މިއީ މޯލްޑިވްސް މީޓިއޮރޮލޮޖިކަލް ސާވިސްގެ ފަރާތުން ޗައިނާއަށް ވަޑައިގެންނެވި އަހުމަދު ހުސައިންގެ ލިޔުއްވުމެއްގެ ތަރުޖަމާއެވެ.
ޗައިނާގެ ނަންޖިން އިންފޮމޭޝަން ސައިންސް އެންޑް ޓެކްނޮލޮޖީ ޔުނިވާސިޓީ (އެންޔޫއައިއެސްޓީ) ގައި ދެ މަސްދުވަހުގެ ތަމްރީން ޕްރޮގްރާމެއްގައި ބައިވެރިވުމަށް ތައްޔާރުވަމުންދިޔައިރު، އަޅުގަނޑުގެ ހިތުގައި އުފެދުނީ އުއްމީދެވެ. އަދި ކުރިމަތިވާނެ ކަންތައްތަކާމެދު ޝައުޤުވެރިކަމެވެ. "ޗައިނާއަކީ ކޮންކަހަލަ ތަނެއްބާއޭ؟،" "ފިނިކަން އަޅުގަނޑަށް ތަހައްމަލުކުރެވޭނެބާއޭ؟" އަދި "އެ ތަނުގެ ރަހަތަކަށް އަޅުގަނޑަށް އަހުލުވެރިވެވޭނެބާއޭ؟" ފަދަ ސުވާލުތައް އަޅުގަނޑުގެ ހިތުގައިތުގައި އުފެދުނެވެ. މި ތަޖުރިބާއިން އަޅުގަނޑަށް އިތުރު މަޢުލޫމާތު ލިބުމުގެ އިތުރުން، ޗައިނާގެ ސަގާފަތާއި، މީހުންގެ އިތުރުން ޓެކްނޮލޮޖީގެ ރޮނގުން ކުރިއަރާފައިވާ މިންވަރާމެދު ފުން ވަޒަންކުރުމެއް އުފެދޭނެކަމެއް އޭރު އަޅުގަނޑަކަށް ނޭނގުނެވެ.
ރާއްޖޭގެ އެކި ސަރުކާރު މުއައްސަސާތަކުން 13 އެކުވެރިންނާއެކު، އަޅުގަނޑުމެން ޗައިނާއަށް ދަތުރުކުރީ 14 ސެޕްޓެމްބަރ 2023 ގައެވެ. އަޅުގަނޑުމެންގެ ތަމްރީނު ބޭއްވުނީ ނުއިސްޓްގައި ހުންނަ ދުނިޔޭގެ މޫސުމާބެހޭ ޖަމްޢިއްޔާގެ (ޑަބްލިޔުއެމްއޯ) ސަރަޙައްދީ މަރުކަޒުގައެވެ. ފުރަތަމަ ދުވަހުން ފެށިގެން، އެތަނުގެ މާޙައުލުގެ ރައްކާތެރިކަމާއި ސާފުތާހިރުކަން އަޅުގަނޑަށް ފާހަގަކުރެވުނެވެ. ޝަހަރުތައް ވަރަށް ސާފުތާހިރުކޮށް ހުރިއިރު، ޝަހަރުތެރޭގައި އުޅުމުގައި ރައްކާތެރިކަން އިހުސާސްކުރެވުނެވެ.
ބަހުގެ ހުރަސްތަކާއެކު ވެސް، މީހުންގެ އަދަބުވެރިކަމާއި ރަޙްމަތްތެރިކަމުގެ ސަބަބުން، އެ ގައުމުގައި އުޅުމަކީ ހިތްގައިމު ތަޖުރިބާއަކަށް ވިއެވެ. ޗައިނާގައި ޓެކްނޮލޮޖީގެ ކުރިއެރުންތަކުން ގިނަ ހުރަސްތަކެއް ނައްތާލާފައިވާއިރު، އޭގެ ތެރޭގައި ބަހުގެ ހުރަސް ވެސް ހިމެނޭތީ، މުއާމަލާތްކުރުން ވެސް ފަސޭހައެވެ.
