މިއީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، ފެއާ ޓްރޭޑް ޑިޕާޓްމަންޓްގެ ޕޮލިޓިކަލް ޑިރެކްޓަރު އަހުމަދު އާލިމްގެ ލިޔުއްވުމުގެ ތަރުޖަމާއެވެ.
މި އަހަރުގެ އޮގަސްޓް މަހުގެ 15 އިން އޮގަސްޓް 28 އަށް ރާއްޖެ އިން ޗައިނާއަށް ދަތުރުކޮށް، ބެލްޓް އެންޑް ރޯޑް އިނިޝިއޭޓިވް (ބީއާރުއައި) ޕާޓްނަރ ގައުމުތަކުގެ ސެމިނާ އޮން ކޮމާޝަލް ސާރކިއުލޭޝަން ސިސްޓަމް ކޮންސްޓްރަކްޝަން އެންޑް ޑިވެލޮޕްމަންޓްގައި ބައިވެރިވުމުގެ ޝަރަފު އަޅުގަނޑަށް ލިބުނެވެ. މި ދަތުރަކީ ޗައިނާގެ ތާރީޚާއި ސަގާފަތާއި އާ އުފެއްދުންތަކުގެ މައުލޫމާތާއި، ތަޖުރިބާކުރުމަށް ލިބުނެވެ.
ރިސާޗް އެންޑް ޑިވެލޮޕްމަންޓާއި ޓެކްނޮލޮޖީއާއި ދެމެހެއްޓެނިވި ލަނޑުދަނޑިތަކުގައި ފާހަގަކޮށްލެވޭ ކުރިއެރުންތަކެއް ލިބިފައިވާ ޗައިނާއިން ވަނީ ބައިވެރި ގައުމުތަކަށް ޢިބްރަތްތެރި ތަރައްޤީގެ ކުރިއެރުންތަކެއް ދައްކުވައިދީފައެވެ. އަޅުގަނޑުގެ ދަތުރުގެ ސަބަބުން ޗައިނާގެ ރައްޔިތުންނާ ގުޅުންބަދަހިކޮށް، އެކުގައި މަސައްކަތް ކުރުމަށް ފުރުސަތު ލިބުނެވެ. ޗައިނާގެ އިންފްރާސްޓްރަކްޗަރ ތަރައްގީގެ ފެންވަރަކީ ހަގީގަތުގައި ވެސް ވިސްނާނުލެވޭ ފެންވަރެއް ކަމަށާއި، ޓެކްނޮލޮޖީ އާންމު ދިރިއުޅުމަށް އެއްވެސް ދަތިކަމެއް ނެތި އިންޓަގްރޭޓްކޮށް، ރައްޔިތުންގެ ދިރިއުޅުމުގެ ފެންވަރު ވަރަށް ބޮޑަށް ކުރިއަރުވާފައިވާ ކަމަށެވެ.
ޗައިނާގެ ސިޓީތަކަކީ މުއްސަނދި ތާރީޚެއްގައި ފުރިފައިވާ، ޒަމާނީ ހަލަބޮލި ސިޓީތަކާ ވަރަށް ތަފާތު، ޗައިނާ މާނަކުރާ ސަގާފަތާއި އާ އުފެއްދުންތަކުގެ އެއްބައިވަންތަކަމުގެ ކުޑަ ހިލަމެއް ލިބިގެންދާ ތަނެކެވެ. އަޅުގަނޑު ބައިވެރިވި ސެމިނާއަކީ އަކީ ވަރަށް ފުރިހަމައަށް އިންތިޒާމްކުރެވިފައިވާ ސެމިނާއެކެވެ. މި ސެމިނާ އިންތިޒާމް ކުރި ފަރާތްތަކުގެ ފަރާތުން އެތަނަށް އަޅުގަނޑާއި އެހެން ބައިބެރިން ދިއުމުން ހޫނު މަރުހަބާއެއް ކިޔައި، ސެމިނާއަށް ރެޖިސްޓަރ ކުރުމުގެ ކަންތައްތައް ކުރިއަށް ގެންދިޔައެވެ. އަދި މިދަތުރުގައި ޗައިނާގައި އަޅުގަނޑު ހުރި ދުވަސްވަރު ހުރުމާއި ކެއުމުގެ ކަންތައްތައްވެސް ވަނީ ފުރިހަމައަށް ފޯރުކޮށްދީފައެވެ.
