މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން މިހާތަނަށް 210 ޕްރޮގްރާމެއް އެކްރެޑިޓްކޮށްފިއެވެ.
ހަޔާ އެޑިއުކޭޝަން މިނިސްޓްރީން ބުނީ އެމްކިއުއޭއިން އަންނަނީ މަތީ ތައުލީމު ދޭ މަރުކަޒުތަކުން ކުރިޔަށް ގެންދިއުމަށް ހުށައަޅާ މަތީ ތައުލީމުގެ ޕްރޮގްރާމްތަށް މޯލްޑިވްސް ކޮލިފިކޭޝަން ފްރޭމްވޯކް (އެމްއެންކިއުއެފް)އަށް ފެތޭތޯ ބަލައި އެކްރެޑިޓް ކުރަމުން ކަމަށެވެ.
އެގޮތުން މި އަހަރުގެ އޮގަސްޓް މަހުގެ ނިޔަލަށް މަތީ ތައުލީމު ފޯރުކޮށްދޭ މަރުކަޒުތަކުން 227 ޕްރޮގްރާމެއް އެކްރެޑިޓް ކުރުމަށް ހުށައަޅާފައިވާ ކަމަށް ބުނެފައިވެއެވެ. އޭގެ ތެރެއިން 210 ޕްރޮގްރާމެއް އެކްރެޑިޓް ކުރެވިފައިވާއިރު، ބަކީ ހުރި 17 ޕްރޮގްރާމް އެކްރެޑިޓްކުރުމުގެ މަސައްކަތްތައް އަންނަނީ ކުރަމުންނެވެ.
އެމްކިއުއޭއިން އެކްރެޑިޓް ނުކުރާ ކޯހެއް ހިންގާނަމަ، އެ ކޯހެއް ހިންގާ ޔުނިވާސިޓީއެއް ނުވަތަ ކޮލެޖަކާމެދު އެ އޮތޯރިޓީން ފިޔަވަޅު އަޅައެވެ. އަދި ދަރިވަރުން ބައިވެރިވާ ކޯސްތަކަކީ އެމްކިއުއޭއިން އެކްރެޑިޓް ކޮށްފައިވަ ކޯސްތަކެއްކަން ޔަގީން ކުރުމަށް މީގެ ކުރިން އެ އޮތޯރިޓީން ވަނީ އިލްތިމާސްކޮށްފައެވެ.
ރާއްޖޭގެ މަތީތައުލީމުގެ ފެންވަރު ރަނގަޅުކޮށް، ރާއްޖޭގެ ޔުނިވާސިޓީތަކަކީ ބޭރުގެ ދަރިވަރުން އައިސް ތައުލީމް އުނގެނޭނެ ފެންވަރުގެ ތަންތަނަށް ހެދުމަކީ މި ސަރުކާރުގެ އަމާޒެއްކަން ފާހަގަކޮށް މިނިސްޓްރީން ބުނީ، މަތީ ތައުލީމުގެ ފެންވަރު ރަގަޅުކުރުމަށް ކުރެވެންހުރި މަސައްކަތްތައް ހަޔާ އެޑިއުކޭޝަން މިނިސްޓްރީން ކުރާކަމަށެވެ.