ތަމްރީނު ޕްރޮގްރާމްވީ ވަރަށް ފަރުވާތެރިކަމާއެކު ރޭވި، އަދި ވަރަށް ޤާބިލު ޕްރޮފެސަރުންނާއި ޕީއެޗްޑީ ހާސިލުކޮށްފައިވާ ޕްރޮފެސަރުން ކުރިއަށް ގެންދިޔަ ޕްރޮގްރާމަކަށެވެ. ދެވުނު ލެކްޗަރުތަކަކީ މަޢުލޫމާތު ފުރިހަމަ، ޝައުޤުވެރިކަން އުފެދޭ އަދި އިންޓަރެކްޓިވް ލެކްޗަރުތަކެކެވެ. އަޅުގަނޑުމެންނަށް ޢަމަލީ ތަމްރީނުތަކުގެ ސެޝަންތަކުގައި ބައިވެރިވުމުގެ ފުރުސަތު ވެސް ލިބުނެވެ. މި ސެޝަންތަކުން ނަޒަރިއްޔާތުގެ މަޢުލޫމާތު ޢަމަލީ ގޮތުން ދައްކުވައިދީ، ހަގީގީ ދުނިޔޭގައި ބޭނުންކުރެވިދާނެ އަމަލީ ހުނަރުތައް ދަސްކޮށްދިނެވެ.
ޗައިނާގައި ހޭދަކުރި ވަގުތުގެ އެންމެ އުފާވެރި ކަންތައްތަކުގެ ތެރޭގައި އެތަނުގެ ރަށްވެހި ކާނާ ހިމެނެއެވެ. ޗައިނާގެ ކެއުންތަކުގައި ފެހި ތަރުކާރީއާއި މަހުގެ ދުޅަހެޔޮ ބެލެންސެއް އޮތްކަން އަޅުގަނޑަށް އެނގުނެވެ. ޞިއްޙަތާއި ދުޅަހެޔޮކަމަށް ދެވޭ އަހައްމިއްޔަތުކަން ފެނުނީ ހަމައެކަނި ކާނާއިން ނޫނެވެ. އެތަނުގެ މީހުންގެ ދިރިއުޅުމުގެ ވައްޓަފާޅިން ވެސް ފެނުނެވެ. ހުރިހާ އުމުރުފުރައެއްގެ، ދެ ޖިންސުގެ މީހުން ޕާކުތަކުގައި ނުވަތަަ ޝޮޕިން މޯލްތަކުގެ ކުރިމަތީގައި ހުންނަ ހުސް ތަންތަނުގައި އެއްވެ، އެކުގައި ކަސްރަތުކުރާ މަންޒަރު ފެނުނެވެ. މިއީ ޗައިނާގެ މީހުން ރަނގަޅު ޞިއްޙަތެއްގައި ތިބުމަށް ކުރާ މަސައްކަތުގެ ހެއްކެކެވެ.
އަޅުގަނޑުމެންގެ ތަމްރީނު ތާވަލުގައި ހިމެނިފައިވަނީ ޝައުޤުވެރިކަން ހުރި ފިލާވަޅުތަކާއި، ހިތްގައިމު ތަންތަން ބަލާ ދަތުރުތަކާއި، އެކި ޔުނިވާސިޓީތަކަށް ކުރި ޒިޔާރަތްތަކާއި، އަދި ސަގާފީ ކްލާސްތަކެވެ. މި ސަގާފީ ސެޝަންތަކަކީ ޚާއްޞަކޮށް ވަރަށް މަޢުލޫމާތު ފުރިހަމަ ސެޝަންތަކެކެވެ. މި ސެޝަންތަކުން އަޅުގަނޑުމެންނަށް ޗައިނާގެ މުއްސަނދި ތާރީޚާއި އާދަކާދަތައް ތަޢާރަފުކޮށްދިނެވެ. ތަފާތު ދިރިއުޅުމުގެ ވައްޓަފާޅިތަކާއި، އެތަނުގެ ރަށްވެހި ކާނާއާއި، ޚާއްޞަ ސަގާފީ އާދަތަކަކީ ހަގީގަތުގައި ވެސް ވަރަށް ޝައުޤުވެރި ކަންތައްތަކެކެވެ. މީގެ ގާތްގަނޑަކަށް 5000 އަހަރު ކުރިން ފެށިގެން ދަމަހައްޓަމުން އަންނަ ޗައިނާގެ ސަގާފަތާއި އާދަކާދަތަކަށް އެ މީހުން ދޭ އިޙްތިރާމަކީ ހަގީގަތުގައި ވެސް ތަޢުރީފުކުރެވޭނެ ކަމެކެވެ.
