މިއަދަކީ މުދައްރިސުން އިސްލާމް ދީނުގެ ހިދާޔަތުގެ މައްޗަށް ގައުމު ތަރުތީބު ކުރަން އަޒުމު އާކުރަންވީ ދުވަސް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ރާއްޖެ އިސްލާމްވި ދުވަހުގެ މުނާސަބަތުގައި މިއަދު ހެނދުނު ދަރުބާރުގޭގައި ބޭއްވި ރަސްމީ ޖަލްސާގައެވެ.
އެ ޖަލްސާގައި މިނިސްޓަރު ޝަހީމް ވިދާޅުވީ، މުދައްރިސުން ލިބިގަންނަންވީ ފިލާވަޅަކީ ރާއްޖެ އިސްލާމީ ހިދާޔަތުގެ ތެރެއަށް އައިސްފައި އޮތީ މުޢައްލިމެއް ނުވަތަ މުދައްރިސެއްގެ ސަބަބުން ކަމަށެވެ.
މިއަދުގެ ޖަލްސާގެ ތެރެއިން --- ފޮޓޯ/ ރައީސް އޮފީސް
މިއަދާ ހަމައަށް އިސްލާމީ ހިދާޔަތު ދެމިގެން އައީ މުދައްރިސުންގެ މަތިވެރި މަސައްކަތުން ކަމަށް މިނިސްޓަރު ވިދާޅުވިއެވެ.
އެހެންވީމަ މިއަދަކީ މުދައްރިސުން ވެސް އެ މަތިވެރި އަޒުމު އާކޮށް، އިސްލާމް ދީނުގެ ހިދާޔަތުގެ މައްޗަށް އަޅުގަނޑުމެން ގައުމު ތަރުތީބު ކުރުމަށް އާ އަޒުމަކާއެކު މަސައްކަތް ކުރަން ކަނޑައަޅަން ވީ ދުވަސް
މިއަދުގެ ޖަލްސާގައި ރައީސްގެ ދެކަނބަލުންނާއި ކެބިނެޓުގެ ބައެއް ވަޒީރުން --- ފޮޓޯ/ ރައީސް އޮފީސް
ހެޔޮ ބަސް ބުނުމަކީ އިސްލާމް ދީނުގެ ރުކުނެއް ކަން ފާހަގަކުރައްވައި ޝަހީމް ވިދާޅުވީ، ހެޔޮ ކަންތައްތަކަށް އަމުރު ކުރުމަކީ ވަރަށް މާތް ކަމެއް ކަމަށެވެ.
އުންމަތެއް ދެމިއޮތުމުގެ އެންމެ ވަރުގަދަ އަސާސަކީ ހެޔޮ ބަސް ބުނުން ކަމަށާއި އިސްލާމް ދީނުގެ ހަޟާރަތު ކުރިއެރުމަށް އަޒުމުގައި މަސައްކަތް ކުރާ ސަރުކާރެއް އޮތުމަކީ އުފާކުރަން ޖެހޭ ކަމެއް ކަން މިނިސްޓަރު ފާހަގަކުރެއްވިއެވެ.
އެ ހަލާތު ނެތްނަމަ އެތައް ގުނައަކަށް ހިތާމަ ކުރަން ޖެހޭނެ ކަމަށާއި އެފަދަ ސަރުކާރެއް އޮތުމަކީ ﷲ ދަރުމަކުރެއްވި ބޮޑު ނިޢުމަތެއް ކަމަށް ޝަހީމް ވިދާޅުވިއެވެ.
އަޅުގަނޑަށް ގަބޫލުކުރެވެނީ ﷲ ޢައްޒަވަޖަލް އިރާދަކުރެއްވިއްޔާ މި ދައުރުގެ ތެރޭގައި މި ކުރެވޭ މަސައްކަތްތަކަކީ މިއީ ކުރިއަށް މި އޮތް ގަރުނަށް ދިވެހި ގައުމު އިސްލާމީ އަގީދާއެކު، ވަރަގަދަ ކަމާއެކުގައި ފޯރުކޮށްދެވޭނެ ޒަމާނެކޭ އަޅުގަނޑުމެން ދެކެމުން މިދަނީ
އެހެންވެ، ހެޔޮ ކަންތައްތަކަށް އަމުރުކޮށް ނުބައި ކަންތައްތައް ނަހީކުރުމުގެ އަސާސް މުޖުތަމައުގައި ދަމަހައްޓަން ޖެހޭ ކަން ޝަހީމް ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، އިސްލާމީ ހަޟާރަތު ދިގު މުއްދަތަކަށް ރާއްޖޭގައި ދެމިއޮތީ، އެކި ޒަމާންތަކުގައި ވެރިން ކުރެއްވި މަސައްކަތްޕުޅުން ކަމަށެވެ.