ގޫގުލް އިން އެ ކުންފުނީގެ މަޝްހޫރު ވީޑިއޯ ކޯލިން އެޕްލިކޭޝަން، ގޫގުލް މީޓަށް އައު އިންޓަފޭސްއެއް ތަޢާރަފުކޮށްފިއެވެ.
މި އައު އިންޓަފޭސް ހުރިހާ ޔޫޒަރުންނަށް މިހާރު ލިބެން ފަށާފައިވާ ކަމަށް ރިޕޯޓުތަކުގައި ބުނެފައިވެއެވެ.
އައު އިންޓަފޭސްގައި ފާހަގަކޮށްލެވޭ އެންމެ ބޮޑު ބަދަލަކީ ސްކްރީނުގެ މަތީގައި އިތުރުކޮށްފައިވާ ޕިލްޝޭޕްގެ ސާޗް ބާއެވެ. މީގެ އިތުރުން، ކޮންޓެކްޓް ސަޖެސްޝަންތައް ދައްކާ ގޮތަށް ހަދާފައިވެއެވެ.
މި ސަޖެސްޝަންތައް ދައްކަނީ ޔޫޒަރުންގެ ކުރީގެ އިންޓަރެކްޝަންތަކަށް ބިނާކޮށް، ސްޓާ ކޮށްފައިވާ ކޮންޓެކްޓްތަކާއި ފަހުން މެއިލް ފޮނުވާފައިވާ ފަރާތްތަކުގެ މައްޗަށެވެ.
މީޓިންތައް ހެދުމާއި ޝެޑިއުލްކުރުމަށް ބޮޑެތި ބަޓަންތަކެއް އިތުރުކޮށްފައިވާއިރު، ގްރޫޕްތައް ހެދުމަށް ވެސް ވަކި ބޮޑު ބަޓަނެއް އިތުރުކޮށްފައިވެއެވެ. އަދި ކޯލްތަކުގެ ސަޖެސްޝަންތައް ގްރިޑެއްގައި ދައްކާ ގޮތަށް ހަދާފައިވެއެވެ.
މި ބަދަލުތަކުގެ އިތުރުން، ގޫގުލް މީޓްގެ ހޯމް ސްކްރީނުގައި އައު ޝޯޓްކަޓެއް އިތުރުކޮށްފައިވެއެވެ. "ކޯޑް" ގެ ނަމުގައި އިތުރުކޮށްފައިވާ މި ޝޯޓްކަޓް މެދުވެރިކޮށް މީޓިން ކޯޑު ޖަހައިގެން މީޓިންތަކަށް ވަދެވޭނެއެވެ.
މި ހުރިހާ ބަދަލުތަކެއް ގެނެސްފައިވަނީ ގޫގުލް މީޓްގެ 266 ވަނަ އަޕްޑޭޓާ އެކުގައެވެ. މިހާރު މި އަޕްޑޭޓް އެންޑްރޮއިޑް ފޯނުތަކަށް ޑައުންލޯޑްކުރެވެން ހުންނާނެއެވެ. ނަމަވެސް އައިފޯނުތަކަށް މި އަޕްޑޭޓް އަދި ލިބެން ފަށާފައި ނުވާކަމަށް ބައެއް ރިޕޯޓުތަކުގައި ބުނެފައިވެއެވެ.
ގޫގުލްއިން ފާއިތުވި މަސްތަކުގައި މީޓަށް ގިނަ ބަދަލުތަކެއް ގެނެސްފައިވެއެވެ. އޭގެ ތެރޭގައި ޕިކްސެލް-9 ޕްރޯ ފޯލްޑް ފޯނަށް ޚާއްޞަ ފީޗާއަކާއި، އޭއައި ބޭނުންކޮށްގެން މީޓިންތަކުގެ ނޯޓްސް ނެގޭ "ޓޭކް ނޯޓްސް ފޯ މީ" ކިޔާ ފީޗާ ހިމެނެއެވެ.
މި އައު ބަދަލުތަކާއެކު، ގޫގުލް މީޓްގެ ޔޫޒަރުންނަށް އިތުރު ފަސޭހަތަކެއް ލިބޭނެ ކަމަށް ބެލެވެއެވެ.