އަޅުގަނޑުމެން ޗައިނާގެ އެކި ސަރަޙައްދުތަކަށް ދަތުރުކުރިއިރު، އޭގެ ތެރޭގައި އަންހުއީ ޕްރޮވިންސް، ލިޔަންޔުންގަން ސިިޓީ، ވުޝީ ސިޓީ، ގުއަންޒޫ ސިޓީ އަދި ޝަންހާއީ ސިޓީ ހިމެނޭގޮތަށް، އެ ގައުމުގެ ޓެކްނޮލޮޖީގެ ކުރިއެރުންތަކާއި އެ ކުރިއެރުންތައް ތަރައްޤީއަށް ބޭނުންކޮށްފައިވާ ގޮތް ދުށީމެވެ. އަޅުގަނޑުމެން ޒިޔާރަތްކުރި ކޮންމެ ސިޓީއަކީ ވެސް ހަމައެކަނި ޓެކްނޮލޮޖީގެ ގޮތުން ކުރިއަރާފައިވާ ތަންތަން އެކަންޏެއް ނޫނެވެ. އެއީ ވަރަށް ސާފުތާހިރު، އަދި ގުދުރަތީ ރީތިކަން ދެމެހެއްޓުމަށް ބޮޑު އިސްކަމެއްދީފައިވާ ތަންތަނެވެ.
ޚާއްޞަކޮށް ހަނދާނުގައި ހުރީ އަންހުއީ ޕްރޮވިންސްގެ ކުޑަ ރަށެއްކަމުގައިވާ ދަވާނަށް ކުރި ޒިޔާރަތެވެ. މި ރަށަކީ ކުރީގައި ވަރަށް ފަގީރު ރަށެކެވެ. ނަމަވެސް މިހާރު އެ ރަށަށް ވަނީ ފާހަގަކޮށްލެވޭފަދަ ބަދަލުތަކެއް އައިސްފައެވެ. ޗައިނާގެ ސަރުކާރުން ވަނީ އެ ރަށުގެ ރައްޔިތުންނަށް ޒަމާނީ ގެތައް އަޅައިދިނުމުގެ އިތުރުން، ދަނޑުވެރިކަމާއި ރަނގަޅު އުމްރާނީ ވަސީލަތްތަކުގެ ޒަރީއާއިން އާމްދަނީ ހޯދުމުގެ ފުރުސަތުތައް ވެސް ހޯދައިދީފައެވެ. ރަށުގެ ކުރީގެ ބައިތަކާއި އައު ބައިތަކުގެ ތަފާތަކީ ފަގީރުކަން ނައްތާލުމަށާއި ރައްޔިތުންގެ ދިރިއުޅުމުގެ ފެންވަރު ރަނގަޅުކުރުމަށް ޗައިނާއިން ކުރާ މަސައްކަތުގެ ވަރުގަދަ ހެއްކެކެވެ.
