ބާ ކައުންސިލުގެ އެގްޒެކެޓިވް ކޮމިޓީގައި ހުސްވެފައިވާ މަގާމަށް ކުރިމަތިލުމުގެ ފުރުސަތު އިތުރުކޮށްފިއެވެ.
ބާ ކައުންސިލުން މަޢުލޫމާތު ދިން ގޮތުގައި އެ މަގާމަށް ކުރިމަތިލުމުގެ މުއްދަތު އިތުރުކޮށް، އަންނަ އޮކްޓޯބަރު މަހުގެ ނުވަ ވަނަ ދުވަހާ ހަމައަށް ވަކީލުންނަށް ކުރިމަތިލުމަށް ވަނީ ފުރުސަތު ހުޅުވާލާފައެވެ. އެ މަގާމަށް އިންތިޚާބުކުރެވޭ މެންބަރުގެ ދައުރަކީ ތިން އަހަރު ދުވަހެވެ.
އެ ކައުންސިލުން ބުނީ މުއްދަތު އިތުރުކޮށްފައިވަނީ ގިނަ ގާނޫނީ ވަކީލުންނަށް މި މަގާމަށް ކުރިމަތިލުމުގެ ފުރުސަތު ދިނުމުގެ ގޮތުންކަަމަށެވެ.
ބާ ކައުންސިލުގެ އެގްޒެކެޓިވް ކޮމިޓީގެ މެންބަރުންނަކީ ގާނޫނީ ފަންނު ކުރިއަރުވައި، އަންނަން އޮތް ޖީލުތަކުގެ ގާނޫނީ ވަކީލުންނަށް ފުރުސަތު ފަހިކޮށްދީ، ވަކީލުން ބާރުވެރިކުރުވުމަށާއި ކުރިއެރުވުމަށް ގިނަ މަސައްކަތްތަކެއް ކުރުމުގެ ޒިންމާ ގާނޫނީގޮތުން މަތިކޮށްފައިވާ ފަރާތްތަކެކެވެ.
މީގެ ކުރިން ބާ ކައުންސިލް އެކުލެވިގެންވަނީ ވަކީލުން އިންތިޚާބުކުރާ ކައުންސިލުގެ ރައީސް، ނައިބު ރައީސްގެ އިތުރުން ހިންގާ ކޮމިޓީއަށް އިންތިޚާބުކުރާ ހަ މެންބަރުންނާއި ބަންޑާރަ ނައިބު ހިމެނޭ ގޮތަށެވެ.
ނަމަވެސް ގާނޫނީ ފަންނުގެ ގާނޫނަށް ގެނެވުނު ތިން ވަނަ އިސްލާހާ ގުޅިގެން އެގްޒެކެޓިވް ކޮމިޓީގައި ބަންޑާރަ ނައިބު ހިމެނުން އުނިކުރުމަށް ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ތަސްދީގުކުރެއްވުމާ ގުޅިގެން މިހާރު އެގްޒެކެޓިވް ކޮމިޓީގައި ތިއްބަވަނީ އަށް މެންބަރުންނެވެ. އަދި އިޢުލާނުކޮށްފައި ވަނީ ނުވަ ވަނަ މެންބަރަކު ހޮވުމަށެވެ.
ބާ ކައުންސިލްގެ އެގްޒެކެޓިވް ކޮމިޓީގެ މެންބަރުކަމުގައި ބަންޑާރަނައިބަށް ނުހުރެވޭ ގޮތަށް ގާނޫނީ ފަންނުގެ ގާނޫނަށް ހުށަހެޅި އިސްލާހު، ރައީސް ޑރ. މުހައްމަދު މުއިއްޒު ތަސްދީގު ކުރެއްވީ މިމަހުގެ ތިނެއްވީ އަންގާރަ ދުވަހުގައެވެ.