މި ސެމިނާ ހުޅުވުމުގެ ރަސްމިއްޔާތުގައި ބައިވެރިވެ ކުރެވުނު ތަޖުރިބާއަށް ބަލާއިރު، ވަކިން ޚާއްޞަކޮށް ހަނދާން އާވެގެން ދިޔައީ، އަޅުގަނޑުމެންނަށް އީޖޭސީސީސީއެސްއީ އާއި އައިބީއޯގެ ޝަރަފުވެރި ލީޑަރުން މަރުޙަބާ ކިޔާ ފޯރުކޮށްދިން މެހްމާންދާރީއެވެ. ޗައިނާގެ އިސް މުއައްސަސާތަކުގެ ބޭފުޅުންނާއި، ޕްރޮފެސަރުންނާއި ސިނާއަތުގެ ތަޖުރިބާކާރުން ކުރިއަށް ގެންދިޔަ މި ޕްރެޒެންޓޭޝަންތަކާއި ލެކްޗަރތަކުގައި ޗައިނާގެ ރައީސް ޝީ ޖިންޕިން އިފްތިތާހު ކުރެއްވި ބީއާރުއައި އާއި ވެރިކަމާއި އިސްލާހުކުރުމުގައި ޗައިނާގެ ލީޑަރުން ގެންގުޅޭ ސްޓްރެޓެޖީތައް ހިމެނެ އެވެ.
މި މަހާސިންތާގައި ޚާއްޞަ ސަމާލުކަމެއް ދެވިފައިވަނީ ޗައިނާގެ ކާބޯތަކެތީގެ ރައްކާތެރިކަމާއި ފެންވަރު ހިފެހެއްޓުމުގެ މިންގަނޑުތަކުގެ އިތުރުން، އެ ޤައުމުގެ މުދާ ދައުރުވުމާއި ލޮޖިސްޓިކްސްގެ ނިޒާމުތަކަށެވެ. އޭގެ ތެރެއިން އެއް ކަމަކީ ޑިޖިޓަލް ޒަމާނުގައި ވިޔަފާރި ހިންގާ ގޮތަށް އިންގިލާބެއް ގެނެސްފައިވާ ޗައިނާގެ އީ-ކޮމާސް ޕްލެޓްފޯމްތަކުގެ ހިންގާގޮތެވެ. ޒިންފާދީ މާކެޓަށް ކުރި ޒިޔާރަތަކުން އެ މާކެޓް އުފެދުނު ގޮތުގެ ތަފްސީލެއް ލިބި، ވިޔަފާރި އިނޮވޭޓިވް ގޮތްގޮތައް ތަރައްޤީކުރާނެ ގޮތުގެ ހިޔާލުތައް ލިބިގެންދިޔައެވެ.
އަޅުގަނޑުމެންގެ ދަތުރުގައި ޖިމޭ ކުންފުނީގެ ވިޔަފާރިތަކާއި ކައިނިއޯ (އަލީބާބާ) ގެ ކުރިއަރަމުންދާ މަސައްކަތްތަކުގެ އިތުރުން އެހހެނިހެން ވިޔަފާރިތައް ހިންގާގޮތް ފެނި ކަންކަން ދަސްކުރުމުގެ ފުރުޞަތުތައްވެސް ލިބިގެންދިޔައެވެ. ބެއިޖިންގގައި އަޅުގަނޑުމެންނަށް ލިބުނު އުފާވެރި ފުރުޞަތުތަކުގެ ތެރެއި ތާރީހުން ފުރިގެންވާ ޗައިނާގެ މަޝްހޫރު ސަމަރ ޕެލަސްއާއި ދަ ގްރޭޓް ވޯލްއަށް ޒިޔާރަތްކުރަން ލިބުނު ފުރުސަތު ފާހަގަކޮށްލަމެވެ
މީގެއިތުރުން ބެއިޖިންގއިން ޓައި ކަންގް ސިޓީއަށް ހައިސްޕީޑް ރޭލުގައި ކުރި ދަތުރަކީ ޚާއްޞަ ތަޖުރިބާއެކެވެ. މިއީ ޗައިނާގެ ދަތުރުފަތުރުގެ ވަސީލަތްތައް ތަރައްޤީވެގައިވާ ވަރު ދަސްވެ، ޤައުމުގެ ތަރައްޤީ ދައްކުވައިދިން ތަޖުރިބާއެކެވެ. އަދި ޓައި ކަންގް ސިޓީގައި ޖިއާންގްސޫ ޖެނެރަލް ޕްރޮޓެކް ކޯ ލިމިޓެޑުން އިންތިޒާމްކުރި އިލެކްޓްރިކް ވެހިކަލްތަކުގެ ރައްކާތެރިކަމާ ބެހޭ ސެމިނާއެއްގައި ބައިވެރިވުމުގެ ފުރުޞަތު ލިބުނެވެ. މި ސެޝަނުން ގިނަ މަޢުލޫމާތުތަކެއް ލިބި، އިލެކްޓްރިކް ވެހިކަލް ދާއިރާގެ އެކި އުފެއްދުންތެރިންނާއި ސަޕްލަޔަރުންނާ ގުޅުން ބަދަހިކުރުމުގެ ފުރުޞަތު ލިބުނެވެ.