ބައެއް ހުޅަނގުގެ މީޑިއާތަކުން ޗައިނާއަކީ ޒިޔާރަތްކުރަން ރައްޓެހި ނޫން ނުވަތަ ރައްކާތެރިނޫން ޤައުމެއްގެ ގޮތުގައި ދައްކާ ގޮތާ ޚިލާފަށް، އަޅުގަނޑުގެ ތަޖުރިބާއަކީ މުޅިން ރަނގަޅު ތަޖުރިބާއެކެވެ. މީހުން ތިބީ ވަރަށް ހޫނު މަރުޙަބާއެއް ކިޔާ ގޮތަށެވެ. ދަތުރުފަތުރު ކުރެވެނީ އަތްފޯރާހައި ހެޔޮކޮށެވެ. އަދި ޢާންމު ދަތުރުފަތުރުގެ ނިޒާމު، ޚާއްޞަކޮށް މެޓްރޯ، ވަރަށް ސާފުތާހިރުވެފައި ހަލުވިއެވެ. ޙަޤީޤަތުގައި ޗައިނާއަކީ އަޅުގަނޑު މިހާތަނަށް ޒިޔާރަތްކުރި އެންމެ ރައްކާތެރި ޤައުމެވެ. އެ ޤައުމުގެ ރޭގަނޑުގެ ދިރިއުޅުމާއި، ޒަމާނީ ޓެކްނޮލޮޖީ، އަދި މުޅި ޤައުމުގައި އޮތް ޖޯޝާއި ފޯރިންވަނީ އަޅުގަނޑުގެ ހިތުގައި ދެމިހުންނާނެ އަސަރެއް ކޮށްފައެވެ.
ފުރަން ކައިރިވަމުން ދިޔަވަރަކަށް، ދާން ބޭނުން ނުވާކަން އަޅުގަނޑަށް އިހުސާސްވިއެވެ. ދެ މަސްދުވަހުގެ މުއްދަތު ހަފްތާއެއްގެ ތެރޭގައި ފާއިތުވެގެން ދިޔަހެން ހީވިއެވެ. އެންޔޫއައިއެސްޓީ ކޮމިއުނިޓީން ލިބުނު ހޫނުކަމާއި މެހެމާންދާރީގެ ސަބަބުން އެތަން ދެވަނަ ގެއެއްހެން ހީވެ، ދިއުމަކީ ހިތާމަވެރި ކަމަކަށް ވިއެވެ. އަޅުގަނޑުގެ ހަމައެކަނި ހިތާމައަކީ ނަންޖިންގައި ގަދަ ފިނިވުމުގެ މޫސުން ފެށުމުގެ ހަފްތާއެއް ކުރިން ދާންޖެހުމެެވެ. މިއީ އަޅުގަނޑު ވަރަށް ބޮޑަށް އިންތިޒާރުކުރި ތަޖުރިބާއެކެވެ. ދިވެހިރާއްޖެ ފަދަ އަބަދުވެސް ހޫނު މޫސުމެއް އޮންނަ ގައުމަކުން އައި މީހެއްގެ ހައިސިއްޔަތުން، އަޅުގަނޑު ވަރަށް ބޮޑަށް ބޭނުންވީ ފުރަތަމަ ފަހަރަށް ގަދަ ފިނި ތަޖުރިބާކޮށްލާށެވެ. އަޅުގަނޑު އުއްމީދުކުރަނީ ޗައިނާއަށް ފިނި މޫސުމުގައި އަނބުރާ ގޮސް މި ތަޖުރިބާ އަދި ކުރެވޭނެ ކަމަށެވެ.
ނިމިގެން ދިޔައިރު، ޗައިނާއަށް ކުރި ދަތުރަކީ ހަމައެކަނި ތަމްރީން ޕްރޮގްރާމެއް ނޫނެވެ. މިއީ ވަރަށް މުހިންމު ޤައުމަކާއި އެތަނުގެ ރައްޔިތުންނާ ބެހޭގޮތުން އަޅުގަނޑުގެ މައުލޫމާތު އިތުރުކޮށްދިން، ލޯ ހުޅުވައިލި މަޖާ ދަތުރެކެވެ.