޕެނަލް ހަރުކުރާނެއެވެ. މި މަޝްރޫޢުގެ ސަބަބުން އަހަރަކު 13,000 ޓަނަށްވުރެ ގިނަ ކާބަން ޑައިއޮކްސައިޑް ބޭރުވުން މަދުކުރެވޭނެ ކަމަށް ބެލެވެއެވެ.
މި މަޝްރޫޢުތަކަކީ ޑުބާއީ 2040 އާބަން މާސްޓާ ޕްލޭންގެ ދަށުން ދެމެހެއްޓެނިވި އާބަން ތަރައްޤީއާއި ގްރީން އިންފްރާސްޓްރަކްޗާއަށް އިސްކަންދިނުމުގެ ގޮތުން ކުރެވޭ މަސައްކަތްތަކެކެވެ. މި މަސައްކަތްތަކާއެކު، ޑުބާއީން ވަނީ 2030ވަނަ އަހަރާ ހަމައަށް 27 އިންސައްތަ ސާފު ހަކަތަ އުފެއްދުމުގެ ލަނޑުދަނޑި ހާސިލުކުރެވިދާނެ ކަމަށް ލަފާކޮށްފައެވެ.