އަޅުގަނޑުމެންގެ ދަތުރުގެ ބައެއްގެ ގޮތުން ކުންޝަން ގުޑް ލައިފް ހައުސްހޯލްޑް ބޯޑް ކޯ ލިމިޓެޑަށް ކުރި ޒިޔާރަތަކީވެސް ވަރަށް މުހިންމު ތަޖުރިބާއެކެވެ. ކުންފުނީގެ ވެރިން އޯގާތެރިކަމާއެކު އެ ތަނުގެ މަސައްކަތްތަކާއި ޓެކްނޮލޮޖީގެ ރޮނގުން ހާސިލްކޮށްފައިވާ ކުރިއެރުންތަކުގެ ތަފްސީލީ މަޢުލޫމާތު ފޯރުކޮށްދިނެވެ. މި ތަޖުރިބާއިން ޗައިނާގެ އުފެއްދުންތެރިކަމުގެ ދާއިރާގައި އައު ގޮތްތަކާއި ފެންވަރު ރަނގަޅުކުރުމަށް ދެވޭ އަހައްމިއްޔަތުކަން ހާމަވެގެންދިޔައެވެ.
ތާރީޚީ ގޮތުން މުއްސަނދި ކިއަންޑެންގް ގަދީމީ ރަށަށް ކުރެވުނު ޒިޔާރަތުން، ޗައިނާގެ ޒަމާނީ ކާމިޔާބީތަކާއި ސަގާފީ ތަރިކަތަކުގެ ޝައުޤުވެރި މަންޒަރެއް ފެނިގެންދިޔައެވެ. މި މުއްސަނދި ތަޖުރިބާއިން ލިބުނު މަޢުލޫމާތުގެ އަލީގައި، އަޅުގަނޑުގެ ދިވެހިރާއްޖެއަށް އަމަލީ ސިފަ ގެނެވިދާނެ ބައެއް ކަންތައްތައް ފާހަގަކުރެވެއެވެ.
އެންމެ ފުރަތަމަ ކަމަކީ، ޗައިނާގެ ހަރުދަނާ އުމްރާނީ ތަރައްޤީގެ ރޭވުންތެރިކަމުގެ ނަމޫނާ ބޭނުންކުރުމެވެ. މިއީ އަޅުގަނޑުމެންގެ ދަތުރުފަތުރާއި ލޮޖިސްޓިކްސްގެ ދާއިރާއަށް ނުހަނު ފައިދާކުރާނެ، އަދި ރަށްތަކުގެ މެދުގައި ވިޔަފާރިއާއި ގުޅުން ބަދަހިވެގެންދާނެ ކަމެކެވެ. ދެވަނަ ކަމަކީ، ކާބޯތަކެތީގެ ރައްކާތެރިކަމުގެ ވަރުގަދަ މިންގަނޑުތަކަށް އިސްކަންދިނުމާއި، ހަރުދަނާ ސަޕްލައި ޗެއިންތައް ގާއިމުކުރުމެވެ. މިއީ އަޅުގަނޑުމެންގެ ދަނޑުވެރިކަމުގެ އުފެއްދުންތެރިކަން އިތުރުވެ، މުޖުތަމަޢުގެ ދުޅަހެޔޮކަން ކަށަވަރުކުރެވޭނެ ކަމެކެވެ. މީގެ އިތުރުން، އަޅުގަނޑަށް ފާހަގަކުރެވުނު އައު އީޖާދުތަކާއި ވިޔަފާރީގެ ރޫޙަކީ، ދިވެހި ވިޔަފާރިވެރިންނަށް ހިތްވަރުލިބޭނެ ކަމެކެވެ.
ޚުލާޞާކޮށް ދަންނަވާނަމަ، ޗައިނާގައި އަޅުގަނޑަށް ލިބުނު ތަޖުރިބާއަކީ އާދަޔާ ޚިލާފު ތަޖުރިބާއެކެވެ. އެއީ ޓެކްނޮލޮޖީގެ ކުރިއެރުމުގެ އެންމެ ކުރީ ސަފުގައި ހިމެނޭ ޤައުމެއްގެ ގޮތުގައި، އެއްބާރުލުމުގެ ރޫޙާއި، ބައިނަލްއަޤްވާމީ ބައިވެރިކަން އިތުރުކުރުމަށް ކެނޑިނޭޅި މަސައްކަތްކުރާ ޤައުމެއްގެ ސިފަ ފެނިގެންދިޔަ ދަތުރެކެވެ. މި އަގުހުރި ފުރުޞަތު ދެއްވި ކަމަށްޓަކައި ޗައިނާ ސަރުކާރަށް އިޚްލާޞްތެރިކަމާއެކު ޝުކުރު ދަންނަވަމެވެ.
ޗައިނާގެ ވަސީލަތްތަކާއި ޢިލްމު ބައިވެރި ޤައުމުތަކާ ހިއްސާކުރުމުގެ ޚާއްޞަ ޝައުޤުވެރިކަމަކީ، ފާގަތި މުސްތަޤްބަލަކަށް ގުޅިގެން ކުރިއެރުމާއި ތަރައްޤީގެ ތަޞައްވުރުގެ ހެކިތަކެކެވެ. އަޅުގަނޑުމެން އެކުގައި ހިނގަމުން މިދަނީ، އަޅުގަނޑުމެންގެ ޤައުމުތަކަށާއި، އަޅުގަނޑުމެންގެ ދުނިޔޭގެ މުޖުތަމަޢަށް ފައިދާހުރި ކުރިއެރުންތަކަކާ ދިމާއަށެވެ.